Tein mokui keman tikitaj Tein timomachtiaj itech nechikol Tonemilis uan toTanojnotsalis
4-10 METSTI MARZO
TAMACHTILIS TEIN KIPIA BIBLIA | ROMANOS 12-14
“Maj titetasojtakan kemej Cristo”
“Xiksentokakan ximotasojtatiyakan [...] keme nochi naniknime”
5 ¿Keniuj moneki tikintasojtaskej tokniuan? Netasojtalis tein moneki tikinpialiskej tokniuan yejua tein tikinpialiaj tochankauan oso totasojikniuan (Juan 11:36). Yejua ika akin tikchiuaj kemej Cristo amo sayoj tikijtouaj ke moneki timotasojtaskej kemej yeskia tiiknimej, ta yekmelauj tiiknimej (Mat. 23:8). Pablo kijtoj: “Ximotasojtatiyakan se uan okse ika ueyi yoltetasojtalis de totasojikniuan. Uan no ximofuerzajuikan de ximomouiskapoutinemikan se uan okse ika ueyi chipaukamouisyot” (Rom. 12:10). Nejin tajtolmej kinextiaj ke moneki tikinteltasojtaskej tokniuan. Komo timotasojtaj kemej iknimej uan kemej Cristo technextilij, okachi kuali timouikaskej uan amo tixexeliujtoskej.
6 Se taixmatkej kijtoua ke akin kichiuaj kemej Cristo sayoj yejuan okachi kijtouaj itech ininamaixuan maj se motasojta kemej iknimej. Ne uejkauj, judíos sayoj kiluiayaj “nokniuj” ininchankauan oso seki inintasojikniuan. Amo keman kiluiayaj “nokniuj” akin amo katka judío. Sayoj ke akin yekmelauj kichiuaj kemej Cristo, kinitaj kemej ininikniuan nochin itekitikauan Jiova maski okseko kayomej (Rom. 10:12). Yejua ika, tinochin timotasojtaj kemej yekmelauj tiiknimej, porin yejua nejon techmachtiani Jiova (1 Tes. 4:9). Sayoj ke ¿keyej motelneki maj tiksentokakan timotasojtakan kemej iknimej?
“Yek melau ma titetasojtakan ika nochi ten tikchiutinemij”
14 Maj kuali timouikakan iniuan oksekin. Moneki timochikauaskej kuali timouikaskej iniuan tokniuan maski tikitaskej ke techchiuilijkej tein amo kuali oso ke taman moajsikamatik tein tikchiujkej oso tikijtojkej (xikonixtajtolti Romanos 12:17, 18). Komo tikyolxokoliaj aksa, moneki tikiluiskej maj techtapojpolui, sayoj ke moneki tikchiuaskej ika nochi toyolo. Kemej neskayot, maj amo tikiluikan: “Amo niknekia ximokuejmolo”, ta moneki tikijtoskej ke no tejuan totajtakol uan tikiluiskej: “Amo niknekia nimitsyolxokolis ika tein nikijtoj”. Namikuanij okachi moneki maj kuali mouikakan. Amo kuali yeskia maj kinextikan ke motasojtaj keman kinitstokej, sayoj ke kalijtik nion monotsaj, moiluiaj amo kuali tajtolmej oso hasta moteuiaj.
w07 1/7 pág. 24 § 12, 13
Maj amo timomakepakan keman techchiuiliaj tein amo kuali
12 Pablo techyolchikaua maj tikinchiuilikan tein kuali tokniuan uan oksekin. Yejua kijtoj: “Keme aksame namechchiuiliaj tensa ten amo kuali, ijkuakon namejuan amo no ijkon xikinixnamikikan”. Achto, no kijtoj okse tayolmajxitilis: “Xiktauelitstiyakan nochi tataman chiualisme den amokuali”. Yejua ika, komo timomakepaj amo uelis tikijtoskej ke tiktauelitaj tein amo kuali. Nejon kinextiskia ke titetasojtaskiaj “ika ne taixkajkayaualis”. Pablo no kijtoj ke moneki tikchiuaskej “sayo ne ten in taltikpakuani kipouaj ten kuali chiualis” (Romanos 12:9, 17). ¿Keniuj uelis tiktakamatiskej nejin tayolmajxitilis?
