¿Toni techolinia maj titanojnotsakan?
1. ¿Toni tiknextiaj keman titanojnotsaj?
1 Se kiteixmatiltis kuali tanauatilmej ika iTekiuajyo Dios yejua okachi kuali tekit tein uelis tikchiuaskej axkan. Kemaj, ika nejin tekit tiknextiaj ke tiktakamatij ome tanauatilmej tein okachi tayekantokej: tiktasojtaskej Jiova uan tikintasojtaskej oksekin (Mar. 12:29-31). Netasojtalis yejua tein techolinia maj titanojnotsakan ika miak chikaualis (1 Juan 5:3).
2. ¿Keniuj tiknextiaj ke tiktasojtaj Jiova ika totanojnotsalis?
2 Tiktasojtaj Jiova. Panouaya kemej 6,000 xiujmej, Satanás semi kitakajkayauiliani Jiova. Yejua ika, netasojtalis tein tikpialiaj Jiova, akin okachi kuali toTasojikniuj, techolinia maj tiknextikan ke amo melauak tein kijtouilia (2 Cor. 4:3, 4). Ika itakajkayaualis Satanás, taltikpakneminij kinemiliaj ke Dios kintitani akin tajtakouaj maj tajyouitij miktan, ke yejuatsin se Trinidad akin amo akin ueli kiajsikamati uan ke amo ininka motekipachoua taltikpakneminij. Uan miakej hasta kijtouanij ke yejuatsin amo yekmelauj nemi. ¡Tikteluelitaskiaj maj yejuan yekmelauj kiixmatikan Jiova! Keman timochikauaj tikteixmatiltiskej, tikyolpaktiaj yejuatsin uan tikchiuaj maj amo kuali kisa tein Satanás kineki (Prov. 27:11; Heb. 13:15, 16).
3. ¿Keniuj totanojnotsalis kinextia ke tikintasojtaj oksekin?
3 Tikintasojtaj oksekin. Nochipa ke tejuan tiknojnotsaj aksa ika iTajtol Dios, tiknextiaj ke tiktasojtaj. Itech nejin tonalmej tein semi ouijkej, taltikpakneminij motelneki kikakiskej kuali tanauatilmej. Miakej tamatij kemej akin nemiaj Nínive itech itonaluan Jonás, “akin amo kimati[a]j kani moajsi[a] ininyekmay uan ininopochmay” (Jon. 4:11). Sayoj ke, ika totanojnotsalis tikinmachtiaj taltikpakneminij keniuj kuali nemiskej uan kipiaskej yolpakilis (Is. 48:17-19). Uan no, tikinnextiliaj ke onkak se nechialis (Rom. 15:4). Komo yejuan techkakij uan kichiuaj tein momachtiaj, Dios uelis “kinmakixtis” (Rom. 10:13, 14).
4. ¿Toni amo keman kielkauas Jiova?
4 Konemej amo kinnextiliaj inintatuan ke kintasojtaj sayoj itech seki tonalmej, ta yejuan mochikauaj nochipa kintasojtaskej. No ijkon, ueyi netasojtalis tein tikpialiaj Dios uan taltikpakneminij, techolinia maj titanojnotsakan keman yeski, amo sayoj keman ixyetok tikisaskej tanojnotsalis. Yejua ika, moneki nochipa titanojnotsaskej (Hech. 5:42). Komo ijkon tikchiuaj, Jiova amo keman kielkauas nejon netasojtalis (Heb. 6:10).