Jiova semi kintatiochiuia akin kitemakaj teisa ika nochi ininyolo

TOTACHIJCHIUJKAUJ kinextia ke kinpoujkaita taltikpakneminij keman kinmaka se netetayokolil tein kitelpia ipatiuj: kinkaua maj yejuan taixpejpenakan. Uan no, kinmaka miak tatiochiualismej akin kikuij nejon netetayokolil uan amo kichiaj kiseliskej teisa uan ijkon kitayekanaltiskej taueyichiualis tein melauak, kiueyitaliaj iTokay uan tapaleuiaj maj mochiua iTanejnekilis. Jiova amo kineki maj tiktakamatikan porin tikmouiliaj oso porin ijkon moneki tikchiuaskej. Ta kiyolpaktia maj tiknekikan tiktekitiliskej porin yekmelauj tiktasojtaj uan tiktasojkamatiliaj tein toka kichiuani.

Kemej neskayot, keman israelitas moajsiaj taluakyan ompa Sinaí, Jiova kinnauatij maj kichijchiuaskiaj se kali kampa kiueyichiuaskiaj. Kiniluij: “Namejuan xiktemakakan se netetayokolil tein yeski iaxka Jiova. Maj nochin akin ininyolo kinolinis kiualkuikan kemej netetayokolil tein kimakaskej Jiova” (Éx. 35:5). Sejse israelita kitemakaskia tein yeski tein ueliskia, uan nejon tein kitemakaskia ika nochi iyolo ueliskia motekitiltis kemej tapaleuiskia maj mochiua itanejnekilis Dios. ¿Toni kichiuak xolal?

“Nochin akin ininyolo kinolinij” kitemakakej se netetayokolil, “nochin akin kiyolnejnekiaj tapaleuiskej”. Takamej uan siuamej kitemakakej teisa tein ika tapaleuijkej maj mochiua tekit tein Jiova kinnauatijka, kemej pipilolmej, anillos, oro, plata, cobre, hilo azul, itojmiyo ichkat tein kitapaluiayaj ika tapal púrpura, fibra escarlata, lino tein okachi kuali, itojmiyo chivo, ininkuetaxyo ichkamej tein kitapaluiayaj ika tapal chichiltik uan ininkuetaxyo focas, acacia kouit, kualtsitsin tetsitsin uan tataman aceite. Satepan, nochi “tein kiualkuikej senkis ajsiaya tein ika mochiuaskia nochi tekit tein ixyetoya, uan hasta mokauakok” (Éx. 35:21-24, 27-29; 36:7).

Tein Jiova okachi kiyolpaktij amo ipatiuj tein kipiayaj nejon netetayokolilmej, ta kiitas ke kitemakayaj ika nochi ininyolo uan ijkon kipaleuiskej taueyichiualis tein melauak. Uan xolal no tapaleuij ika tekit tein mochiuak. Biblia kijtoua: “Nochi siuamej tamatinij tajkitikej ika ininmauan”. No kinextia: “Nochi siuamej tamatinij akin ininyolo kinolinij tajkitikej ika itojmiyo chivo”. Uan no, Jiova kimakak Bezalel tamatilis, taajsikamatilis, “uan taixmatilis itech nochi tataman tamachijchiualis”. Kemaj, Jiova kinmakak Bezalel uan Oholiab taixmatilis tein monekia tein kinpaleuiskia maj kichiuaskiaj nochi tekit tein kinnauatijka (Éx. 35:25, 26, 30-35).

Keman Jiova kinyoleuak israelitas maj kitemakaskiaj netetayokolilmej, senkis kimatia ke “nochin akin kiyolnejnekiaj”, kipaleuiskiaj taueyichiualis tein melauak. Uan yejua ika, kemej kitemakakej ika nochi ininyolo, yejuatsin semi kintatiochiuij keman kinixyekanak uan kichiuak maj kipianij ueyi yolpakilis. Ijkon, Jiova kinextij ke ijkuak itekitikauan kitemakaj teisa ika nochi ininyolo yejuatsin kintatiochiuia keman kinmaka nochi tein moneki uan taixmatilis tein kinpaleuis maj kichiuakan iTanejnekilis (Sal. 34:9). Komo tiktekitiliaj Jiova uan amo tikchiaj tikseliskej teisa, tikyekmatij ke yejuatsin techtatiochiuis.

