Maj tikpaleuikan maj tanemili akin tiknojnotsaj
1. ¿Toni okachi tapaleuia keman titanojnotsaj?
1 Keman titanojnotsaj, ¿toni okachi tapaleuia? ¿Keman se kichikaujkauia akin tiknojnotsaj maj kineltoka totamachtilis, oso keman tikpaleuiaj maj tanemili uan maj yejua iselti ajsi itech tanemilil tein moneki? Ijkuak tatitanil Pablo kinnojnotsak judíos tein moajsiaj Tesalónica, kinpaleuij maj tanemilikan itech tamachtilis tein kinmakak, uan nejon tapaleuij maj ‘sekin judíos takuaujtamatinij’ (Hech. 17:2-4). ¿Toni kijtosneki se kintanemililtis oksekin?
2. ¿Keniuj uelis tikchiuaskej kemej Pablo ijkuak titetapouiskej kuali tanauatilmej?
2 Maj tikajsikamatikan tanemililmej tein kipiaj akin techkakij. Moneki tikajsikamatiskej tein kinemilia taltikpaknenkej kampa titanojnotsaj uan ijkon uelis tikpaleuiskej maj tanemili. Keman Pablo peuak itanojnots imiuan griegos tein amo taneltokayaj akin moajsiaj itech Areópago, ika kinnojnotsak tein yejuan kiixmatiaj uan amo kiixnamikiaj (Hech. 17:22-31). Yejua ika, keman tionmomachtijtos toni ika peuas tiontajtos, xikonita toni okachi kineltokaj uan toni okachi ika techixnamikij tein nemij kampa titanojnotsaj (1 Cor. 9:19-22). Komo taltikpaknenkej kijtoua teisa tein ika taixnamiki, xikontemo toni kiixmati uan kiselia uan ika nejon xikonsentoka xiontajto.
3. ¿Keniuj uelis kuali tikuiskej netajtanilmej uan ika nejon tikinpaleuiskej oksekin maj tanemilikan?
3 Maj tikmatikan tikchiuaskej netajtanilmej. Amo uelis tikiluiskej ika teléfono se ojnenkej keniuj ajsis kampa kineki yas komo amo tikmatij kani yetok. No ijkon, amo uelis tikpaleuiskej akin tiknojnotsaj maj iselti ajsi itech tanemilil tein moneki, komo amo tikmatij toni kinemilijtok. Achto ke Jesús kinpaleuiskia takakinij maj tanemilianij itech se taman, kinchiuiliaya netajtanilmej uan ijkon kimatia toni kinemilijtoyaj. Kemej neskayot, se tonal se takat kitajtanij Jesús: “¿Toni moneki nikchiuas para ke Totajtsin Dios nechaxkatilis ne yek nemilis [...] ten amo keman tamis?”. Achto ke kinankiliskia, Jesús kichiuilij okseki netajtanilmej uan ika nejon kimatik toni kinemiliaya (Luc. 10:25-28). Okse tonal, keman Pedro kitemakak se tanankilil tein amo kuali yetoya, Jesús kuali kitekitiltij netajtanilmej uan ika nejon kipaleuij maj kipata itanemilil (Mat. 17:24-26). Yejua ika, komo akin tiknojnotsaj techchiuilia se netajtanil oso techiluia se tanemilil tein amo kuali yetok, uelis tikuiskej netajtanilmej uan ika nejon tikpaleuiskej maj yejua iselti ajsi itech tanemilil tein moneki.
4. ¿Keyej moneki tikpaleuiskej maj tanemili akin tiknojnotsaj?
4 Keman tikpaleuiaj maj tanemili akin tiknojnotsaj, tikchiuaj kemej Ueyi Tamachtijkej Jesús uan kemej ne uejkauj seki itatojtokakauan tein kuali tanojnotsayaj. Uan no, tikpoujkaitaskej taltikpaknenkej kemej moneki (1 Ped. 3:15). Nejon uelis tapaleuis maj oksepa techseli keman tikalpanoskej.