¿Uelis titanojnotsaskej tiotakpa?
1. Kemej kijtoua se amaix, ¿toni hora tanojnotsaya kajkalpan tatitanil Pablo?
1 Kemej kijtoua se amaix, tatitanil Pablo tanojnotsaya kajkalpan uan peuaya “naui hora tiotak hasta keman youakya katka” (Daily Life in Bible Times). Maski amo ueli tikijtouaj ke itech nejon hora nochipa tanojnotsaya, kemaj tikmatij ke motemakak “ika porin Tajtoltsin de Dios ten kualkui ne nemakixtilis” (1 Cor. 9:19-23). Monekia kiixtalis yas kajkalpan uan tanojnotsas keman okachi kinajsiskia akin iniuan tajtos.
2. ¿Keyej semi kuali maj tikisakan itech tanojnotsalis tiotakpa?
2 Itech miak xolalmej, tanojnotsanij momattokej yaskej kajkalpan kualkanpa itech semana. Sayoj ke, ¿ijkuak okachi uelis tikinajsiskej taltikpakneminij kampa titanojnotsaj? Se precursor kijtoj: “Okachi amo tikinajsij ininchan taltikpakneminij itech tonayan, sayoj ke kemaj tiotakpa”. Itech nejon hora taltikpakneminij okachi yolseujtokej uan uelis iniuan titajtoskej. No ijkon okachi uelis tikinnojnotsaskej takamej. Nochipa keman uelis, tayekananij moneki kiixtaliskej maj motanojnotsa tiotakpa.
3. ¿Keniuj tiknextiaj kuali taixejekolis keman titanojnotsaj tiotakpa?
3 Maj tiknextikan kuali taixejekolis. Keman titanojnotsaskej tiotakpaya moneki tikpiaskej kuali taixejekolis. Kemej neskayot, komo tiajsij itech se kali uan tikitaj ke amo uelis iuan titajtoskej taltikpaknenkej, xa porin takuajtoskej, uelis tikiluiskej ke timokepaskej okachi satepan. Uan komo tayouayan, maj timoketsakan kampa uelis techitas taltikpaknenkej, maj niman tikiluikan tiakonimej uan keyej tikinkalpanouaj. No moneki maj tiyakan tiojomen itech tanojnotsalis oso maj amo timouejkatilikan iniuan okseki tanojnotsanij, uan no maj tiyakan kampa taxojxotatok itech ojti uan kampa amo taseltijkan. Amo taixejekol maj titanojnotsakan keman tel youakya, porin xa kochitijya taltikpakneminij (2 Cor. 6:3). Komo kansaika tamouililpan keman tayouayantia, moneki titanojnotsaskej achto ke tapoyauis (Prov. 22:3).
4. ¿Toni tatiochiualismej tikseliskej komo titanojnotsaj tiotakpa?
4 Tatiochiualismej. Okachi tiyolpakij keman ueli titajtouaj iniuan taltikpakneminij. Ijkon kemej okachi titanojnotsaskej, okachi miakej taltikpakneminij uelis tikinpaleuiskej “ma makisakan de nintajtakoluan para ma ijkon kajsikamatikij in melauak Tajtoltsin de Dios” (1 Tim. 2:3, 4). ¿Uelis tikyektaliskej totekiuj uan titanojnotsaskej tiotakpa?