13 Pablo kijkuilojkaya amat tein kintitanilij tokniuan akin nemiaj Corinto, kampa kijtouaya nejin keman tatitanilmej kintajyouiltijtoyaj: “Dios techtenextilijtok inauak in ángeles uan no inauak in taltikpakuani [...]. Uan kuak in tagayot techtejtelchiuayaj, ijkuakon tejuan tikinmouiskanankiliayaj. Uan kuak in tagayot techtokatinemiaj para techmiktiskiaj, ijkuakon tejuan nochi titaxikoayaj. Uan kuak in tagayot techtejteneuayaj, ijkuakon tejuan tikinnejmachnojnotsayaj” (1 Corintios 4:9-13). Nochin taltikpakneminij kiitaj tein tikchiuaj akin yekmelauj tiitatojtokakauan Cristo. Kemansa, okachi kuali techkakij keman kiitaj tein kuali tein tikchiuaj hasta keman techchiuiliaj tein amo kuali (1 Pedro 2:12).
Maj timotapojpoluikan se iuan okse
13 Kemansa, uelis tikinpaleuiskej maj kinekikan kikakiskej iTajtol Dios akin techyolxokoliaj. Tatitanil Pablo kijkuiloj: “‘Komo akin mitstauelita mayana, xiktamaka; komo amiki, xikmaka at; porin komo ijkon tikchiua, tiksentilijtos tekol tein xotatok itech itsontekon’. Amo ximokaua maj mitsxijxiko tein amo kuali, ta xiksentoka xikchiua tein kuali uan ijkon tikxijxikos tein amo kuali” (Rom. 12:20, 21, TNM). Komo kuali tiknankiliaj akin amo techyeknankilia, uelis kipatas itanemilil uan hasta uelis moyolseuis. Komo tejuatsin tikonajsikamati uan tikoniknelia akin mitsonyolxokolij, xa uelis tikonpaleuis maj kiseli iTajtol Dios. Kiselis tamachtilis oso amo, komo kuali tiknankiliaj, kipaleuis maj kinemili keyej amo tikualanij (1 Ped. 2:12; 3:16).
Maj tiktemokan tamachtilis ika nejmachkayot
Keniuj uelis tikmatiskej katiyejua neixpetanilis tein kuali
5 Kemej tikitaj, nochi tein tikchiuaj itech tonemilis, mouika iuan itekiyo Jiova. Pablo kinextij nejon keman kinijkuilouilij itatojtokakauan Cristo nejin tajtolmej tein tetanemililtij: “Xiktemakakan namonakayo kemej se nemaktil yoltok, yektik, tein kiselia Dios, yejua nejin kijtosneki se kiueyichiuas Dios uan se kitekitiltis se itanemilil” (Romanos 12:1, NM). ¿Toni kijtosnekia Pablo keman ika tajtoj tonakayo? Kijtosnekia nochi kemej se yetok, tein iuantia totanemilil, toyolo uan tochikaualis (Marcos 12:30). ¿Uan keniuj tiktemakaj tonakayo kemej se nemaktil oso se netetayokolil? Keman tiktekitiliaj Dios ika nochi kemej se yetok. Tajtol “nemaktil” oso netetayokolil tein mokui nikan, techtanemililtia. ¿Keyej? Porin Tanauatil tein kiselij Moisés, kiniluiaya maj amo kitemakanij tapialmej tein mokokouayaj porin Dios amo kiseliaya (Levítico 22:18-20). No ijkon axkan, komo se akin kichiua kemej Cristo, inemaktil oso itaueyichiualis tein kimaka Jiova kipia tein amo kuali, yejuatsin amo no kiselia. ¿Toni uelis kichiuas maj totaueyichiualis amo kiseli Jiova?
