Tein mokui keman tikitaj Tein timomachtiaj itech nechikol Tonemilis uan toTanojnotsalis
7-13 METSTI AGOSTO
TAMACHTILIS TEIN KIPIA BIBLIA | EZEQUIEL 28-31
Tein moixtajtoltia itech Biblia
(Ezequiel 29:1-12) Itech majtakti xiuit, itech majtakti metsti, itech tonal doce itech metsti, Jiova nechnojnotsak uan nechiluij: 2 “Ikoneuj taltikpaknenkej, xiknejmachti Faraón akin tekiuajti Egipto uan xikijto tein kipanos yejua uan nochi Egipto. 3 Xikijto nejin: ‘Yejua nejin tein kijtoua toTeko Jiova akin okachi Ueyi Taixyekankej: “Nimitsixnamikiti Faraón, akin titekiuajti Egipto, ueyi okuilin tein nemi itech ueyiat Nilo, akin kijtouani: ‘Ueyiat Nilo noaxka, nejua nimochijchiuilij’. 4 Uan nimitstalilis teposmej itech mokamak uan nikchiuas maj amichimej tein moajsij itech ueyiat Nilo mopepechokan itech mopaneuayo. Uan nimitskixtis itech ueyiat Nilo iniuan nochin amichimej tein ompa nemij tein mopepechouaj itech mopaneuayo. 5 Uan nimitssenkauas itech taluakyan tejua uan nochin amichimej tein nemij itech ueyiat Nilo tein moaxka. Tiuetsis itech ixtauat, uan amo mitsajokuiskej. Nimitstemaktis kemej inintakual koujtajtapialmej itech taltikpak uan totomej tein patanij. 6 Ompa nochin akin nemij Egipto monekis kimatiskej ke nejua niJiova, porin nepaleuil tein kimakak ichan Israel sayoj katka kemej se akat tein uakik. 7 Keman mitsmakitskijkej, tixamanik, uan tikajkolkopinak. Keman mouan kitemojkej nepaleuil, tipostekik, uan tikchiuak maj ininmetsuan uiuiyokakan”. 8 ”’Yejua ika, yejua nejin tein kijtoua toTeko Jiova akin okachi Ueyi Taixyekankej: “Xikita, nikualkuiti motech se espada, uan nikinixpolos takamej uan tapialmej tein ompa nemij. 9 Uan tal Egipto mokauas taseltijkan uan tepamit taxitinil; uan moneki kimatiskej ke nejua niJiova, porin yejua kijtoj: ‘Ueyiat Nilo noaxka, uan nejua nikchijchiuak’. 10 Yejua ika, nimitsixnamikiti tejua uan ueyiat Nilo tein moaxka, uan nikchiuas maj tal Egipto mokaua taseltijkan uan taluakyan, tein peuas Migdol hasta Siene uan hasta kampa tami Etiopía. 11 Nion se taltikpaknenkej uan nion se tapial ompa panos, uan itech cuarenta xiujmej amo akin ompa nemis. 12 Uan nikchiuas maj tal Egipto mokaua taseltijkan; uan ixolaluan mokauaskej taseltijkan okachi ke okseki xolalmej, cuarenta xiujmej; uan nikinmoyauas egipcios inintatajkoyampa altepemej uan nikinmoyauas itech taltikpak”.
14-20 METSTI AGOSTO
TAMACHTILIS TEIN KIPIA BIBLIA | EZEQUIEL 32-34
Tein moixtajtoltia itech Biblia
(Ezequiel 32:1-16) Uan itech xiuit doce, itech metsti doce, itech yekinika tonal itech metsti, Jiova nechnojnotsask uan nechiluij: 2 “Ikoneuj taltikpaknenkej, ximokuikati se nekuikatil ika tayokol ika tein kipanos Faraón akin tekiuajti Egipto, uan monekis tikiluis: ‘Tikatka kemej se tekuani chikauak itech altepemej, sayoj ke mitstamatilijkej. ”’Tikatka kemej se ueyi okuilin, tein tayoualojtinemi itech ueyiamej uan tikmoyauak amej ika mometsuan uan tikpitsotilij ueyiamej’. 3 ”Yejua nejin tein kijtoua toTeko Jiova akin okachi Ueyi Taixyekankej: ‘Inintechkopa miak altepemej tein mosentiliaj, niksouas motech nomatat uan mitsxoxolatsaskej ika nomatat. 4 Uan nimitssenkauas itech taltikpak. Nimitstamotas ompa ixtauat. Nikchiuas maj totomej tein patanij, motech moketsakan, uan nikchiuas maj koujtajtapialmej moka motamakakan. 5 Uan niktamotas monakayo itech tepemej uan nikpexontis ataujmej ika monakayo tein mokauas. 6 Uan niktoyauas moesyo itech taltikpak hasta itech tepemej; uan ueyiamej ika pexoniskej’. 7 ”‘Uan keman tiixpoliuis, nikpikis iluikak uan nikchiuas maj sitalimej amo petanikan. Uan tonaltsin, nikpikis ika mixti uan metsti amo kitemakas itanex. 8 Uan moka nikchiuas maj seuikan nochi tein kitemaka tanex itech iluikak uan taltikpak uan mokauas tayouayanijtik’, kijtoua toTeko Jiova akin okachi Ueyi Taixyekankej. 