Tein mokui keman tikitaj Tein timomachtiaj itech nechikol Tonemilis uan toTanojnotsalis
2-8 METSTI OCTUBRE
TAMACHTILIS TEIN KIPIA BIBLIA | DANIEL 7-9
Tein moixtajtoltia itech Biblia
(Daniel 7:1-10) Itech yekinika xiuit keman Belsasar tekiuajtia Babilonia, keman Daniel kochtoya itech icama kikochitak seki taman ika inepaleuil Dios. Ompa kijkuiloj tein kikochitak, kijkuiloj nochi tein kiitak. 2 Daniel kijtoj: “Nitakochitstoya itech youak, uan ¡xikita!, naui ejekat tein moajsi iluikak kiajkotamotayaj ueyiat. 3 Uan naui uejueyi tapialmej peujkej kisaj itech ueyiat, sejse katka taman. 4 ”Yekinika tamatia kemej se tekuani, uan kipiaya iajtapaluan kemej se águila. Nikitak hasta keman kiuiuitilijkej iajtapaluan, uan kiajokkej itech taltikpak uan kichiujkej maj moketsa ika ome imetsuan kemej se taltikpaknenkej, uan kimakakej se yolo kemej tein kipia se taltikpaknenkej. 5 ”¡Uan xikita!, okse tapial, ojpatika, tamatia kemej se oso. Uan sekopa momaajoktoya uan ikamako kipiaya eyi elchikiuj omimej, uan kiluijkej: ‘Ximoketsa, xikua miak nakat’. 6 ”Satepan niksentokak nikitak, uan ¡xikita!, okse tapial, tein tamatia kemej se leopardo, sayoj ke ipanko kipiaya naui iajtapaluan kemej totot. Uan tapial kipiaya naui itsontekouan uan kimakakej tanauatil tein ika taixyekanaskia. 7 ”Satepan niksentokak nikitak keman nitakochitstoya itech youak uan ¡nikitak!, se naujpatika tapial, tein tel tamouilil uan semi chikauak uan kipiaya uejueyi itauan tachijchiuj ika tepos. Tatsonkuajkuajtiaya uan kikuechojtiaya, uan tein mokaujtiaya kitsojtsoniksaya. Semi taman katka ke nochi okseki tapialmej, uan kipiaya majtakti ikuaomiyouan. 8 Keman nikitstoya ikuaomiyouan, ¡xikita!, okse kuaomit tsikitsin, kisak tatajkoyampa uan eyi kuaomimej kiuiuitakej iixpan. Uan ¡xikita!, moajsiaj ixtololomej kemej iixtololouan se taltikpaknenkej itech nejin kuaomit uan kipiaya se itenoj tein kijtouaya tajtolmej tein ika moueyinekia. 9 ”Niksentokaya nikitaya hasta ijkuak motalijkej tronos uan Akin xiuejya itech Tonalmej motalij. Itaken katka istak kemej sekti uan itson katka kemej itojmiyo ichkat tein chipauak. Iikpal kipiaya tit; uan iruedas kipiaya tit tein chikauak xotatoya. 10 Moajsia se tit tein kisaya iixpan. Mil millares kisentokayaj kitekitiliayaj, uan majtakti mil panti majtakti mil kisentokayaj moajsiaj iixpan. Uan Tamelaujkej motalij, uan motapojkej amatajkuilolmej.
