TONEMILIS KEMEJ ITATOJTOKAKAUAN CRISTO
Maj tikpaleuikan itanauatiluan Jiova tein kinextiaj keniuj se monejnemiltis
Jiova Dios kinamiki maj kiixtali tein kinextia keniuj se monejnemiltis. Kemej neskayot, kiixtaliani maj nenamiktilis mochiua iuan se takat uan se siuat uan maj amo mokauakan (Mt 19:4-6, 9). Kitatsakuiltis akin kichiua tein yeski taman auilnemilis (1Co 6:9, 10, TNM). Hasta kiixtalia keniuj moneki motakentiskej uan mochijchiuaskej itekitikauan, tein kinextia ke amo monejnemiltiaj kemej oksekin kichiuaj (Dt 22:5; 1Ti 2:9, 10).
Itech totonaluan, miakej kiixtopeuaj itanauatiluan Jiova (Ro 1:18-32). Kikauaj maj kinmaua kemej miakej motakentiaj, kemej mochijchiuaj uan monejnemiltiaj. Amo pinauaj kitematiltiskej ke auilnemij uan kinijijtouaj akin amo kichiuaj kemej yejuan (1Pe 4:3, 4).
Itaixpantijkauan Jiova moneki tikpaleuiskej ika yolchikaualis itanauatiluan Dios tein kinextiaj keniuj se monejnemiltis (Ro 12:9). ¿Keniuj uelis tikchiuaskej? Keman tikmelauaj ika nejmachkayot uan ika poujkaitalis tein Dios kiyolpaktia, no keman timonejnemiltiaj kemej kijtouaj itanauatiluan. Kemej neskayot, keman tikixejekoskej keniuj timotakentiskej uan timochijchiuaskej, maj timotajtanikan: “¿Akoni nikaujtok maj nechixyekana: Jiova oso nejin taltikpak? ¿Kinextia kemej nimotakentia ke niktekitilia Dios?”. Oso keman tikixpejpenaskej película oso programa tein tikitaskej, semi kuali komo tiknemiliaj ox Jiova kuali kiita nejon, techpaleuia maj kuali timonejnemiltikan oso uelis kijtakos tokuali uikalis iuan Jiova (Sl 101:3). ¿Keniuj kijtakos nejon tokalyetouanij oso oksekin? (1Co 10:31-33).
¿Keyej semi moneki maj tikpaleuikan itanauatiluan Jiova tein kinextiaj keniuj se monejnemiltis? Porin amo uejkaua Jesucristo kinixpolos altepemej uan nochi tein amo kuali. Uan sayoj momakixtiskej akin kitakamatiskej Dios (Eze 9:4-7; 1Jn 2:15-17). Yejua ika, maj senkis tikpaleuikan itanauatiluan Dios uan ijkon akin kiitaskej ke kuali timonejnemiltiaj kiueyitaliskej Dios (1Pe 2:11, 12).
Kemej nimotakentia oso nimochijchiua, ¿kinextia ke niktakamati itanauatiluan Dios?
SATEPAN KE MOITAS VIDEO KUALI XIMOUIKA IUAN JIOVA: SE TAKAT UAN SE SIUAT, XIKONNANKILI NEJIN NETAJTANILMEJ:
¿Keyej moneki tiktakamatiskej itanauatiluan Dios?
¿Keyej tetatmej monekiskia kinmachtiskej ininkoneuan keman nojnelmejok itanauatiluan Dios?
¿Keniuj uelis telpochmej uan ichpochmej uan akin xiuejkejya kinpaleuiskej oksekin maj kiselikan tein Dios motenkaua kichiuas satepan?