6 Pablo kiniluij itatojtokakauan Cristo tein nemiaj Roma: “Amo xiktemaktijtiyakan ok namotakayo [oso namonakayo] tech in tajtakol” (tein kijtosneki, “niose taman tein nankipiaj itech namonakayo”, kemej kijtoua Biblia La Palabra de Dios para Todos). No kiniluij maj ‘kimiktianij tachiualismej tein eua itech imin nakayo’ (Romanos 6:12-14; 8:13, NM). Tepitsin achto, ipa ika tajtojkaya seki taman tein kipia tonakayo, uan kijtoj keniuj miakej kikuij uan ika kichiuaj tein amo kuali. Keman ika tajtoj tajtakolchiuanij, kijtoj: “Ninten den taltikpaktakaj [...] ualkistok miak tensa pitsotik”. “Taltikpaktakaj moijsiuilijtinemij [ika imin metsuan] para keniuj temiktijtinemiskej.” “Amo no kiyolnemiliaj de kiyolmouiliskej Totajtsin Dios.” (Romanos 3:13-18.) ¿Toni panoskia komo se akin kichiua kemej Cristo, kikui semej tein kipia itech inakayo uan ika kichiua tajtakolmej kemej nejon? Yejua kipitsotilijtoskia nochi inakayo. Se neskayot, komo maski kimattok ke amo kuali, kiita tamouisolmej tein pitsotikej, xa kampa moita auilnemilis oso tateuilis, ‘kitemaktijtoskia [iixtololo] itech tajtakol’ uan kipitsotilijtoskia nochi inakayo. Uan amo ueliskiaok kitemakaskia inakayo oso itaueyichiualis kemej se nemaktil oso netetayokolil tein kiselia Dios, porin amo yektik oso amo chipauak eskia (Deuteronomio 15:21; 1 Pedro 1:14-16; 2 Pedro 3:11). Kemej tikitaj, ¡kijtakoskia inemaktil oso inetetayokolil porin amo kuali kiixpejpenak ineixpetanilis!
w08 15/6 pág. 31 § 4
Tein moixtajtoltia itech amatajkuilol Romanos
13:1. ¿Keyej moijtoua ke “tataman tekiuani Dios ijkon kintalij ya”? Tekiuanij taixyekanaj porin Dios kinkaua. Keman yejuatsin kijtoj ke moajsiskiaj seki tekiuajyomej uan keman kichiuak maj moijkuilo itech Biblia tein kinpanoskia seki tekiuanij, uelis moijtos ke “tataman tekiuani Dios ijkon kintalij ya”.
11-17 METSTI MARZO
TAMACHTILIS TEIN KIPIA BIBLIA | ROMANOS 15, 16
“Jiova techpaleuia maj titaxikokan uan maj tiyolseujtokan”
“Ximochoktijtiyakan iuan nekes ten [...] chokaj”
11 Itech Biblia amo sayoj tikajsij kampa ika motajtoua keman Lázaro momikilij, tein semi kitayokoltij Jesús, ta no kipia miak tajkuilolmej tein uelis techyolseuiskej. Uan nejin amo timoujkaitaj, porin “nochi tanextililis ten tikajsij tech in Tajkuilolamatsin de Dios, nochi nojon techijkuilouilijke para tejuan ika timomachtiske kachi ok. Ika ya nojon tikpiaske kachi ok takuautamatilis iuan Dios porin ompa tikajsij de keniu titaxikojtiyaske ika ne tajyouilis uan no tikajsij de keniu timoyoltalijtiyaske” (Rom. 15:4). ¿Tiontayokoxtok porin momikilij aksa akin tikontasojtaya? Komo ijkon, nejin tajkuilolmej uelis mitsonyolseuiskej:
▪ “Jiova iniuan yetok akin yoltajyouijtokej; yejuatsin kinmakixtia akin yolkuetaujtokej.” (Sal. 34:18, 19.)
▪ “Keman nonetekipacholuan motelmiakilijkej, tinechyolchikauak uan tinechyolseuij.” (Sal. 94:19.)
▪ “Totajtsin Dios, Yejuatsin techneltasojtak uan techmakak ne yolseuilis ten amo keman tamis. Uan no Yejuatsin techmaktilij ya se kuali takuautamatilis sayo porin Yejuatsin techyoliknelij. Uan tiknekij ke Totekotsin Jesucristo uan Totajtsin Dios ke ma Yejuatsin namechyolchikautiu uan ma namechmaka chikaualis.” (2 Tes. 2:16, 17.)
Maj tikauakan “maj taxikolis kitamichiua itekiuj”
5 Maj tiktajtanikan Jiova maj techmaka chikaualis. Biblia kijtoua ke Jiova techpaleuis “ma titaxikojtiyakan ika tajyouilis uan ma timoyoltalijtinemikan” (Rom. 15:5). Sayoj yejuatsin senkis kiajsikamati tein tikpanotokej, tein tikmachiliaj uan tein tikpanokej achto. Yejua ika okachi kuali kimati keniuj techpaleuis maj titaxikokan. Biblia kijtoua: “Yejua kinmaka inintanejnekilis akin kimoujkatokaj, kinkaki keman kitsajtsiliaj maj kinpaleui, uan kinmakixtia” (Sal. 145:19). Sayoj ke ¿keniuj technankilia Dios keman tiktajtaniaj maj techmaka chikaualis tein techpaleuis maj titaxikokan?
