Kampa monankilia netajtanilmej

◼ ¿Akonimej moneki tikinkauiliskej amaixmej?

Nochin akin kinextiskej ke kinekij kimatiskej okachi. Komo tikitaj ke taltikpaknenkej kiuelkaki iTajtol Dios tein tiktapouiaj, uelis tikauiliskej ome revistas, se folleto, se libro oso okse amaix maski tikitaskej ke kitemakati tepitsin oso nion tepitsin tomin tein ika mochiua tekit itech nochi taltikpak (Job 34:19; Apo. 22:17). Sayoj ke amo tikinkauiliskej akin amo kitasojkamatij nejon amaixmej tein kipiaj tamachtilis tein motelneki (Mat. 7:6).

¿Uan keniuj uelis tikmatiskej ox kineki kimatis okachi? Keman tikitaj ke kineki touan tajtos, kuali techkaki keman tiknojnotstokej, technankilia tein tiktajtaniaj uan kijtoua tein kinemilia. Uan komo no kiita tein tikixtajtoltiliaj itech Biblia kinextia ke kipoujkaita iTajtol Dios. Kemansa monekis tiktajtaniskej taltikpaknenkej ox kiixtajtoltis amaix. Moneki kuali tikixejekoskej keman tikitaskej ox taltikpaknenkej kineki kimatis okachi. Kemej neskayot, ijkuak titanojnotsaskej itech ojti, amo tikinkauiliskej se amaix nochin tein ompa panoskej. Komo amo tikyekmatij ox kineki kimatis okachi, semi kuali yeskia maj tikauilikan se tratado oso se amatsin.

Okse taman, keman tikixtiskej amaixmej itech nechikol maj amo timotaksaltikan itech tomin tein uelis tiktemakaskej, ta maj tikixtikan tein tikuiskej itech tanojnotsalis. Ika tomin tein tiktemakaj amo tikixtauaj amaixmej, ta ika nejon tikpaleuiaj nochi tataman tekit itech tanojnotsalis tein mochiua noyampa taltikpak. Totasojkamatilis moneki techolinis maj ika miak pakilis uan ika nochi toyolo tiktemakakan tomin tein ika mochiua tekit tein mouika iuan iTekiuajyo Dios, maski sayoj tepitsin tikpiaskej (Mar. 12:41-44; 2 Cor. 9:7). No techolinis maj sayoj tikuikan amaixmej tein tiktekitiltiskej itech tanojnotsalis uan ijkon amo tikauilchiuaskej tomin tein ika mochijchiuaj amaixmej.

[Tajtolmej itech página 2]

Moneki kuali tikixejekoskej keman tikitaskej ox taltikpaknenkej kineki kimatis okachi