Yankuik nekuikatilmej tein ika tikueyichiuaj Jiova
1 Itech nechikol tein xijxiujtika kipia Watch Tower Bible and Tract Society of Pennsylvania, tein mochiuak itech tonal 4 metsti octubre xiuit 2014, motanauatij ke moixtalijtoya oksepa moitas amaix tein ika timokuikatiaj. Tikyekmatij ke nejon tanauatil semi teyolpaktij. Uan no, akin ompa moajsiaj kinelnamiktijkej ke motelneki timokuikatiskej iixpan Dios porin nejon se taman tein ika tikueyichiuaj Jiova (Sal. 96:2).
2 Sayoj ke ¿keyej moneki maj oksepa kiitakan amaix tein ika timokuikatiaj? Onkak miak taman keyej. Yekinika, porin axkan okachi kuali tikajsikamatij seki tajkuilolmej, yejua ika tajkuilol tein kipia xa monekis mopatas (Prov. 4:18). Uan ojpatika, kemej oksepa moitstok itech miak tataman tajtolmej Traducción del Nuevo Mundo (ingles), xa monekis mopatas seki tajtolmej tein kipia amaix tein ika timokuikatiaj porin mokixtijkej keman ayamo kiyektaliayaj. Uan no, kemej xa miak taman mopatas itech nejon amaix, moixtalij maj moajxitili okseki yankuik nekuikatilmej.
3 ¿Monekis timochiaskej maj mokixti amaix tein ika timokuikatiaj uan ijkon peuas tikuiskej yankuik nekuikatilmej? Amo, porin seki metsti satepan kisaskej sekin itech jw.org. Tepitsin satepan keman kisas se yankuik nekuikatil, timokuikatiskej keman tamis Nechikol tein Techmachtia iTekiyo Dios. Itech programa tein moitas nejon semana ixnesis itokay nekuikatil iuan tajtol: “yankuik nekuikatil”.
4 Keniuj timomachtiskej yankuik nekuikatilmej. Ouij techkisa tikelnamikiskej tein kijtoua se nekuikatil. Maski ijkon, tejuan tiknekij tikchiuaskej kemej akin kijkuiloj Salmo. Yejua kijtoj: “Maj nejua ueli nikuikati moueyitilis uan maj amo nitamatia” (Sal. 30:12). Tein tikitatij techpaleuis maj ueli timomachtikan yankuik nekuikatilmej uan maj timokuikatikan ika nochi toyolo.
Miakpa maj tikakikan nekuikatilmej tein moajsiskej itech jw.org. Nejin techpaleuis maj okachi niman timomachtikan tein kijtoua nekuikatil.
Maj timomachtikan tajkuilol uan maj timochikauakan tikelnamikiskej.
Miakpa maj timokuikatikan hasta maj kuali techkisa.
Maj timomamachtikan nekuikatilmej keman tikpiaskej toTaueyichiualis kemej Kalyetouanij, ijkon nochin kuali momachiliskej keman mokuikatiskej.
5 Itech seki metsti satepan, keman kisas se yankuik nekuikatil tein ika tamis Nechikol tein Techmachtia iTekiyo Dios, yekinika motalis maj kakisti tatsotson. Uan satepan timokuikatiskej kemej ipa tikchiuaj.
6 Tein melauj, titelyolpakij timokuikatiskej itech nechikol, porin ijkon tiksenueyichiuaj Jiova. Yejua ika, maj amo tikchiuakan okse taman keman ejko hora ijkuak timokuikatiaj itech nechikolmej.
7 Onkak okse taman tein uelis tikchiuaskej uan ijkon tiknextiskej ke tikitaj kemej se ueyi tatiochiualis timokuikatiskej. Itech Uejueyi nechikolmej, achto ke peuas tamachtilismej kualkan uan tiotak, kitaliaj maj kakisti tatsotson. Tokniuan akin tataman kayomej kichiuaj miak taman uan ijkon uelis kichiuaskej grabación ika nekuikatilmej tein tikuij keman tikueyichiuaj Jiova. Ojpa xiuit, youij Patterson (Nueva York) uan yejuan kiixtauaj tepos tein kikuij keman ompa youij. Yejua ika, keman akin kiixyekana ueyi nechikol techiluis maj timotalikan uan maj tikakikan tatsotson, moneki niman tikchiuaskej. Nejin techpaleuis maj tikyektalikan toyolo uan ijkon kuali tikakiskej tamachtilis tein motemakas (Esd. 7:10).
8 Nejin nechikol tamis ika se yankuik nekuikatil tein itokay “¡Maj uiki Tekiuajyot tein Dios kiixtalij!”. Nejin nekuikatil, tein moixnextij itech nechikol tein xijxiujtika kipia Watch Tower Bible and Tract Society of Pennsylvania, mochijchiuak porin ika moelnamiki cien xiujmej keman peuak taixyekana iTekiuajyo Dios.
9 Tikyekmatij ke yankuik nekuikatilmej pouij itech “ten kuali” taman tein Jiova techmaka (Mat. 12:35a). Maj tikixtalikan tikelnamikiskej tajkuilol tein kipia uan ijkon timokuikatiskej ika nochi toyolo. Ijkon tikueyichiuaskej uan tikueyitaliskej Dios kemej kinamiki (Sal. 147:1).