“Xiktasojta moueyitekotsin Totajtsin Dios”
11 Jiova techmaka se nechialis tein techyolpaktia uan techyolseuia (Rom. 15:13). Kemej tikchiaj tinemiskej nochipaya, nejon techpaleuia maj titaxikokan keman moyejyekoua totakuaujtamatilis. Taixpejpenalmej akin amo keman kikauaskej Dios kiseliskej “se tetayokolil keme yeskia se corona [...], yejua ne in yek nemilis ten amo keman tamis” ompa iluikak (Apoc. 2:10). Uan okseki itekitikauan Jiova akin amo keman kikauaskej kinyolpaktis kiseliskej nemilis nochipaya nikan taltikpak tein yeski se xochital (Luc. 23:43). ¿Keniuj timomachiliaj ika nejin ome taman nechialis? ¿Melauj ke kichiua maj tiyolpakikan, maj tiyolseuikan uan maj tiktasojtakan Dios, akin techmaka “nochi in tetayokolil ten kuali uan ten chipauak”? (Sant. 1:17.)
Maj tiktemokan tamachtilis ika nejmachkayot
w89 1/12 pág. 24 § 3
Monekik kinextiskej yekmelauj netasojtalis
Tikyematij ke ininikniuan akin amo judios kinekiskiaj kinpaleuiskej. Tein melauj, yejuan kemej yeskia kintauikiliayaj tokniuan akin nemiaj Jerusalén porin kinixmatiltijkaj kuali tanauatilmej. Pablo kinemiliaya nejin: “In taneltokani judíos kinualtitanilijke ne taneltokani ten amo judíos in Tajtoltsin de Dios. Ika ya nojon nekes ten axkan taneltokani ten amo judíos, yejuan nojonkes moneki tapaleuiske kampa ne taneltokani judíos ika nintapaleuilis de ninrikojyo” (Romanos 15:27).
it-1 670 § 11
Akin tauika
Okseki taman tein se tauika. Tajtolmej “tauika” uan “kitauikilia” mokuij itech Biblia keman aksa taneui teisa. Tajtol “kitauikilia” no mokui keman moneki kitaxtauiskej se tetekitilijkej (Rom 4:4). Kemej tinochin tikpiaj tajtakol, kemansa tikinchiuiliaj tein amo kuali oksekin. Yejua ika, moneki titajtaniskej maj techtapojpoluikan porin kemej yeskia tikintauikiliaj. Uan no, Dios techtapojpoluis komo tikintapojpoluiaj akin tein kemej yeskia techtauikiliaj porin techchiuilijkej tein amo kuali (Mt 6:12, 14, 15; Lu 13:4). Tatitanil Pablo kijtoj ke kemej yeskia kintauikiliaya taltikpakneminij porin monekia kinixmatiltis “in Tajtoltsin de Dios” (Ro 1:14, 15). Itatojtokakauan Cristo akin amo katkaj judíos kemej yeskia ‘kintauikiliayaj’ tokniuan akin nemiaj Jerusalén porin yejuan kinpaleuijkaj maj motokianij iuan Dios. Yejua ika, taixejekol katka maj kinpaleuianij tokniuan judíos ika tomin (Ro 15:26, 27).
it-2 pág. 708 § 5
Moitas tein panos satepan
Mesías oso Cristo yeskia konetsin tein moijtojka ke tapaleuiskia maj nochin akin yolmelaujkej kiselikan tatiochiualismej nikan taltikpak (Gál 3:8, 14). Yekinika ika motajtoj nejon konetsin satepan ke Adán uan Eva taixnamikkej ompa Edén uan achto ke yoliskia Abel (Gé 3:15). Nejon moijtoj cuatro mil xiujmej achto ke moijtoskia ke “ichtakatamachilis” katka konetsin akin mochiuaskia Mesías. Yejua ika, uelis moijtos ke “Dios kichtakapixtiuala ya desde ne achtopa” (Ro 16:25-27; Ef 1:8-10; 3:4-11).