9-15 METSTI OCTUBRE
TAMACHTILIS TEIN KIPIA BIBLIA | DANIEL 10-12
Tein moixtajtoltia itech Biblia
(Daniel 11:28-39) ”Uan yejua mokepas ixolal ika miak taman tein patiyoj uan iyolo kiixnamikis netenkaualis tein yektik. Uan tein kichiuas kuali kisas uan mokepas ialtepeuj. 29 ”Itech tonal keman ixyetok oksepa ualas uan kiixnamikikiuj sur. Sayoj ke axkan amo kikisas kemej achto, 30 porin ibarcos Kitim kiixnamikiskej uan kipinaujtiskej. ”Yejua oksepa ualas uan kiixnamikis netenkaualis tein yektik uan tein kichiuas kuali kisas; uan yejua oksepa ualas uan mopaleuis iniuan akin kikauaj netenkaualis tein yektik. 31 Uan moajokuiskej tateuianij tein itech kisaskej; uan kipitsotiliskej kampa taueyichiuaj, tein kiyoualojtok tepamit, uan kijkuaniskej netemaktilmej. ”Uan ompa kitaliskej tein pitsotik tein taixpoloua. 32 ”Uan akin senkis kiixnamikij netenkaualis, kichiuaskej maj kinueyichiuakan oksekin tiotsitsin ika kualtsitsin tajtolmej tein amo melaujkej. Sayoj ke akin kiixmatij ininDios moyolchikauaskej uan kichiuaskej tein kuali. 33 Uan akin kipiaj taajsikamatilis akin pouij itech xolal, kinmachtiskej miakej. Uan kinuetsiltiskej ika espada uan ika tit, kinuikaskej okseko uan kinkuiliskej tein kipiaj, seki tonalmej. 34 Sayoj ke ijkuak kinuetsiltiskej, kinpaleuiskej tepitsin; uan miakej mosentiliskej iniuan porin kinnojnotsaskej ika kualtsitsin tajtolmej tein amo melaujkej. 35 Uan sekin akin kipiaj taajsikamatilis kinuetsiltiskej, uan ijkon moijkuanis tein amo kuali, uan motachipauas hasta keman ejkos tamilis; porin nejin mochiuas itech tonal keman ixyetok. 36 ”Tekiuaj kichiuas tein kinekis, uan moueyitalis uan kinextis ke okachi ueyichiujkej ke okseki tiotsitsin; uan kiixnamikis Dios akin okachi ueyi ke okseki dioses ika tajtolmej tein se kimoujkakaki. Uan nochi kuali kikisas hasta keman amo motematiltisok tatsakuiltilis, porin tein moixtaliani senkis mochiuas. 37 Amo kipoujkaitas ininDios itatuan; uan amo kipoujkaitas tein kinejnekij siuamej nion okse dios, ta senkis moueyitalis ininixpan nochin. 38 Sayoj ke kiueyichiua dios akin kipia tepanchikaualonimej; se dios tein itatuan amo kiixmatkej, kiueyichiuaskia ika oro uan plata uan temej tein kualtsitsin uan miak taman tein se kiyolnejneki. 39 Kuali kikisas keman kinuetsiltis tepanchikaualonimej, iuan se dios tein analtekojkayot. Yejua kinueyichiuas akin kiueyitaliaj uan kichiuas maj kinixyekanakan miakej; uan kinxejxelouilis tal ika taxtauil.
16-22 METSTI OCTUBRE
TAMACHTILIS TEIN KIPIA BIBLIA | OSEAS 1-7
Tein moixtajtoltia itech Biblia
(Oseas 7:1-16) “Keman yaya nikpajtiti Israel, itajtakol Efraín no monextij, uan iamo kuali tachiualisuan Samaria. Porin yejuan takajkayauaj; tachtekinij kalakij uan oloch tachtekinij taixnamikij kalampa. 2 Sayoj ke amo kijtouaj itech ininyolo ke nikelnamikis nochi tein amo kuali tein kichiuaj. Axkan tein kichiuanij kinyoualouani; senkis moajsi noixpan. 3 Kichiuaj maj tekiuaj moyolpakti ika tein amo kuali tein kichiuaj, uan ueyichiuanimej maj yolpakikan ika inintakajkayaualis. 4 Nochin yejuan auilneminij, kemej ijkuak se panchiujkej kixotaltia kampa kiyokxitia pan, akin amo kitatokiliaok satepan ke kiatilia pantixti hasta maj posoni. 5 Itech itonal totekiuaj, ueyichiuanimej kokolispeuanij... senkis kualaninij porin tayinij vino. Yejua momamelauani iniuan akin tepinaujtiaj. 6 Porin motokiaj ika ininyolo tein tamati kemej kampa kiyokxitiaj pan. Nochi youak panchiujkej kochi; kualkan kampa kiyokxitiaj pan chikauak xotatok. 7 Nochin yejuan xotatokej kemej kampa kiyokxitiaj pan, uan tekiuanij akin kinixyekanaj kinchichinouaj uan uetsinij; nion semej nechnotsani. 