9 ”‘Uan nikinyolxokolis miak xolalmej keman nikinuikas itech okseki altepemej akin timoaxkatilij itech talmej tein amo tikixmatini. 10 Uan nikchiuas maj miak xolalmej motelmoujtikan, uan akin ompa tekiuajtij senkis momoujtiskej keman nikuiuitatsos ininixpan noespada, uan yejuan uiuiyokatoskej, sejse mouis maj kinmiktikan, itech tonal keman tiixpoliuis.’ 11 ”Porin yejua nejin tein kijtoua toTeko Jiova akin okachi Ueyi Taixyekankej: ‘Iespada akin tekiuajti ompa Babilonia mitsixnamikikiuj. 12 Nikchiuas maj akin tikinixyekana uetsikan ika ininespadas akin chikaujkej, altepet tein okachi amo teiknelia, nochi yejuan. Kitamiskej iueyinekilis Egipto, uan nochin akin kinixyekana kinixpoloskej. 13 Uan yekmelauj nikinixpolos nochin itapialuan tein moajsij ompakauin kampa ueyiamej tein kipia, uan nion se imets taltikpaknenkej oso iisti se tapial oksepa kisokiuis’. 14 ”‘Itech nejon tonalmej nikchipauas at, uan nikchiuas maj ueyiamej motalokan kemej aceite’, yejua tein kijtoua toTeko Jiova akin okachi Ueyi Taixyekankej. 15 ”‘Keman nikchiuas maj Egipto mokaua taseltijkan, se tal tein senkis amo teyi kipiasok, keman nikinixpolos nochin akin ompa nemij, ompa yejuan monekis kimatiskej ke nejua niJiova. 16 ”’Nejin se nekuikatil ika tayokol, uan taltikpakneminij mokuikatiskej. Hasta ininichpochuan altepemej mokuikatiskej. Yejuan mokuikatiskej ika tein kipanos Egipto uan nochin akin ompa nemij’, yejua tein kijtoua toTeko Jiova akin okachi Ueyi Taixyekankej”.
21-27 METSTI AGOSTO
TAMACHTILIS TEIN KIPIA BIBLIA | EZEQUIEL 35-38
Tein moixtajtoltia itech Biblia
(Ezequiel 35:1-15) Uan itajtol Jiova kisentokak nechnojnotsak uan nechiluij: 2 “Ikoneuj taltikpaknenkej, xikita tal tepeyoj tein poui Seír uan xiktematilti tein kipanos. 3 Moneki tikiluis: ‘Yejua nejin tein kijtoua toTeko Jiova akin okachi Ueyi Taixyekankej: “Nimitsixnamikiti tal tepeyoj tein poui Seír, uan nimomamelauas uan nikchiuas ximokaua taseltijkan. 4 Moxolaluan mokauaskej tepamit taxitinil, uan timokauas taseltijkan; uan moneki tikmatis ke nejua niJiova. 5 Porin senkis tikinixnamikik uan tikintemakak ikoneuan Israel ika espada, keman kinpanotoya tein amo kuali, keman kintatsakuiltijtoyaj”’. 6 ”‘Yejua ika, ijkon kemej yekmelauj ninemi, kijtoua toTeko Jiova akin okachi Ueyi taixyekankej, nikixtalij maj mitsajsi ixpoliuilis, uan ixpoliuilis mitstojtokas porin tiktauelitaya esti uan esti mitstemos. 7 Nikchiuas maj tepemej tein pouij Seír mokauakan taseltijkan, uan nikixpolos akin ompa panos uan akin mokepas. 8 Uan ika mikemej nikpexontis tepemej tein tikpia; uan akin kinmiktiskej ika espada uetsiskej itech tepemej tein tikpia uan itech ataujmej uan itech nochi ueyiamej tein tikpia. 9 Nikchiuas nochipa ximokaua taseltijkan, uan itech moxolaluan amo akin nemis; uan namejuan moneki nankimatiskej ke nejua niJiova.’ 10 ”Porin tikijtoua: ‘Nejin ome altepemej uan nejin ome talmej nimoaxkatilis, uan sejse tal timoaxkatiliskej’, keman Jiova ompa yetoya, 11 ‘yejua ika, ijkon kemej yekmelauj ninemi, kijtoua toTeko Jiova akin okachi Ueyi Taixyekankej, tein nimitschiuiliti nikchiuas ijkon kemej tikinnextilij mokualanyo uan nexikolot tein ika tikintauelitak; uan nimoteixmatiltis iniuan keman nikijtos tein mitsnamiki tikselis. 12 Uan moneki tikmatis ke nejua, Jiova, nikakini nochi motajtoluan tein ika tiknextij ke amo tikpoujkaitak tepemej tein kipia Israel, keman tikijtoj: “Mokauanij taseltijkan uan techmakanij kemej takual”. 13 Uan tiksentokak timoueyitalij ika motajtoluan uan tiksentokak tinechixnamikik ika miak tajtolmej. Nochi nikakini’. 14 ”Yejua nejin tein kijtoua toTeko Jiova akin okachi Ueyi Taixyekankej: ‘Nochi taltikpak yolpakis keman nikchiuas ximokaua taseltijkan. 15 Ijkon kemej tejua tiyolpakik keman ichan Israel mokauak taseltijkan, no ijkon moka nikchiuas. Nikchiuas ximokaua taseltijkan tal tepeyoj tein poui Seír, nochi Edom, uan yejuan monekis kimatiskej ke nejua niJiova’”.