KENIUJ UELIS TITAPALEUISKEJ MAJ MOCHIUA TEKIT SEMANAUAK TALTIKPAK

Ijkon kemej itech itonaluan Pablo, axkan miakej ‘kixelouaj seki inintomin’ uan kitaliaj itech kaxontsin tein yetok itech nechikol kampa kijtoua “Tomin tein ika mochiua tekit semanauak taltikpak” (1 Cor. 16:2). Sejse metsti, nochi nechikolmej kititanij nejon tomin itech sucursal kampa kinixyekanaj itaixpantijkauan Jiova. Tejuatsin no uelis tikontitanis netetayokolil itech sucursal tein taixyekana itech altepet kampa tionnemi. Komo tikonneki tikonmatis itech katiyejua tokayit moneki tikontitanis, uelis tiontajtanis itech sucursal. Uelis tikonajsis kani itech Internet www.jw.org/ncj. Maj tikitakan seki taman netetayokolilmej tein tejuan uelis tiktitaniskej:

TEIN TITETAYOKOLIAJ

Netetayokolil ika tomin, oso okseki taman tein tikpiaj tein patiyoj.
No moneki tikijkuiloskej se amat tein kinextia ke titetayokoliaj nejon tomin oso okseki taman tein tiktemakaj.

TEIN UELIS SE TAJTANIS MAJ TEKEPILIKAN

Netetayokolil ika tomin tein akin kitemakak uelis tajtanis maj kikepilikan komo moneki.
No moneki kijkuilos se amat tein kinextia ke nejon se netetayokolil tein tajtanis maj kikepilikan.

OKSEKI TAMAN NETETAYOKOLILMEJ

Ika tomin tein titetayokoliaj oso okseki taman tein patiyoj uelis titapaleuiskej maj mochiua itekiyo Dios noyampa taltikpak tein mouika ika iTekiuajyo, sayoj ke no maj tikitakan okseki tamanok kemej uelis tikchiuaskej. Komo tikonneki tikontekitiltis semej, ika kualtakayot achto xiontajtani itech sucursal tein taixyekana itech altepet kampa tionnemi ox ompa uelis tikontekitiltis nejon. Kemej tein tajtanij tekiuanij uan tanauatilmej tein kinextiaj keniuj se taxtauas impuestos uelis mopatas itech se altepet uan okse, motelneki xikontemo inepaleuil aksa akin ika tekiti nejon uan ijkon tikonixpejpenas tein tikonitas ke okachi kuali.

Seguro. Kijtosneki ke ijkuak se kipia se seguro se kiixtalia se sucursal kampa kinixyekanaj itaixpantijkauan Jiova maj kiseli tomin tein kitemakaskej.

Tomin tein se kipia banco. Certificados de depósito, tomin tein se kipia banco uan tomin tein temakaj keman amo se tekitiok ijkuak se kiajxitia xiuit uelis se kiamatalis kanachi kiselijtos se sucursal kampa kinixyekanaj itaixpantijkauan Jiova oso maj kimakakan komo se momikilij, ijkon kemej kijtouaj tanauatilmej itech altepet.

Acciones uan bonos. Uelis se kitayokolis se sucursal kampa kinixyekanaj itaixpantijkauan Jiova oso se kijkuilos se amat tein kinextia ke panos imako komo se momikilij.

Talmej oso kalmej. Uelis se kitayokolis se sucursal kampa kinixyekanaj itaixpantijkauan Jiova talmej oso kalmej tein uelis kinamakaskej. Nejon uelis yeski se netetayokolil. Oso uelis se kiixtalis hasta kemanian se kitemakas. Komo ijkon, uelis se kisentokas ompa se nemis hasta keman se momikilis.

Testamentos uan fideicomisos. Iixpan se notario uelis se kikauilis se sucursal kampa kinixyekanaj itaixpantijkauan Jiova tomin oso tein se kipia, oso se kiamatalis kanachi kiselijtos.

Akin kineki kitemakas nejin taman netetayokolilmej moneki achto kuali kiitas keniuj okachi kuali uelis kichiuas. Ika nejin taman netetayokolilmej, miakej uelij kipaleuiaj tekimej tein mochiua noyampa taltikpak tein ika titaueyichiuaj uan tein ika tikinpaleuiaj oksekin.

Komo tikonneki tikonmatis okachi, xiontajtani itech sucursal tein taixyekana itech altepet kampa tionnemi.