8 ”Efraín momanelouani iniuan altepemej. Efraín tamati kemej se pan youaltik tein amo moixkepani. 9 Analtekojkayomej kikuilianij ichikaualis, sayoj ke yejua amo kimati. Uan itson tein tenextik mokepani istak, sayoj ke yejua amo kimati. 10 Iueyinekilis Israel kiteluiliani, sayoj ke yejuan amo mokepanij iuan Jiova ininDios, uan amo no kitemouanij maski kipanouanij nochi nejin. 11 Efraín tamati kemej se uiltsin tein amo taixejekoua. Yejua kinotsani Egipto, yani iuan Asiria. 12 ”Kampa yeski yaskej, niktamotas inintech nomatat. Kemej totomej tein patanij iluikak nikinuetsiltis. Uan nikinmelauas ijkon kemej niknejmachtij inechikol. 13 ¡Tetayokoltijkej porin nechkauanij! ¡Ixpoliuiskej porin tajtakolchiuanij noixpan! Nejua niknekia nikinmakixtis, sayoj ke yejuan nechtakajkayauilianij. 14 Ika ininyolo amo nechtajtanijkej maj nikinpaleui, maski kisentokayaj tayokolchokayaj itech inincama. Motejtekij itech ininnakayo porin senkis kitemouaj inintatet uan inintayil; nechixnamikij. 15 Maski nikintatsakuiltij uan nikinyolchikauak, yejuan nechixnamikij uan kitemouaj kichiuaskej tein amo kuali. 16 Uan mokepkej, sayoj ke amo ika se taman tein okachi kuali; amo takuaujtamachmej kemej se arco tein kaxaltik. Ininueyichiuanimej kinmiktiskej ika espada porin taixnamikij ika inintajtoluan. Ika nejin kinpinaujtiskej itech tal Egipto.”
23-29 METSTI OCTUBRE
TAMACHTILIS TEIN KIPIA BIBLIA | OSEAS 8-14
Tein moixtajtoltia itech Biblia
(Oseas 8:1-14) “¡Xiktali itech motenoj se kuaomit! Uitsa se kemej se águila kiixnamikiki ichan Jiova, porin nankitapanauilianij tein nimotenkauak, uan amo nankitakamatinij notanauatil. 2 Kisentokaj nechnotsaj: ‘toTajtsin Dios, tejuan, Israel, timitsixmatij’.3 ”Israel kiixtopeuani tein kuali. Se akin kiixnamiki maj kitokatinemi. 4 Yejuan kiixtalianij tekiuanij, sayoj ke amo notechkopa. Kiixtalianij ueyichiuanimej, sayoj ke amo nikinixmatini. Ika ininplata uan ininoro kichijchiuanij tiotsitsin uan ika kinixpoloskej. 5 Kuakuejkonet tein moaxka kiixtopeuanij, Samaria. Semi nikualanini iniuan. ¿Hasta kemanian nankichiuaskej tein kuali? 6 Porin nejin kisak itech Israel. Kichijchiuak se akin tamachijchiua, uan amo Dios; porin ikuakuejkoneuj Samaria mochiuas koujmomox. 7 ”Porin ejekat tein kitokaj, uan se chikaujkaejekat tein kiseliskej. Nion se trigo kitemaka tatet tein chikauakya. Nion se taman tein ixua kitemaka harina. Komo ixua se, analtekojkayomej kitoloskej. 8 ”Israel kitoloskej. Axkan momaneloskej iniuan altepemej, kemej se vaso tein amo akin kineki. 9 Porin yejuan pankiskej Asiria, kemej se koujtajasno tein iselti nemi. Uan Efraín kikouani akin iniuan auilnemis. 10 Maski kinkouanij akin pouij itech altepemej, axkan nikinyoualos; peuas tajyouiskej porin tekiuaj uan ueyichiuanimej semi kintekitiltiskej. 11 ”Porin Efraín kichijchiuani miak altares kampa tajtakolchiua. Kipiani altares kampa tajtakolchiua. 12 Nikijkuilouilij miak taman tein kipia notanauatil; sayoj ke kiitakej kemej se taman tein amo kiixmatij. 13 Yejuan nechmakaj netemaktilmej kemej netetayokolilmej, uan yejuan kikuaj nakat, sayoj ke Jiova amo kiyolpaktia tein kichiuaj. Axkan yejua kielnamikis ininnepolol uan kintatsakuiltis porin tajtakolchiujkej. Yejuan mokepanij Egipto. 14 Israel kielkauani iTachijchiujkauj uan kichijchiuani templos; uan Judá, kichijchiuani miak xolalmej ika tepamit tein kiyoualoua. Sayoj ke niktitanis tit itech xolalmej, uan kichichinos sejse tepankalikxit tein kipiaj uejkapan kalmej tein kipia sejse xolal.”
