Akin kualtakat kiselis tatiochiualismej

ITEKITIKAUAN Jiova nochipa kiueyichiuanij ika tataman netetayokolilmej. Israelitas kitemakayaj tapialmej kemej nemaktilmej, uan akin kichiuaj kemej Cristo nochipa kiueyichiuanij Dios ‘ika ininten’. Sayoj ke no moajsi seki netetayokolilmej tein no kiyolpaktiaj Dios (Heb. 13:15, 16). Akin kitemakaj yolpakij uan kiseliaj tatiochiualismej, kemej kinextiaj nejin neskayomej.

Ana katka se israelita tatakamatkej akin kinekia kipias se okichpil, sayoj ke amo uelia kinpiaya konemej. Itech se netataujtil motenkauak iuan Jiova ke komo kipiaya se okichpil, kimaktiliskia maj kitekitili “nochi tonalmej tein nemis[kia]” (1 Sam. 1:10, 11). Satepan, Ana mokokoxkatalij uan kipiak se okichpil akin kitokaytij Samuel. Keman amo yejua kitamakakok, kiuikak maj kitekitili Jiova itech tabernáculo, ijkon kemej motenkaujka. Jiova kitatiochiuij Ana porin kichiuak nejon. Ana kinpiak makuil konemejok, uan Samuel mochiuak tanauatijkej uan semej akin kijkuiloj Biblia (1 Sam. 2:21).

Ijkon kemej Ana uan Samuel, tiitekitikauan Dios no uelis tiktekitiliskej toTachijchiujkauj. Jesús motenkauak ke tikseliskej miak tatiochiualismej komo tiktekitiliaj maski teisa tikauaskej (Mar. 10:28-30).

Dorcas katka se itatojtokakauj Cristo akin kinextiaya “kualtagayot uan kinpaleuijtinemia nochi tagayot”. Sayoj ke, “kokolispeuak” uan “momikilij”, uan tokniuan itech nechikol semi tayokoyakej. Keman kimatkej ke Pedro amo uejka moajsia, kitataujtijkej maj niman yani kinitati. ¡Xikonnemili keniuj yolpakkej keman Pedro ajsik uan kiajokuik Dorcas! Itech nejin tajkuilol yekinika moijtoua itech Biblia ke se tatitanil kiajokuik aksa (Hech. 9:36-41). Dios amo keman kielkauak tein kichiuak Dorcas (Heb. 6:10). Itech Biblia ika motajtoua, uan axkan uelis tikchiuaskej kemej yejua.

Tatitanil Pablo no techkauilia se kuali neskayot porin kitemakak itonaluan uan kinpaleuij tokniuan. Kinijkuilouilij tokniuan kayomej Corinto: “Ika ueyi yolpakilis [...] nimotatekiutijtiyas uan nimotajyouiltijtiyas de nejua nochikaualis sayo porin semi namechueyitasojtatinemi” (2 Cor. 12:15). Pablo kimatik ika tein kichiuak ke komo tikinpaleuiaj oksekin tiyolpakij uan tikseliaj se taman tein okachi moneki: itatiochiualis Jiova (Hech. 20:24, 35).

Kemaj, Jiova kiyolpaktia maj ika totonaluan uan tochikaualis tikchiuakan itekiyo uan maj tikinpaleuikan tokniuan. Sayoj ke ¿uelis tikchiuaskej okse taman? Kemaj. Amo sayoj moneki tiyeskij tikualtakamej iniuan oksekin, uelis tikueyitaliskej Jiova keman titapaleuiskej ika tomin. Nejon tapaleuia maj kisentoka motanojnotsa noyampa taltikpak. Kemej neskayot, ika nejon tomin, kiseliaj nepaleuil misioneros uan okseki tokniuan akin kitekitiliaj Jiova nochi tonalmej. Uan no, ika mochijchiuaj uan motajtolkepaj amaixmej uan videos, motemaka nepaleuil kampa mochiua se tetsauit uan mochijchiuaj okachi Kalmej kampa tiMosentiliaj. Uelis tikyekmatiskej ke komo tiktemakaj totapaleuil, tikseliskej tatiochiualismej. Uan no, tikueyitaliskej Jiova ika “tein kipia ipatiuj” tein tikpiaj (Prov. 3:9; 22:9).

