Tein mokui keman tikitaj Tein timomachtiaj itech nechikol Tonemilis uan toTanojnotsalis

4-10 METSTI DICIEMBRE

TAMACHTILIS TEIN KIPIA BIBLIA | SOFONÍAS 1 HASTA AGEO 2

Tein moixtajtoltia itech Biblia

(Ageo 2:1-14) Itech metsti chikome, itech tonal veintiuno itech metsti, Jiova kinojnotsak tanauatijkej Ageo, uan kiluij: ² “Ika kualtakayot, xiktajtani Zorobabel ikoneuj Sealtiel, akin taixyekana Judá, uan tayekankatiopixkat Josué ikoneuj Jehozadaq, uan akin mokauajok itech xolal: ³ ‘¿Akoni moajsiok akin kiitaka iueyi kualtsinyot nejin kali? ¿Keniuj nankiitaj axkan? ¿Nion tepitsin moita kemej achto?’. ⁴ ”‘Sayoj ke axkan ximoyolchikaua Zorobabel, kijtoua Jiova, uan ximoyolchikaua tayekankatiopixkat Josué ikoneuj Jehozadaq.’ ”‘Uan ximoyolchikauakan nochin namejuan uan xitekitikan, kijtoua Jiova.’ ”‘Porin nejua niyetok namouan, kijtoua Jiova akin kinixyekana tateuianij. ⁵ Xikelnamikikan tein nimotenkauak namouan keman nankiskej Egipto, uan noespíritu kisentoka namouan. Amo ximouikan’”. ⁶ “Porin yejua nejin tein kijtoua Jiova akin kinixyekana tateuianij: ‘Amo uejkaua, oksepa, niktsetseloti iluikak, taltikpak, ueyiat uan tal uakik’. ⁷ ”‘Uan nikintsetselos nochin altepemej uan kualtsitsin taman tein moajsij itech nochi altepemej kalakiskej; uan nikpexontis ika ueyipanchiualis nejin kali’, kijtoua Jiova akin kinixyekana tateuianij. ⁸ ”‘Plata noaxka, uan oro noaxka’, kijtoua Jiova akin kinixyekana tateuianij. ⁹ ”‘Okachi kipias ueyipanchiualis nejin kali ke tein achto yetoya’, kijtoua Jiova akin kinixyekana tateuianij. ”‘Uan nikchiuas maj nikan onka yolseuilis’, kijtoua Jiova akin kinixyekana tateuianij.” ¹⁰ Itech tonal veinticuatro itech metsti chiknaui, itech ojpatika xiuit keman Darío tekiuajtitoya, Jiova kinojnotsak tanauatijkej Ageo uan kiluij: ¹¹ “Yejua nejin tein kijtoua Jiova akin kinixyekana tateuianij: ‘Ika kualtakayot, xikintajtani tayekankatiopixkamej nejin tein kinextia tanauatil: ¹² “Komo se takat kiuika nakat tein yektik itech itaken uan itaken mokuiltia pan oso takual, vino oso aceite oso tein yeski tapalol, ¿mochiuas yektik?”’”. Uan tiopixkamej tanankilijkej: “¡Amo!”. ¹³ Uan Ageo tajtanik: “Komo aksa amo moajsi chipauak porin kimatokak se miket uan kimatoka semej nejin taman, ¿mopitsotilis?”. Uan tiopixkamej tanankilijkej: “Mopitsotilis”. ¹⁴ Ompa Ageo kijtoj: “‘Ijkon moajsi nejin xolal uan ijkon moajsi nejin altepet noixpan, kijtoua Jiova, uan ijkon moajsi nochi tein kichiuaj. Nochi tein ompa kiuikaj, pitsotik’.