28 METSTI AGOSTO HASTA 3 METSTI SEPTIEMBRE
TAMACHTILIS TEIN KIPIA BIBLIA | EZEQUIEL 39-41
Tein moixtajtoltia itech Biblia
(Ezequiel 40:32-47) Keman nechuikak kalixpan tein moajsia taijtikopa kampa ika este, kitamachiuak puerta uan itamachiuj katka kemej oksekin. 33 Kampa moajsiaj tajpianij, kalikximej tein moajsiaj inajnakastan uan ikalakyan kaltampa, inintamachiuj katka ijkon kemej oksekin, uan kipiaya ventanas inajnakastan uan ikalakyan kaltampa. Itamachiuj ueyak katka cincuenta molikmej uan patauak veinticinco molikmej. 34 Ikalakyan kaltampa ajsia hasta kalixpan tein moajsia kalampakopa, uan kalikximej tein moajsiaj inajnakastan kipiayaj taixkopimej ika palmeras uan chikueyi escalones teuikayaj ompa. 35 Ompa nechuikak itech puerta tein moajsia norte, uan kitamachiuak; itamachiuj katka kemej oksekin. 36 Kampa moajsiaj tajpianij, kalikximej tein moajsiaj inajnakastan uan ikalakyan, inintamachiuj katka ijkon kemej oksekin. Kipiaya ventanas inajnakastan. Itamachiuj ueyak katka cincuenta molikmej, uan patauak veinticinco molikmej. 37 Kalikximej tein kipiaya inajnakastan ajsiaj hasta kalixpan tein moajsia kalampakopa, uan kipiayaj taixkopimej ika palmeras uan chikueyi escalones teuikayaj ompa. 38 Uan kampa takuaj uan kampa kalakiaj moajsia ompakauin kampa kalikximej tein moajsiaj inajnakastan puertas. Ompa kipajpakayaj netemaktilmej tachichinolmej. 39 Itech se inakastan ikalakyan kaltampa moajsiaj ome mesas, uan itech okse inakastan okseki ome, kampa kimiktiayaj nemaktil tein ika kintapojpoluiskiaj inintajtakoluan uan ininnepololuan. 40 Kampa teuikaya itech puerta tein moajsia norte, moajsiaj ome mesas ikalakyan. No moajsiaj ome mesas oksekopa itech ikalakyan puerta. 41 Moajsiaj naui mesas inakastan puerta uan okseki naui itech okse inakastan, sennochia katkaj chikueyi mesas kampa kinmiktiayaj netemaktilmej. 42 Naui mesas kampa kinmiktiayaj netemaktilmej chijchiujtoya ika tet taalaxol. Itamachiuj ueyak katka se molik uan tajko, uan patauak se molik uan tajko, uan uejkapan se molik. Ompa kitaliayaj teposmej tein ika kinmiktiayaj netemaktilmej tachichinolmej uan netemaktilmej. 43 Kampa kitaliayaj seki taman, itamachiuj patauak katka se palmo menor, moajsiaj ikespan tepamit tein moajsia taijtikopa; uan nakat tein kitemakayaj kemej netetayokolil kitaliayaj itech mesas. 44 Kalampa puerta tein moajsia taijtikopa yetoya kampa takuayaj akin mokuikatiayaj, moajsia kalixpan tein yetoya taijtikopa, tein yetok inakastan puerta tein moajsia norte. Taixpankopa moitaya sur. Moajsi se kampa takuayaj inakastan puerta tein moajsia este. Taixpankopa moitaya norte. 45 Uan nechiluij: “Nejin kampa takuaj tein taixpankopa moita sur, kikuiskej tiopixkamej akin kiixyekanaj tekit itech templo. 46 Uan kampa takuaj tein taixpankopa moita norte kikuiskej tiopixkamej akin kiixyekanaj tekit itech altar. Ikoneuan Sadoc, akin ikoneuan Leví, akin ixyetokej maj motokikan iuan Jiova uan ijkon kitekitiliskej”. 47 Ompa kitamachiuak kalixpan tein moajsia taijtikopa. Itamachiuj ueyak katka cien molikmej, uan patauak cien molikmej uan cuadrado. Altar moajsia iixpan templo.