Keniuj kuali kisas totanojnotsalis itech ojti
1. ¿Kani uelis titanojnotsaskej ijkon kemej Jesús kichiuak?
1 Keman Jesús tanojnotsak nikan taltikpak, kinnojnotsak taltikpakneminij akin moajsiaj itech ojti uan okseko kampa moajsiaj miakej (Luc. 9:57-61; Juan 4:7). Kitelnekia kinmatiltis kuali tanauatilmej nochin tein ueliskia. Axkan, tanojnotsalis tein mochiua itech ojti tel tapaleuia maj taltikpakneminij uelikan kiselikan tamatilis tein kitemaka Dios (Pro. 1:20). Okachi kuali kisas komo tejuan tipeuaj titajtouaj uan tikchiuaj ika kuali taixejekolis.
2. ¿Keyej moneki maj tejuan tipeuakan titajtokan keman timoajsiskej itech ojti?
2 Maj tejuan tipeuakan. Okachi kuali maj tejuan tikinnojnotsakan akin ompa panoskej, uan amo maj sayoj seko tiijkatokan oso titokotsyetokan uan maj ompa tikinchixtokan maj yakan kampa tiyetokej. Xionixuetska uan keman tikonixitas xikonnojnotsa ika yemanik tajtolmej. Komo no moajsij oksekin tanojnotsanij, xikonelnamiki ke okachi kuali maj tosejselti titanojnotsakan. No moneki maj tiktemokan keniuj uelis oksepa titajtoskej iuan. Keman tiontamitajtos uan tikonita ke uelis, xikonstajtani keniuj uelis oksepa iuan tiontajtos. Kemansa sekin tanojnotsanij tekitij sayoj seko kampa miakej panouaj, nejon tapaleuia maj oksepa iuan tajtokan akin achto kinojnotskajya tein kichiuas maj okachi kikaki.
3. ¿Keniuj uelis tiknextiskej kuali taixejekolis keman titanojnotsaskej itech ojti?
3 Maj tikchiuakan ika kuali taixejekolis. Moneki kuali xikonixejeko kani uan akoni tikonnojnotsas. Amo xikonchia nochin tikonnojnotsas akin panoskej kampa tionmoajsis. Moneki kuali tikonitas kemanian uelis tiontanojnotsas. Se neskayot, komo aksa moita tel ijsiujtiuj okachi kuali maj amo se kitsakuili. Keman tiontanojnotstos kalixpan kampa tanamakaj, xikonchiua ika miak nejmachkayot uan ijkon amo mokuejmolos akin kinixyekana tekitinij. Okachi kuali maj tikinnojnotsakan keman kisaj kampa tanamakaj uan amo keman kalakij. Keman tionmotokis iuan se taltikpaknenkej, amo xikonchiua maj momoujti oso maj kinemili tein amo kuali. No moneki maj kuali tikixejekokan keman tiktemakaskej se amaix. Komo taltikpaknenkej amo semi kineki momachtis, okachi kuali maj se kimaka se tratado uan amo revistas.
4. ¿Keyej teyolpaktij uan tel tapaleuia tanojnotsalis tein mochiua itech ojti?
4 Tanojnotsalis tein mochiua itech ojti, tapaleuia maj ueli momoyaua tanextililis tein melauak iuan miak taltikpakneminij itech sayoj ome eyi tonalmej (Ecl. 11:6). Xa uelis ompa tikinajsiskej sekin tein amo moajsij imin chan keman tiyouij kajkalpan. ¿Keyej amo tikonixtalia tikonchiuas nejin tanojnotsalis tein teyolpaktia uan tein tel tapaleuia?