18-24 METSTI MARZO
TAMACHTILIS TEIN KIPIA BIBLIA | 1 CORINTIOS 1-3
“¿Techixyekana totanejnekilis oso yektikatsin espíritu?”
¿Toni kijtosneki se mokauas maj teixyekana yektikatsin espíritu?
4 ¿Keniuj tanemilia akin sayoj kitayekanaltia itanejnekilis? Tanemilia kemej akin amo kitekitiliaj Dios. Pablo kijtoj ke nejin tanemilil “kinyoltekitilijtok nochi nekes ten axkan kixnamiktinemij Totajtsin Dios” (Efes. 2:2). Nejin tanemilil kinolinia miakej maj kichiuakan tein oksekin kichiuaj. Sayoj kichiuaj tein kinemiliaj ke kuali yetok uan amo mochikauaj kitakamatiskej itanauatiluan Dios. Akin sayoj kitayekanaltia itanejnekilis okachi ika motekipachoua tomin, keniuj kiitaskej oksekin, oso tein kinemilia ke kinamiki.
5 Nejin taltikpakneminij kichiuaj “[tanejnekilis] ten kuika tajtakol” (Gál. 5:19-21). Itech yekinika amat tein kintitanilij tokniuan itech nechikol Corinto, Pablo kijtoj okseki taman tein kichiuaj akin kitayekanaltiaj inintanejnekilis: mokalakiaj itech ininkuejmoluan oksekin, kitemouaj kinxexeloskej taltikpakneminij, kichiuaj maj oksekin taixnamikikan, moteteiluiliaj, amo kinpoujkaitaj akin kipiaj tanauatil uan semi kitayekanaltiaj takuaskej uan tatayiskej. Uan no, amo mochikauaj amo tajtakoskej (Prov. 7:21, 22). Judas kijtoj ke sekin hasta senkis amo kipiaj iespíritu Jiova (Jud. 18, 19).
¿Toni kijtosneki se mokauas maj teixyekana yektikatsin espíritu?
6 Akin mokaua maj kiixyekana yektikatsin espíritu semi taman tanemilia. Kitayekanaltia ikuali uikalis iuan Dios uan kitemoua kichiuas teisa kemej yejuatsin (Efes. 5:1). Mochikaua tanemilis kemej Jiova. Kiita ke Dios yekmelauj nemi. Nochipa kitakamati itanauatiluan (Sal. 119:33; 143:10). Kitemoua kinextis itakilo espíritu uan amo kichiuas “[itanejnekilis] ten kuika tajtakol” (Gál. 5:22, 23).
¿Toni kijtosneki se mokauas maj teixyekana yektikatsin espíritu?
15 ¿Keniuj uelis tikchiuaskej kemej Cristo? Itech 1 Corintios 2:16 moijtoua ke moneki titanemiliskej kemej Cristo. Uan Filipenses 2:5 techiluia maj tikpiakan “kuali tamachilis tenika Cristo Jesús tanemilijtinemia”. Yejua ika, komo tiknekij tiyeskij kemej Cristo, moneki tikixmatiskej keniuj tanemiliaya uan keniuj kichiuaya teisa. Yejua okachi kitayekanaltiaya ikuali uikalis iuan Dios. Tiyeskij kemej Jesús okachi techtokia iuan Jiova. Yejua ika, motelneki maj timochikauakan titanemiliskej kemej Jesús.
Maj tiktemokan tamachtilis ika nejmachkayot
it-2 pág. 886 § 5
Tamatilis
Yejua ika, tamatilis tein kijtouayaj ke kipiayaj taltikpakneminij kichiuak maj amo kiselikan tein Dios kinmaktilijka itechkopa Cristo uan kiitakej kemej yeskia amo kualtia. Maski tekiuanij xa kuali tekitiaj uan taixejekouayaj, ‘kikoujpanpilojkej in Totekotsin Jesucristo’ (1Co 1:18; 2:7, 8). Sayoj ke Dios, kinextij ke tamatilis tein kipiaj taltikpakneminij amo kualtia, porin kinpinaujtij tamatinij keman kichiuak tein kiixtalijtoya ika tein yejuan kiitayaj kemej “se mijmikiloyotanojnotsalis de Dios” uan porin no kintekitiltij akin yejuan kinitayaj kemej “mijmikilome”, “amo teyi kualtiaj” uan “amo ueyi chiuanime” (1Co 1:19-28). Pablo kinelnamiktij tokniuan akin nemiaj Corinto ke inintamatilis taltikpakneminij uan tekiuanij ixpoliuiskia. Yejua ika, nejon tamatilis amo yejua tein tatitanil kiteixmatiltiaya (1Co 2:6, 13). Yejua kinnejmachtij tokniuan akin nemiaj Colosas: “Ma amo aken namechkajkayaua ika tamachilis [fi·lo·so·fí·as, oso ‘se kitasojtas tamatilis’] ten amo teyi namechyolmajxitis. Uan no ma amo aken namechkajkayauas ika ne tajtolteuilis ten amo teyi ika namechpaleuis” (Col 2:8; no xikonita versículos 20-23).
