Maj tiksentokakan tiktemokan okachi kuali titanojnotsaskej
1. ¿Katiyejua neskayomej itech yekinika siglo kinextiaj ke moneki tiksentokaskej tiktemoskej okachi kuali titanojnotsaskej?
1 Akin tikchiuaj kemej Cristo moneki tiksentokaskej tiktemoskej keniuj okachi kuali titanojnotsaskej. Yejua ika, Jesús kinmachtij itatojtokakauan uan kinpaleuij maj okachi kuali tanojnotsakan (Luc. 9:1-5; 10:1-11). No ijkon kichiujkej Áquila uan Priscila keman okachi kuali kiajsikamatiltijkej Apolos “den ojtsin de Dios” (Hech. 18:24-26). Pablo no kiyolchikauak Timoteo, akin kiuikayaya miak xiujmej kemej tanojnotskej, maj kisentokani kitemo keniuj okachi kuali tamachtis, ijkon nochin kiitaskiaj ke ‘itakuautamatilis kachi momajxitijtiuʼ (1 Tim. 4:13-15). Maski tikuikaskejya miak xiujmej tikteixmatiltijtoskej kuali tanauatilmej oso amo, moneki tiksentokaskej tiktemoskej keniuj okachi kuali titanojnotsaskej.
2. ¿Toni uelis tikchiuaskej uan ijkon techpaleuis kemej tanojnotsaj okseki tokniuan?
2 Maj tikitakan keniuj kichiuaj oksekin. Se taman kemej uelis okachi kuali titanojnotsaskej yejua komo tikitaj keniuj kichiuaj oksekin (Prov. 27:17). Yejua ika, keman titanojnotsatiuij, maj kuali tikakikan keniuj peua tajtoua akin iuan titanojnotstokej. Uan no, maj tikiluikan akin kuali tanojnotsaj maj techiluikan keniuj kichiuaj uan maj kuali tikakikan tein techiluiskej (Prov. 1:5). ¿Techouijmaka oksepa titakalpanoskej, tikpeualtiskej nemachtilmej ika Biblia oso tikchiuaskej okse taman tein mouika iuan itekiyo Dios? Komo ijkon, maj titajtokan iuan akin kiixyekana oloch tanojnotsanij oso okse tokniuj akin kiuikaya miak xiujmej kemej tanojnotskej maj techpaleui. Maj no tikelnamikikan ke yektikatsin espíritu uelis techpaleuis maj okachi kuali titanojnotsakan. Yejua ika miakpa maj tiktajtanilikan Dios ijkuak timotataujtiaj (Luc. 11:13).
3. ¿Keniuj moneki titanankiliskej komo techmakaj se tayolmajxitilis, maski amo titajtankej?
3 Maj amo timoyolxokolikan komo techyolmajxitiaj maski amo titajtankej (Ecl. 7:9). Maj tiknextikan yolyemanilis uan maj timotasojkamatikan kemej kichiuak Apolos, uan maj tikselikan nochi nepaleuil tein techmakaskej. Komo ijkon tikchiuaj tiknextiskej tamatilis (Prov. 12:15).
4. ¿Keyej motelneki maj tiksentokakan tiktemokan okachi kuali titanojnotsaskej?
4 Okachi kuali titanojnotsaskej kiueyichiua Dios. Ika se neskayot, Jesús kinyolchikauak itatojtokakauan maj okachi kuali tanojnotsakan. Kijtoj ke yejua katka kemej se uvajtatok uan itatojtokakauan taixpejpenalmej katkaj kemej imajxiujyo tein kitemaka takilot, tein ipopaj kimaxijxima uan ijkon kitemakaskej okachi “takilome” (Juan 15:2, tejuan tiktalilijkej cursivas). Ijkon kemej akin iaxka se uvajtal kineki maj itatok kitemaka okachi takilot, Jiova no kineki maj tiksentokakan tiktemokan okachi kuali titanojnotsaskej (Heb. 13:15). ¿Toni kiualkuis komo timochiuaj okachi kuali tanojnotsanij? Jesús techiluia: “Nankiueyimouiskachiutinemi Notajtsin Dios kuak nankitemakaj miak takilome” (Juan 15:8).