Keniuj uelis tiktasojkamatiskej maj Jiova kiuelita kitemakas teisa

KEMAN tikitaj tachijchiualis, tikajsikamatij ke Jiova se Dios akin semi kiuelita kitemakas teisa (Sant. 1:17). Kemej neskayot, yejuatsin amo kitalij sayoj seki sitalimej ompa iluikak, ta tel miakej millones. No kichiuak maj itech nochi taltikpak onkani kualtsitsin xochimej (Sal. 65:12, 13; 147:7, 8; 148:3, 4).

Ne uejkauj, se itekitikauj Dios semi kitasojkamatiliaya Jiova nochi itachijchiualis uan yejua ika kijkuilouilij se nekuikatil. Uelis tikonixtajtoltis itech Salmo 104. Itech nejon nekuikatil, kijtoj ke kinekia kiueyichiuas Jiova nochi inemilis (Sal. 104:33). ¿No ijkon tionmomachilia tejuatsin?

AKIN OKACHI KIUELITA KITEMAKAS TEISA

Jiova kineki maj tikuelitakan titemakaskej teisa kemej yejuatsin. Yejua ika kichiuak maj tatitanil Pablo kijkuilouani ke akin kipiaj tomin moneki amo takuaujtamatiskej ke nejon kinualkuilis yolpakilis. Moneki takuaujtamatiskej iuan Dios, akin techmaka nochi tein kuali. Pablo no kijtoj ke moneki tikinpaleuiskej oksekin, tikuelitaskej titemakaskej teisa uan titemakaskej tein tikpiaj ika yolpakilis. Komo ijkon tikchiuaj, satepan yekmelauj tiyolpakiskej (1 Tim. 6:17-19). Kemej tikitaj, Jiova techiluia miak taman tein kinextia keyej moneki tikuelitaskej titemakaskej teisa.

Keman Pablo kinijkuilouilij ojpatika amat tokniuan akin nemiaj Corinto, kimelauak toni okachi moneki techolinis maj tikuelitakan titemakaskej teisa. Yejua kijtoj: “Cada senme taneltokani ma kitemaka itapaleuilis ijkon keme yejua kinemilij ya ke kitemakas. Uan cada tokniu, ma amo kitemaka itapaleuilis ika ne yolkokolis. Uan amo no ma kitemaka tapaleuilis porin kimachilia ke Dios kifuerzajuia ma kitemaka. Porin Totajtsin Dios kitasojta se tagat ten kitemaka itapaleuilis ika yolpakilis” (2 Cor. 9:7). ¿Akonimej kinpaleuia keman titemakaj teisa? Sekin, yejuan taltikpakneminij akin kiseliaj tein kinpoloua. Uan oksekin, tejuan, porin Jiova techmaka miak taman tein kuali (2 Cor. 9:11-14).

Satepan, Pablo kinelnamiktij akin nemiaj Corinto ke moneki tiktasojkamatiliskej Dios porin techmakani se ueyi netetayokolil (2 Cor. 9:15). Nejin yejua nochi tein kuali tein techmaka itechkopa iKonetsin, Jesucristo. Amo ueli se kimelaua keniuj tel kualtsin nejin netetayokolil tein Jiova techmaka.

¿Keniuj uelis tiknextiskej ke tiktasojkamatij nochi tein Jiova uan Jesús toka kichiuaj uan kichiuaskej satepan? Se taman, keman titemakaj ika nochi toyolo totonaluan, tochikaualis uan okseki taman tein tikpiaj uan ika tiktekitiliaj Jiova uan tikinpaleuiaj oksekin maj kiixmatikan. Tinochin ueli tikchiuaj nejin, yeski tikpiaskej miak taman oso amo (1 Crón. 22:14; 29:3-5; Luc. 21:1-4).

Keniuj tapaleuiaj sekin maj mochiua itekiyo Dios noyampa taltikpak

Yekinika itatojtokakauan Cristo momattoyaj kixeloskej tepitsin tomin uan kitemakaskej itech nechikol. Itech totonaluan, miakej tokniuan no ijkon kichiuaj uan kitaliaj tomin itech kaxontsin tein yetok itech ininnechikol (1 Cor. 16:2). Sejse metsti, nechikolmej kititanij nejin tomin itech sucursal tein kinixyekana itech ininaltepeuj. Sayoj ke tejuatsin no uelis tikontitanis netetayokolil itech tokayit tein kikui sucursal tein taixyekana itech altepet kampa tionnemi. Komo tikonneki tikonmatis itech katiyejua tokayit uelis tikontitanis, xikontemo itech www.jw.org/ncj uan xiontanotsa oso xiontajkuilo. Maj tikitakan seki taman kemej tejuatsin uelis tiontemakas netetayokolil.

