Kampa monankilia netajtanilmej
◼ ¿Toni moneki kiitas akin kineki maj nochi tein iaxka, oso sayoj seki, pano imako inechikol Jiova satepan ke momikilis?
Satepan ijkuak timomikiliaj amo ueli tiktekitiltiajok tein toaxka (Ecl. 9:5, 6). Yejua ika miakej achto kiamataliaj keniuj kinekij maj moxejxelo tein ininaxka (2 Rey. 20:1). Itech nejin amat tein moixtalia ininixpan tekiuanij no moijtoua akoni yeski akin kichiuas itanejnekilis akin momikilij, tein moixmati kemej albacea oso administrador fiduciario. Itech miak altepemej, keman aksa momikilia uan amo kichijchiua se amat ininixpan tekiuanij kampa kijtos itanejnekilis, yejuan tekiuanij kijtouaj keniuj moxejxelos tein iaxka. Yejua ika, komo tiknemilijtokej tikchiuaskej teisa ika tein toaxka, kemej tikauiliskej inechikol Jiova nochi oso sayoj seki, moneki tikamataliskej ininixpan tekiuanij uan maj kuali tikixpejpenakan akoni kichiuas ijkon kemej tiknekij. Komo tiknekij tikmatiskej okachi, uelis titajtaniskej nepaleuil itech sucursal.
Akin moixpejpenas maj kichiua ijkon kemej moamatalij, kipias se ueyi tekit. Kisentilis uan kixejxelos tein katka iaxka akin momikilij uan komo miak, okachi kiuikilis miak tonalmej uan monekis kichijchiuas okseki amamej. Uan no tekiuanij kemansa kitaliaj tanauatilmej tein monekis se kitakamatis. Yejua ika, maski aksa yeski tokniuj amo kijtosneki ke kichiuas kuali nejon tekit. Nejin tekit moneki kipias akin uelis kichiuas, takuaujtamach uan kichiuas ijkon kemej kijtoj akin momikilij (xikonita tamachtilis “Los beneficios de la planificación patrimonial”, itech ¡Despertad! 8 de diciembre de 1998).
Komo aksa achto ke momikilis mitsoniluia xikonita keniuj moxejxelos nochi tein iaxka. Yekinika, moneki tikonixejekos ke monekis tomin, uan satepan ijkuak tikonchiuas netataujtil, monekis tikonitas ox uelis tikonchiuas nejon tekit (Luc. 14:28-32). Keman taltikpaknenkej momikilis, tejuatsin monekis tikoniluis nochin akin kiseliskej nochi tein yejua kinkauilij. No ijkon, tikonpias tanauatil uan ijkon monekis, tikonxejxelos tein iaxka, kemej achto kiamatalijkej uan kemej kiixtaliaj tekiuanij. Se albacea oso administrador fiduciario amo keman moneki kitapanauilis tein kiamatalij akin momikilij, yeski miak tein iaxka oso amo. Komo aksa kikauilia tein iaxka oloch tokniuan tein kiixnextiaj itaixpantijkauan Jiova ininixpan tekiuanij, panoua imako inechikol Jiova (Luc. 16:10; 21:1-4).