11-17 METSTI DICIEMBRE

TAMACHTILIS TEIN KIPIA BIBLIA | ZACARÍAS 1-8

Tein moixtajtoltia itech Biblia

(Zacarías 8:14-23) ”Porin yejua nejin tein kijtoua Jiova akin kinixyekana tateuianij: ‘“Ijkon kemej nikixtalijka namechtatsakuiltis porin nanmouejkaujtatuan nechkualantijkej, kijtoua Jiova akin kinixyekana tateuianij, uan amo nechyolkokoj, ¹⁵ no ijkon axkan nikixtaliani nikchiuilis tein kuali Jerusalén uan no kalyetouanij Judá. Amo ximouikan”’. ¹⁶ ”‘Yejua nejin tein moneki nankichiuaskej: Amo xikajkayauakan nanmokniuj, uan keman nantamelauaskej nanmokaltenoj moneki nankichiuaskej ika melaujkayot uan yolseuilis. ¹⁷ Amo xikyolnemilikan nankinchiuiliskej tein amo kuali oksekin, uan amo xiktasojtakan se netenkaualis tein amo melauak; porin nochi nejin nikteltauelita’, kijtoua Jiova.” ¹⁸ Uan Jiova akin kinixyekana tateuianij kisentokak nechnojnotsak, uan kijtoj: ¹⁹ “Yejua nejin tein kijtoua Jiova, akin kinixyekana tateuianij: ‘Keman nanmosauaj itech naujpatika metsti, itech makuiltika metsti, itech chikometika metsti, uan majtaktika metsti, mochiuaskej tonalmej keman ichan Judá yolpakis uan iluitis. Yejua ika, xiktasojtakan tein melauak uan yolseuilis’. ²⁰ ”Yejua nejin tein kijtoua Jiova, akin kinixyekana tateuianij: ‘Xolalmej uan akin nemij itech xolalmej ualaskej; ²¹ uan akin nemij itech se xolal yaskej itech okse, uan kijtoskej: “Maj senkis tiyakan tiktajtanitij Jiova maj techikneli uan maj tiktemokan Jiova akin kinixyekana tateuianij. Nejua no niyas”. ²² Uan miakej xolalmej uan uejueyi altepemej kitemokiuij nikan Jerusalén maj kinikneli Jiova akin kinixyekana tateuianij’. ²³ ”Yejua nejin tein kijtoua Jiova, akin kinixyekana tateuianij: ‘Itech nejon tonalmej majtakti takamej akin tajtouaj tataman tajtolmej tein mokuij itech altepemej kikitskiskej, kemaj, chikauak kikitskiskej itaken se judío, uan kijtoskej: “Tiknekij tiyaskej namouan, porin tikakinij ke Dios yetok namouan”’”.

18-24 METSTI DICIEMBRE

TAMACHTILIS TEIN KIPIA BIBLIA | ZACARÍAS 9-14

Tein moixtajtoltia itech Biblia

(Zacarías 12:1-14) Tein motematiltia: “Itajtol Jiova tein kiluia Israel, kijtoua Jiova, Akin kipatauak iluikak uan kuali kiixtalij keniuj chijchiujtos taltikpak, Akin kichiuak maj taltikpaknenkej kipia chikaualis. ² Nikchiuati maj Jerusalén mochiua kemej se copa tein ika ixtayouaskej xolalmej tein ompakauin moajsij; uan Judá kiyoualoskej uan no ijkon Jerusalén. ³ Itech nejon tonal nikchiuas Jerusalén kemej se tet etik itech nochi xolalmej. Nochin akin kiajokuiskej motelkojkokoskej; uan nochin altepemej noyampa taltikpak kiixnamikiskej. ⁴ Itech nejon tonal, kijtoua Jiova, nikchiuas maj nochin caballos motelmoujtikan uan maj kuatapolokan akin youij ininpanko. Uan nikitas kali Judá, uan nikinixpojpolos nochin caballos tein moajsij itech xolalmej. ⁵ Uan tayekananij ompa Judá moyoliluiskej: ‘Akin nemij Jerusalén nechchikauaj itechkopa Jiova akin kinixyekana tateuianij’. ⁶ Itech nejon tonal nikchiuas maj tayekananij ompa Judá mochiuakan kemej komit tein yetok tikoijtik uan kemej tit tein chikauak xotatok itech imakoujyo tatet, uan kinixpoloskej nochin xolalmej tein moajsij ininyekmakopaka uan ininopochmakopaka; uan oksepa nemiskej ompa Jerusalén. ⁷ ”Uan Jiova achto kinmakixtis itakenkaluan Judá, ijkon ikualtsinyo ichan David uan ininkualtsinyo akin nemij Jerusalén amo kitaniskej Judá. ⁸ Itech nejon tonal, Jiova moajsis kemej se nepaleuil tein kiyoualojtos Jerusalén; itech nejon tonal akin amo chikauak mochiuas kemej David, uan ichan David kemej Dios, kemej iángel Jiova tein youi ininixpan. ⁹ Uan itech nejon tonal senkis nikinixpolos nochin altepemej tein kiixnamikij Jerusalén. ¹⁰ ”Uan nikchiuas maj ichan David uan akin nemij Jerusalén kitemokan teiknelilis uan maj motataujtikan, uan kiitaskej akin kikoyonijkej, uan kitayokolchokiliskej kemej ijkuak kitayokolchokiliaj se ininkonetsin akin sayoj se uan momikilia; uan chikauak tayokoyaskej kemej ijkuak momikilia se ininkonetsin akin tayekana. ¹¹ Itech nejon tonal, chikauak tayokolchokaskej ompa Jerusalén, kemej ijkuak tayokolchokakej ompa Hadadrimón itech ixtauat Meguidó. ¹² Uan tal tayokolchokas, sejse kalyetouanij; ikalyetouanij David ininselti uan sejse siuat tein ompa poui; ikalyetouanij Natán ininselti uan sejse siuat tein ompa poui; ¹³ ikalyetouanij Leví ininselti uan sejse siuat tein ompa poui; ikalyetouanij Simeí ininselti uan sejse siuat tein ompa poui; ¹⁴ uan nochin kalyetouanij tein mokauaj uan sejse siuat tein ompa poui.