Keniuj tapaleuiaj sekin maj mochiua itekiyo Dios noyampa taltikpak

Ijkon kemej itech itonaluan tatitanil Pablo, axkan miakej ‘kixelouaj seki inintomin’ uan kitaliaj itech kaxontsin tein yetok itech nechikol (1 Cor. 16:2). Sejse metsti, nechikolmej kititanij nejin tomin itech sucursal tein kinixyekana itech ininaltepeuj. Komo tikonneki, uelis tejuatsin tikontitanis netetayokolil itech tokayit tein kikui sucursal tein taixyekana itech altepet kampa tionnemi. Komo tikonneki tikonmatis katiyejua tokayit, xiontanotsa itech sucursal. Tikonajsis keniuj itech www.jw.org/ncj. Yejua nejin seki taman kemej tejuatsin uelis tiontapaleuis (tataman uelis mochiuas kampa tionnemi):

TEIN TITETAYOKOLIAJ

Tomin tein tikonpia itech banco uelis tikonpanoltis itokaykopa se sucursal ika Internet oso uelis tikonchiuas ika tarjeta de débito oso crédito. Itech seki altepemej no ueli se kichiua ika jw.org oso okseko itech Internet.
Tomin oso okseki taman tein tikonpia tein patiyoj. Xikonijkuilo se amat tein kinextis ke tiontetayokolia nejon uan amo tikonchia maj mitsonkepilikan.

TEIN UELIS SE TAJTANIS MAJ TEKEPILIKAN

Tomin tein uelis tiontajtanis maj mitsonkepilikan komo moneki.
Xikonijkuilo se amat tein kinextis ke tiontajtanis maj mitsonkepilikan.

OKSEKI TAMAN NETETAYOKOLILMEJ

Moajsi okseki taman kemej uelis titapaleuiskej maj mochiua itekiyo Dios noyampa taltikpak. Achto ke tikontemakas se netetayokolil, xiontajtani itech sucursal tein taixyekana itech altepet kampa tionnemi katiyejua netetayokolilmej uelis tiontemakas ompa. Kemej tanauatilmej mopataj itech sejse altepet, moneki xikontemo inepaleuil aksa akin kiixmati tanauatilmej tein ixyetok uan keniuj motaxtaua impuestos.

Seguros uan planes de jubilación: Komo tikonpia se seguro de vida, se fondo de jubilación oso se plan de jubilación, uelis tikonixtalis tokayit tein kikui sucursal itech moaltepeuj maj kiseli tomin tein kitemakaskej.

Tomin tein se kipia banco: Uelis tikonixtalis tokayit tein kikui sucursal itech moaltepeuj maj kiseli tomin tein tikonpia banco komo tionmomikilij. Sayoj ke moneki tikonchiuas kemej kijtouaj tanauatilmej itech altepet.

Acciones uan bonos: Uelis tikontayokolis sucursal itech tokayit tein kikui. No uelis tikonijkuilos se amat kampa tikonijtos ke tikonneki maj pano imako keman tionmomikilis.

Talmej oso kalmej: Komo tikonpia se kali oso se tal tein uelis monamakas, uelis tikonixtalis tokayit tein kikui sucursal itech moaltepeuj maj kiseli. Komo ompa tionnemi, uelis tikonixtalis ke ompa tikonsentokas tionnemis hasta keman tionmomikilis.

Testamentos uan fideicomisos: Uelis tikonixtalis iixpan se notario tokayit tein kikui sucursal itech moaltepeuj maj kiseli tomin tein tikonpia, se tal oso se kali tein moaxka ijkuak tionmomikilis. No uelis tikonamatalis maj kitekitiltikan hasta keman tejuatsin tikonixtalis. Nejin uelis tapaleuis keman tikonixtauas impuesto.

Nochi nejin tataman nepaleuil moneki achto kuali kiixtalis akin kitemaka. Komo tikonneki tikonmatis okseki taman kemej uelis tiontapaleuis maj mochiua itekiyo Dios noyampa taltikpak, xikonixtajtolti amaix Donaciones planificadas para favorecer el servicio del Reino en todo el mundo. Nejin amaix moajsi itech tajtol español uan inglés. Kemej tanauatilmej mopataj itech se altepet uan okse, uelis yeski ke seki taman amo monekis tikonchiuas. Miakej taltikpakneminij kitemakanij netetayokolilmej tein ika tapaleuiaj maj mochiua itekiyo Dios noyampa taltikpak uan kinpaleuiani keman taxtauaj impuestos. Komo nejin amaix motekitiltia itech altepet kampa tionnemi, uelis tikontajtanis tajkuilojkej itech monechikol maj mitsonmaka se.

Komo tikonneki tikonmatis okachi, xikonpatskili kampa kijtoua “Quiero hacer una donación para nuestra obra mundial” tein moajsi tatsintan itech jw.org, oso xiontajtani itech sucursal.