w08 15/7 pág. 27 § 6
Tein moixtajtoltia itech amatajkuilolmej Corintios
2:3-5. Keman Pablo tanojnotsato Corinto, xa motajtaniaya ox ueliskia kitaneltoktis aksa itech nejon xolal kampa semi moyekanayaj ika inintamachtilis griegos. Maski mouia uan seki taman amo uelia kichiuaya, tanojnotsak ijkon kemej Dios kinauatijka. Tejuan no moneki amo timosenkauaskej komo tikpanouaj seki taman tein kichiuas maj amo ueli titanojnotsakan. Tiktajtaniaj Jiova maj techpaleui uan tiksentokaj tikteixmatiltiaj iTekiuajyo ijkon kemej Pablo kichiuak.
25-31 METSTI MARZO
TAMACHTILIS TEIN KIPIA BIBLIA | 1 CORINTIOS 4-6
“Tepitsin levadura kixokoltia nochi tixti”
Monextia netasojtalis ijkuak kikalankixtiaj aksa itech nechikol
Tapaleuia maj nechikol moajsi chipauak. Tatitanil Pablo kinnauatij tokniuan akin nemiaj Corinto maj kikalankixtianij itech nechikol se takat akin kichiujtoya se ueyi tajtakol uan amo moyolnonotsaya. ¿Keyej? Porin nejon takat ueliskia kichiuas maj oksekin tokniuan no kichiuanij tein amo kuali. Pablo ijkon kimelauak nejon: “Ijkon keme ne tsiktsin tamajmaualis de levadura den kuali kiposonaltia in tix harina, no ijkon se tajtakol keme ne auilnemilis, yejua ne kinmajmaua nochi in taneltokani ma motajtakolmakakan”. Yejua ika kiniluij tokniuan maj kikalankixtianij nejon takat itech nechikol (1 Cor. 5:6, 11-13).
Nejon takat auilnentoya uan amo mopinaujmatia. Uan itech nechikol sekin peuak kijtouaj ke nejon amo katka se taman tein tel amo kuali (1 Cor. 5:1, 2). Nejin semi tamouilil katka, porin ueliskia kichiuas maj okseki tokniuan no kichiuanij tajtakolmej kemej kichiuayaj taltikpakneminij ompa Corinto. Axkan no ijkon panoua. Komo aksa akin kichiuak se ueyi tajtakol amo moyolnonotsa uan amo kikalankixtiaj, sekin uelis kinemiliskej ke amo motelneki se kitakamatis itanauatiluan Jiova (Ecl. 8:11). Biblia kijtoua ke tajtakouanij akin amo moyolnonotsaj tamatij kemej uejueyi tet tein moajsij itech ueyiat tein kichiuaj maj seki barcos pankalakikan (Jud. 4, 12, TNM). Nejin tajtakouanij uelis kichiuaskej maj okseki tokniuan itech nechikol amo takuaujtamatikanok.
it-2 pág. 972
Satanás
¿Toni kijtosneki ‘tiktemaktiskej imako in amokuali Satanás’ aksa uan ijkon maj ixpoliui inakayo?