25-31 METSTI DICIEMBRE

TAMACHTILIS TEIN KIPIA BIBLIA | MALAQUÍAS 1-4

Tein moixtajtoltia itech Biblia

(Malaquías 1:1-10) Tein motematiltia: Itajtol Jiova tein kiluij Israel itenkopa Malaquías: ² “Namechtasojtani”, kijtoua Jiova. Sayoj ke nankijtouaj: “¿Keniuj tiknextiani ke titechtasojta?”. “¿Amo katka Esaú iikniuj Jacob?, kijtoua Jiova. Sayoj ke niktasojtak Jacob, ³ uan Esaú niktauelitak; uan nikchiuak maj mokaua taseltijkan tepemej tein iaxka uan koujtaj itskuimej tein nemij taluakyan nikinmakak ital.” ⁴ “Porin Edom kijtoua: ‘Techixpolouanij, sayoj ke timokepaskej uan tikyekchijchiuaskej tein kixitinijkej’, yejua nejin tein kijtoua Jiova akin kinixyekana tateuianij: ‘Yejuan tachijchiuaskej, sayoj ke nejua nitaxitinis, uan kintokaytiskej “tal kampa mochiua tein amo kuali” uan “taltikpakneminij akin Jiova kintatsakuiltiani nochipaya”. ⁵ Moixtololouan kiitaskej uan tikijtos: “Maj Jiova kiueyitalikan itech tal kampa poui Israel”’.” ⁶ “‘Se konetsin kipoujkaita ipopaj, uan se takeual iteko. Yejua ika, komo nejua nitePopaj, ¿keyej amo nanechpoujkaitaj?ʼ Uan komo nejua nanmoteko, ¿keyej amo nanechmoujkatokaj?ʼ, namechiluia Jiova akin kinixyekana tateuianij namejuan tiopixkamej akin nankiixtopeuaj notokay. ”‘Sayoj ke nankijtouaj: “¿Keniuj tikixtopeuanij motokay?”.’ ⁷ ”‘Keman nankitaliaj itech noaltar pan tein pitsotik.’ ”‘Uan nankijtouaj: “¿Keniuj timitspitsotilianij?”.’ ”‘Keman nankijtouaj: “Imesa Jiova yejua se taman tein moneki se kiixtopeuas”. ⁸ Uan keman nankitemakaj se tapial tein amo tachia kemej netetayokolil, nankijtouaj: “Amo kipia tein amo kuali”. Uan keman nankitemakaj se tapial koxoj oso tein mokokoua, nankijtouaj: “Amo kipia tein amo kuali”.’” “Xikyejyekokan nankiuikiliskej, ika kualtakayot, nanmotaixyekankauj. ¿Kiyolpaktis tein nankimakaskej oso kuali namechselis?” kijtoua Jiova akin kinixyekana tateuianij. ⁹ “Uan axkan, ika kualtakayot, xiktataujtikan Dios maj namechnextili teiknelilis. Ika nejon netetayokolilmej tein nankitemakaj, ¿namechselis ika teiknelilis?”, kijtoua Jiova akin kinixyekana tateuianij. ¹⁰ “¿Uan akoni kitsakuas puertas? Porin namejuan amo nantaxotaltiskej itech noaltar sayoj nenkaj. Amo nanechyolpaktiaj, kijtoua Jiova akin kinixyekana tateuianij, uan amo nechyolpaktia nion se netetayokolil tein nankitemakaj.”