Maj kuali tikuikan tiempo itech tanojnotsalis
Itech xiujtekit 2014, tiitaixpantijkauan Jiova titanojnotskej 1,945,487,604 horas, nejin kinextia ke senkis tikixtaliaj tiksentokaskej tiktekitiliskej Jiova (Sal. 110:3; 1 Cor. 15:58). Kemej “amo uejkauas ok” tamis nochi tein amo kuali, ¿uelis titajtoskej iniuan okachi taltikpakneminij keman timoajsij itech tanojnotsalis? (1 Cor. 7:29.)
Moneki tikpataskej tein monekis uan ijkon kuali tikuiskej tiempo itech tanojnotsalis. Kemej neskayot, komo miakpa tipanouaj se hora oso okachi itech se taman tanojnotsalis uan amo titajtouaj iuan nion akin, ¿toni ueliskia tikchiuaskej uan ijkon tikinajsiskej okachi taltikpakneminij? Maski tataman kemej nemij itech se xolal iuan okse, nejin tayolmajxitilismej xa techpaleuiskej maj okachi kuali tikuikan tiempo uan ijkon amo nenkaj chikaujkayot tein tikchiuaskej (1 Cor. 9:26).
Tanojnotsalis kajkalpan. Miak xiujmejya, itech tonalmej keman tokniuan kiixtaliaj tanojnotsaskej peuaj tekitij kajkalpan. Sayoj ke, kemej miakej tekitij nochi tonal, ¿keyej amo titanojnotsaj kajkalpan tiotakpa oso keman peua tapoyaui? Nejon hora, taltikpakneminij moajsij ininchan uan okachi amo ijsiujtinemij. Uan no, titanojnotsaskej kualkampa itech ojti oso itech tanamakaloyamej uelis tapaleuis maj okachi techkakikan.
Tanojnotsalis senteixtenoj. Moneki maj motali mesa oso tepos tsikitsin kampa miakej panouaj, nochipa kampa ixyetok tanojnotsas nechikol (xikonita amaix ITekiyo Dios tein Tikchiuaj metsti julio xiuit 2013, página 5). Komo amo miakejok panoskiaj ompakauin, Tayekananij akin Kinixnextiaj oloch tayekananij itech Nechikol uelis kiixtaliskej kipataskej mesa oso tepos tsikitsin uan kitaliskej kampa panoskej okachi miakej.
Keman oksepa titakalpanoskej uan titamachtiskej ika Biblia. ¿Keyej amo tikixtaliaj oksepa titakalpanoskej oso tiktemakaskej nemachtilmej ika Biblia keman okachi amo tikinajsij taltikpakneminij itech tanojnotsalis? Kemej neskayot, komo itech tonal sábado kualkan okachi tikinajsij taltikpakneminij itech tanojnotsalis kajkalpan, ¿ueliskia tiktemakaskej nemachtilmej ika Biblia tiotakpa oso keman peua tapoyaui? Keman oksepa tiyaskej itech se xolal tikinkalpanotiuij akin techkakkej uelis tikixtaliskej no tiktemakaskej nemachtilmej ika Biblia tein tikpiaj ompa, ijkon okachi kuali tikuiskej tiempo itech tanojnotsalis.
Semi melauak ke nochipa uelis tikamataliskej tiempo tein titanojnotsaskej, sayoj ke okachi tiyolpakiskej komo tikinajsij okachi taltikpakneminij. Komo se taman tanojnotsalis itech se hora amo semi tapaleuia, maj tiktemokan okse taman. Maj tiktataujtikan Jiova, akin “niaxka in tapixkalis”, maj techpaleui maj kuali tikuikan tiempo itech tanojnotsalis (Mat. 9:38).