Keman tatitanil Pablo kinnauatij tokniuan akin nemiaj Corinto tein monekia kichiuaskej iuan takat akin kichiuaya tein amo kuali porin auilnemia iuan itakpanan, kijtoj: “Ne tagat den tachiutok ika ne pitsotik nemilis, yejua ne moneki xiktemaktikan imako in amokuali Satanás” (1Co 5:5). Nejin kijtosnekia ke monekia kikalankixtiskej itech nechikol uan senkis amo iuan mouikaskejok (1Co 5:13). Kimaktiliskej Satanás kijtosnekia ke amo pouiskiaok itech nechikol, porin itech taltikpak taixyekana Satanás. Nejon takat katka kemej yeskia “tsiktsin tamajmaualis de levadura” itech “in tix harina”, oso akin kitayekanaltiaya itanejnekilis itech nechikol. Yejua ika, kemej tokniuan itech nechikol kikauayaj maj yektikatsin espíritu kinixyekana, monekia kikalankixtiskej nejon takat akin auilnemia iuan se ichankauj uan ijkon kemej yeskia kiixpoloskiaj inakayo (1Co 5:6, 7). No ijkon, Pablo kintemaktij Himeneo uan Alejandro imako Satanás, porin amo takuaujtamatiajok uan amo kipiayajok se kuali tanemilil (1Ti 1:20).
Maj tikintasojtakan akin Dios kintasojta
19 Kemansa mochia maj amo timouikakanok imiuan tein yetoyaj itech nechikol. Nejin mochiua ijkuak se tokniuj kitapanauilia itanauatil Dios, uan amo kineki moyolnonotsas uan moneki kikalankixtiskej itech nechikol. No ijkon panoua komo aksa kiixtopeua Jiova ijkuak tamachtia tein amo melauak, oso akin senkis kijtoua ke amo kinekiok eski itaixpantijkauj Jiova. ITajtol Dios techyekiluia: “Amo iuan ximouikatinemikan” (1 Corintios 5:11-13; 2 Juan 9-11). Uelis techkisas tel ouij tikchiuaskej nejon, uan okachiok komo tochankauj oso totasojikniuj. Axkan, ¿toni tikchiuaskej? ¿Senkis tiyetoskej itechkopa Dios, uan ijkon tiknextiskej ke tiktayekanaltiaj Jiova uan itanauatiluan tein melaujkej? Maj tikelnamikikan ke Jiova kitelyolpaktia maj amo keman tikauakan uan maj tiktakamatikan.
Maj tiktemokan tamachtilis ika nejmachkayot
w09 15/5 pág. 24 § 16
Ángeles: “motekitiltijtinemij para Dios”
16 ITajtol Dios kijtoua ke keman akin tikchiuaj kemej Cristo tikpanouaj ouikayomej kemej yeskia “Dios techtenextilijtok inauak in ángeles” (1 Cor. 4:9). Yejuan kiitaj keniuj timonejnemiltiaj uan semi yolpakij keman kiitaj ke tiktakamatij Dios. No yolpakij keman se tajtakolchiujkej moyolnonotsa (Luc. 15:10). Uan onkak se taman tein kichiuaj tokniuan siuamej tein no kiitaj. Biblia kijtoua ke “in siuat moneki ma mokuapiktinemi ika iuelilis de iyokich [...] para ma amo kinyolxokolis in ángeles” (1 Cor. 11:3, 10). Kemaj, ángeles kinyolpaktia kiitaskej ke tokniuan siuamej uan okseki itekitikauan Dios mokauaj maj kinixyekanakan ijkon kemej yejuatsin kiixtalij. Keman titatakamatij kinpaleuia maj no ijkon kichiuakan nejin ikoneuan Jiova.
it-2 pág. 216
Tanauatil
Tanauatilmej tein kinmakakej ángeles. Ángeles, akin okachi chikaujkej ke taltikpakneminij, nochipa kitamatij itanauatiluan Dios (Heb 1:7, 14; Sl 104:4). Jiova hasta kimakak tanauatilmej Satanás uan kiluij tein amo ueliskia kichiuas nejin taixnamikkej (Job 1:12; 2:6). Arcángel Miguel kinextij ke Jiova yejua Ueyi Tamelaujkej keman motajtolteuij iuan Amokuali ijkuak kiluij: “Ma Dios mitstakaualti” (Jud 9; no xikonita Zac 3:2). Jiova kiixtalij maj Jesucristo kinixyekana nochin ángeles (Heb 1:6; 1Pe 3:22; Mt 13:41; 25:31; Flp 2:9-11). Jesús kinauatij se ángel maj kimatiltiti Juan teisa (Apoc 1:1). Itech 1 Corintios 6:3, tatitanil Pablo kijtoua ke iikniuan Cristo oso taixpejpenalmej ‘kinixkomakaskej ángeles’, tein kijtosneki ke kintatsakuiltiskej amokuali ejekamej.