TEIN TITETAYOKOLIAJ

Tomin tein tikonpia itech banco uelis tikonpanoltis itokaykopa se sucursal oso uelis tikonchiuas ika tarjeta de débito oso crédito. Itech seki altepemej no ueli se kichiua ika jw.org oso okseko itech Internet.
Uelis tiontetayokolis tomin oso okseki taman tein tikonpia tein patiyoj. Komo ijkon, moneki tikonijkuilos se amat tein kinextis ke tiontetayokolia nejon uan amo tikonchia maj mitsonkepilikan.

TEIN UELIS SE TAJTANIS MAJ TEKEPILIKAN

Uelis tiontemakas tomin tein uelis tiontajtanis maj mitsonkepilikan komo moneki.
Xikonijkuilo se amat tein kinextia ke nejon se netetayokolil tein tiontajtanis maj mitsonkepilikan.

OKSEKI TAMAN NETETAYOKOLILMEJ

Maj tikitakan okseki taman kemej uelis titapaleuiskej maj mochiua itekiyo Dios noyampa taltikpak. Achto ke tikontemakas se netetayokolil, xiontajtani itech sucursal tein taixyekana itech altepet kampa tionnemi katiyejua netetayokolilmej uelis tiontemakas ompa. Kemej tanauatilmej mopataj itech se altepet uan okse, timitsonyolmajxitiaj xikontemo inepaleuil aksa akin kiixmati tanauatilmej tein ixyetok uan keniuj motaxtaua impuestos.

Seguro: Komo tikonpia se seguro de vida oso se plan de jubilación uelis tikonixtalis tokayit tein kikui sucursal itech moaltepeuj maj kiseli tomin tein kitemakaskej.

Tomin tein se kipia banco: Uelis tikonixtalis tokayit tein kikui sucursal itech moaltepeuj maj kitekitilti keman tionyoltos tomin tein tikonpia banco, tein mitsonmakaskej keman amo tiontekitisok oso se certificado de depósito. No uelis tikonijtos maj kiseli nejon tomin komo tionmomikilij. Sayoj ke moneki tikonchiuas kemej kijtouaj tanauatilmej itech altepet.

Acciones uan bonos: Uelis tikontayokolis se sucursal itech tokayit tein kikui itech moaltepeuj. No uelis tikonijkuilos se amat kampa tikonijtos ke tikonneki maj pano imako keman tionmomikilis.

Talmej oso kalmej: Komo tikonpia se kali oso se tal tein uelis monamakas, uelis tikonixtalis tokayit tein kikui sucursal itech moaltepeuj maj kiseli. Komo ompa tionnemi, uelis tikonixtalis ke ompa tikonsentokas tionnemis hasta keman tionmomikilis.

Netetayokolilmej ika renta: Uelis tikonixtalis maj kiseli tomin oso títulos valores tokayit tein kikui sucursal itech moaltepeuj uan tiontajtanis maj mitsonmakatokan tepitsin tomin xijxiujtika hasta keman tionmomikilis. Xa amo mitsontaxtaualtiskej seki impuestos itech xiuit keman tikontemakas netetayokolil.

Testamentos uan fideicomisos: Uelis tikonixtalis tokayit tein kikui sucursal itech moaltepeuj maj kiseli tomin tein tikonpia, se tal oso se kali tein moaxka ijkuak tionmomikilis. Uelis tikonchiuas iixpan se notario oso tikonamatalis maj kitekitiltikan hasta keman tejuatsin tikonixtalis. Nejin taman uelis tapaleuis keman tikonixtauas impuesto.

Komo tikonneki tikonmatis okseki taman kemej uelis tiontapaleuis maj mochiua itekiyo Dios noyampa taltikpak, xikonixtajtolti amaix Donaciones planificadas para favorecer el servicio del Reino en todo el mundo. Nejin amaix moajsi itech tajtol español uan inglés. Kemej tanauatilmej mopataj itech se altepet uan okse, uelis yeski ke seki taman amo monekis tikonchiuas. Satepan ke tikonixtajtoltis, timitsonyolmajxitiaj xikontemo inepaleuil aksa akin kiixmati tanauatilmej tein ixyetok uan keniuj motaxtaua impuestos. Miakej taltikpakneminij kitemakanij netetayokolilmej tein ika tapaleuiaj maj mochiua itekiyo Dios noyampa taltikpak uan kinpaleuiani keman taxtauaj impuestos. Komo nejin amaix motekitiltia itech altepet kampa tionnemi, uelis tikontajtanis tajkuilojkej itech monechikol maj mitsonmaka se.

Komo tikonneki tikonmatis okachi, xiontajtani itech sucursal tein taixyekana itech altepet kampa tionnemi.