Keniuj tikinmachtiskej tein yankuikej maj tanojnotsakan
1. ¿Keniuj tionmomachilij keman yekinika tiontanojnotsato?
1 ¿Tikonelnamiki keman yekinika tiontanojnotsato kajkalpan? Senkis tikneltokaj ke tionuiuiyokatoya. Sayoj ke ompa yetoya akin mitsonmachtij ika Biblia oso okse tanojnotskej uan tikonmatia ke mitsonpaleuiskia. Uan kemej tionmochiuakya se kuali tanojnotskej, axkan tejuatsin moneki tikonmachtis tein yankuikej maj tanojnotsakan.
2. ¿Toni moneki momachtiskej tein yankuikej?
2 Tein yankuikej moneki momachtiskej keniuj peuaskej tajtoskej kajkalpan, keniuj kitekitiltiskej Biblia, toni se kijtoua keman oksepa se takalpanoua uan keniuj se kiyekana se nemachtil ika Biblia. No moneki kimatiskej keniuj se tanojnotsa keman amo se tikchiua kajkalpan, kemej itech ojti oso kampa tanamakaj. ¿Keniuj uelis tikonpaleuis yejuan? Ika neskayot tein tikonkauilis uan ika tayolmajxitilis tein tikonmakas.
3. ¿Keniuj uelis tikinpaleuiskej oksekin ika neskayot tein tikauaj?
3 Ika neskayot. Jesús kinnextilij imomachtijkauan keniuj tanojnotsaskej (Luc. 8:1; 1 Ped. 2:21). No ijkon, keman tionkisas iuan se yankuik tanojnotskej, xikontemo itech amaixmej toni ika peuas tiontajtos. Sayoj ke moneki maj amo ouij uan tein no uelis kichiuas yejua. Uan keman nanajsiskej, tejuatsin xiontanojnotsa itech se oso ome kali uan ijkon yejua uelis kikakis. Ompa, keman nanyajtoskej itech okse kali, xikontajtani ox kiita ke tapaleuia tein ika tionpeua tiontajtoua. Nejon kipaleuis maj kiita keyej motelneki maj titekitikan imiuan oksekin, uan no okachi amo ouij kiselis keman tikoniluis kani kipoloua motekitilis satepan ke yejua tajtos.
4. ¿Keniuj uelis tikpaleuiskej se yankuik tanojnotskej satepan ke tikakiskej itanojnotsalis?
4 Xikonilui kani moneki motekitilis. Jesús no kiniluij imomachtijkauan keniuj tanojnotsaskej (Mat. 10:5-14). No ijkon xikonchiua. Keman tajtos yankuik tanojnotskej moneki kuali tikonkakis. Ijkuak nankisteuaskej, ika nochi moyolo xikonilui toni kuali kichiuak maski tikonitas ke seki taman amo kuali kichiuak. Ayamo teyi xikonilui kani kipoloj, okachi kuali xikonita itech okse kali ox kiyekchiuaya. Xa kipanok nejon porin uiuiyokatoya. No xikonelnamiki ke tataman tiuelij tikchiuaj se tekit, uan moajsi miak taman keniuj se kichiuas teisa uan nochi kuali yetok (1 Cor. 12:4-7).
5. ¿Toni uelis tikijtoskej keman tejuan tikiluiaj yankuik tanojnotskej kani moneki motekitilis?
5 Kemansa yejua tanojnotskej tajtanis toni amo kuali kichiuak. Uan komo amo, tejuatsin xikonilui ika yemanik tajtolmej. ¿Keniuj uelis tikonchiuas? Sekin kuali tanojnotsanij kijtouaj: “¿Uelis nimitsiluis se taman?”, oso “¿Keniuj tiknemilia ke mokakik motanojnotsalis?”. Oso no uelis moijtos: “Keman nejua peuak nitanojnotsa semi ouij ..., sayoj ke nechpaleuij ...”. Kemansa semi kuali maj se kisenita se taman tein kijtoua amaix Razonamiento. Sayoj ke amo xikonyolajxiti; sayoj xikonilui se taman tein kipoloua motekitilis keman tanojnotsa.
6. Keman ika titajtouaj tanojnotsalis, ¿keniuj se tepos motentia ika okse tepos?
6 Tepos motentia ika okse tepos. Timoteo katka se kuali tanojnotskej. Maski ijkon, Pablo kiiluij maj kisentokani motekitili itech itamachtilis uan maj moskalti espiritualmente (1 Tim. 4:13, 15). Maski panok miak xiujmejya keman peuak tiontanojnotsa, xikonsentoka xikonita keniuj okachi kuali tikonchiuas. Xikonita keniuj kichiuaj oksekin tanojnotsanij maski okachi yankuikej ke tejuatsin. Uan xikonsentoka xikonita keniuj tikonpaleuis ika netasojtalis tokniuan, uan okachiok tein yankuikej, maj kuali uelikan kitetapouikan iTekiuajyo Dios (Pro. 27:17).