Keniuj techpaleuia maj tisentekitikan kemej techixtalijkej itech tanojnotsalis
1. ¿Toni nepaleuil tein tikseliayaj itech Nemachtil ika Amaix itech Nechikol uelis tikseliskej iniuan oloch tokniuan akin iniuan tiixyetokej tisentanojnotsaskej?
1 ¿Tikonelnamiki seki taman tein mochiuaya itech Nemachtil ika Amaix itech Nechikol? Amo miakej mosentiliayaj uan kualtsin timomachiliayaj. Nejon tapaleuiaya maj tikinajsikan totasojikniuan akin techpaleuiayaj maj tikchikauakan totakuaujtamatilis (Prov. 18:24). Akin kiixyekanaya nemachtil kimatia tein tikpanotoyaj uan techyolchikauaya tisejsemej (Prov. 27:23; 1 Ped. 5:2, 3). Nejon nepaleuil uelis tikseliskejok itech grupo oso oloch tokniuan itech nechikol akin iniuan tiixyetokej tisentanojnotsaskej.
2. ¿Keniuj uelis tikinajsiskej totasojikniuan iniuan oloch tokniuan kampa tiixyetokej akin techpaleuiskej maj tikchikauakan totakuaujtamatilis?
2 Xionpeua tejuatsin. Oloch tokniuan akin iniuan tiixyetokej tisentanojnotsaskej amo miakej ijkon kemej katka keman tikpiayaj nemachtil ika amaix. Ijkuak tisentekitij iniuan okseki tokniuan itech tanojnotsalis, okachi kuali timouikan iniuan (Filip. 1:27). ¿Iniuan kanachi tokniuan akin pouij kampa tionixyetok tiontanojnotsaniya? ¿Uelis tionkisas iniuan nochin? (2 Cor. 6:13.) No uelis kemansa tikyoleuaskej semej tokniuan akin pouij kampa tiixyetokej, maj takuati oso maj youi itech Youak keman tiTaueyichiuaj kemej Kalyetouanij. Itech seki nechikolmej, seki oloch tokniuan akin ixyetokej sentanojnotsaskej moixpapataj kiyoleuaj maj takuati akin kinmakati tanojnots. Keman ajsi tonal, mosentiliaj uan sentakuaj uan mosenyolchikauaj, maski akin kitemakak tanojnots amo ueli iniuan yetok.
3. Itech oloch tokniuan kampa tiixyetokej, ¿keniuj uelis techpaleuis akin techixyekana?
3 Maski axkan sayoj ojpa timonechikouaj itech se semana, nejin amo kijtosneki ke tayekananij amo semi kinpaleuiskej tanojnotsanij maj kipiakan chikauak inintakuaujtamatilis iuan Dios. Akin kinixyekanaj seki oloch tokniuan kinixtaliaj maj kiyolchikauakan sejse tokniuj uan maj kipaleuikan keniuj tekitis itech tanojnotsalis. Komo akin kinixyekana oloch tokniuan kampa tionixyetok amo tanojnotsani mouan, uelis tikoniluis maj mouan kisa. Uan no, akin kiixyekana tanojnotsalis itech nechikol itamiampa semana itech se metsti tanojnotsa iniuan tataman oloch tokniuan. Itech nechikolmej kampa amo miakej, uelis kinkalpanos ojpa xiuit oloch tokniuan akin ixyetokej sentanojnotsaskej. ¿Tionmochikaua tiontanojnotsas keman akin kiixyekana tanojnotsalis itech nechikol kisa iniuan oloch tokniuan kampa tionixyetok?
4. 1) ¿Keniuj moneki mochiuaskej nechikolmej achtopa ijkuak tikisaskej tanojnotsalis? 2) ¿Keyej moneki tiknemiliskej titetaneujtiskej tochan maj ompa mochiua nechikol achtopa ke titanojnotsatiuij?
4 Tel kuali keman tataman oloch tokniuan monechikouaj seseko achtopa ijkuak kisaj tanojnotsatij itamiampa semana. Yekinika, kemej miakkan mosentiliaj itech sayoj se hora, tapaleuia maj tokniuan ajsikan itech hora keman mochiua nechikol uan yaskej itech xolal kampa moixtalij motanojnotsas. No, okachi amo ouij se kinixyekanas tanojnotsanij uan okachi niman ueli tikisaj. Uan no, akin kinixyekana se oloch tokniuan okachi ueli kinita nochin akin iuan ixyetokej. Maski ijkon, kemansa monekis mosentiliskej ome oloch tokniuan oso okachi. Komo nochi nechikol monechikoua uan youi tanojnotsati itech yekinika sábado tein kipia metsti oso ijkuak tami Nemachtil ika amaix Tanejmachtijkej, tapaleuis komo tanojnotsanij mosentaliaj iniuan akin ixyetokej uan maj akin kinixyekana kimakakan seki minuto uan ijkon kinxejxelos achtopa ijkuak tamis ika netataujtil uan tanojnotsatiuij. (Xikonita kampa kijtoua “¿Uelis tiontetaneujtis mochan?”)
5. Maski amo mochiuaok Nemachtil ika Amaix itech Nechikol, ¿toni kemaj tikyekmatij?
5 Maski amo mochiuaok Nemachtil ika Amaix itech Nechikol, Jiova kisentoka techmaka nochi tein techpaleuis maj tikchiuakan itanejnekilis (Heb. 13:20, 21). Kemej Jiova techyekpia, amo keman techpolos nion teyi (Sal. 23:1). Ika oloch tokniuan akin iniuan tiixyetokej tisentanojnotsaskej ueli tikseliaj miak tatiochiualismej. Yejua ika maj tejuan tipeuakan, uan maj tikelnamikikan ke akin “tatokas ika miak xinachtet, yejua nojon kajokuis miak takilot” (2 Cor. 9:6).
[Recuadro itech página 6]
¿Uelis tiontetaneujtis mochan?
Itech seki nechikolmej moneki mosennechikoskej tataman oloch tokniuan keman kisaj tanojnotsatij itamiampa semana porin amo onkak miakkan kani mosentiliskej. Nechikolmej tein mochiuaj achtopa ijkuak titanojnotsatij yejua se taman tein no ika timomachtiaj itech nechikol, yejua ika se ueyi tatiochiualis komo mochiua tochan. ¿Uelis tiontetaneujtis mochan? Amo xionmotsakuili sayoj porin xa amo ueyi mochan. Tayekananij kiitaskej kani moajsi uan okseki taman ijkon kemej kiitayaj ox itech se kali ueliskia mochiuas nemachtil ika amaix. Komo tikonuelitaskia tiontetaneujtis mochan, xikonilui akin kinixyekana oloch tokniuan kampa tionixyetok.