30 METSTI OCTUBRE HASTA 5 METSTI NOVIEMBRE
TAMACHTILIS TEIN KIPIA BIBLIA | JOEL 1-3
Tein moixtajtoltia itech Biblia
(Joel 2:28–3:8) ”Satepan ke panos nejin, nikintitanilis noespíritu tataman taltikpakneminij, uan ininokichpipiluan uan ininsiuapipiluan kitematiltiskej tein panos satepan, akin xiuejkejya takochitaskej, uan telpochmej kiitaskej miak taman. 29 Uan notekitikauan takamej uan siuamej no nikintitanilis noespíritu itech nejon tonalmej. 30 ”Uan niknextis uejueyi neskayomej itech iluikak uan taltikpak, esti uan tit uan miak pokti pankisas. 31 Tonaltsin mokepas tayouayanilot uan metsti mokepas esti, achto ke ualas itonal Jiova, tein ueyi uan tein semi tamouilil. 32 Uan nochin akin kijtoskej itokay Jiova makisaskej; porin itech tepet Sión uan itech Jerusalén moajsiskej akin makisaskej, ijkon kemej kijtoj Jiova, uan akin makisaskej, Jiova kinnotsa.”
3 “Porin, ¡xikita!, itech nejon tonalmej uan itech nejon xiujmej, keman oksepa nikinualkuis Judá uan Jerusalén akin kinuikakej, 2 no nikinsentilis nochi altepemej uan nikchiuas maj temokan kampa amo tepeyoj tein iaxka Jehosafat; uan ompa nikitas tein kinnamiki kiseliskej, itokaykopa noxolal uan Israel tein noaxka, porin nankinmoyaujkej itech altepemej; uan nanmoxexelouilijkej notal. 3 Noxolal nanmotatanilijkej; se okichpil nankiixpatayaj ika se siuaauilnenkej uan nankinamakayaj se siuapil uan ika nankikouayaj vino tein nantayayaj. 4 ”Uan no, ¿keyej nanechixnamikij, Tiro uan Sidón uan nochi xolalmej tein nanpouij Filistea? ¿Ika nejon nanechtaxtauiaj? Komo nanechtaxtauijtokej, niman namechkepilis tein namechnamiki itech namotsontekon. 5 Porin nankikuikej noplata uan nooro, uan tikuikak itech motemplos nochi tein patiyoj tein nikpia; 6 uan xolal Judá uan Jerusalén tikinnamakiltij griegos, uan ijkon tikinuejkatilij itech inintal; 7 xikitakan, nikinyololiniti maj mokepakan kampa tikinnamakak, uan namechixtauilis tein nankichiuanij. 8 Uan nikinnamakas mookichpipiluan uan mosiuapipiluan imako xolal Judá uan kinnamakiltiskej takamej tein pouij Seba, se altepet tein uejka moajsi; porin yejua nejon tein kijtoua Jiova.