Maj titanojnotsakan kemej nochin kiuelitaskej
1. ¿Toni techmachtia keman tikitaj ke yekinika itatojtokakauan Cristo tataman tanojnotsayaj?
1 Yekinika itatojtokakauan Cristo kinixmatiltiayaj kuali tanauatilmej taltikpakneminij akin kayomej itech tataman xolalmej uan pouiaj itech tataman taneltokalismej (Col. 1:23). Maski tanojnotsayaj ika sayoj se taman, iTekiuajyo Dios, kemej kiteixmatiltiayaj kipatayaj ijkon kemej kiajsikamatiskiaj akin kinkakiaj. Kemej neskayot, keman iniuan tajtouaya judíos, akin kitelpoujkaitayaj Tajkuilolmej, Pedro peuak kiniluia tein kijtoj tanauatijkej Joel (Hech. 2:14-17). Sayoj ke, itech Hechos 17:22-31 tikitaj ke Pablo taman kichiuak maj tanemilikan griegos. Axkan, taltikpakneminij itech seki xolalmej kipoujkaitaj Biblia, uan uelis nochipa tiktekitiltiskej keman titanojnotsaj kajkalpan. Sayoj ke, moneki tikpiaskej kuali taixejekolis keman titajtoskej iniuan akin amo kipoujkaitaj Biblia nion taneltokalis, oso iniuan akin amo pouij itech se taneltokalis kampa kijtouaj kitojtokaj Cristo.
2. ¿Keniuj uelis tiktemakaskej amaixmej uan ijkon tikinpaleuiskej akin kipoujkaitaj Biblia uan akin amo?
2 Maj kuali tiktekitiltikan amaixmej tein moixtaliaj maj tiktemakakan. Itech nejin xiujtekit, amaixmej tein tiktemakaskej itech tanojnotsalis mopatas ojome metstika, uan yeskij revistas, tratados uan folletos. Maski taltikpakneminij kampa titanojnotsaj amo kinekiskej tajtoskej ika Biblia, uelis sayoj ika titajtoskej se tamachtilis tein yejuan kiuelitaskej. Uan komo aksa kineki kimatis okachi, maski amo ika titajtojkej Biblia nion tikixtajtoltijkej se tajkuilol, moneki timokepaskej okse tonal uan tikpaleuiskej maj takuaujtamati iuan Dios uan itech iTajtol. Axkan, komo titajtouaj iniuan taltikpakneminij akin kipoujkaitaj Biblia, uelis ika tikinnojnotsaskej uan tikinmakaskej amaixmej tein kimelauaj tein kijtoua Biblia. No uelis tiktemakaskej amaix Tamachtia Biblia uan amaixmej Maj tikakikan Dios oso Maj tikakikan Dios uan tinemiskej nochipaya, maski amo ixyetos tiktemakaskej itech nejon metsti. Tein okachi moneki yejua maj titanojnotsakan kemej tapaleuis maj okachi kinekikan kiixmatiskej Jiova.
3. ¿Keyej moijtoua ke iyolo taltikpaknenkej tamati kemej tal kampa se tatoka?
3 Maj tiktemokan keniuj nochin uelis kiseliskej. Biblia kijtoua ke ininyolo taltikpakneminij tamati kemej tal kampa se tatoka (Luc. 8:15). Itech sekin moneki okachi timochikauaskej uan ijkon tamachtilis tein melauak tein moneskayotia kemej xinach, uelis ixuas uan moskaltis. Yekinika tanojnotsanij kuali kinkisak keman kinixmatiltiayaj tataman taltikpakneminij tamachtilis tein melauak, uan nejin kichiuak maj kuali momachilianij uan maj yolpakinij (Hech. 13:48, 52). Tejuan no uelis ijkon timomachiliskej komo tiktemouaj titanojnotsaskej kemej nochin kiuelitaskej.