Tein mokui keman tikitaj Tein timomachtiaj itech nechikol Tonemilis uan toTanojnotsalis
3-9 METSTI AGOSTO
TAMACHTILIS TEIN KIPIA BIBLIA | ÉXODO 13, 14
Tein moixtajtoltia itech Biblia
(ÉXODO 13:1-16) Jiova no kiluij Moisés: 2 “Xikintiochiua nochin ininkoneuan israelitas akin tayekanaj. Uan konet okichpil akin tayekana uan ikoneuj se tapial tein ueuet tein yekinika yoli, nochin noaxkauan”. 3 Satepan Moisés kiluij xolal: “Xikelnamikikan nejin tonal, tonal keman nankiskej itech altepet Egipto, itech tal kampa nankatkaj nantakeualmej, porin Jiova namechkixti itech nejin altepet ika imay tein chikauak. Yejua ika, amo xikuakan teisa tein kipia tein taxokoltia. 4 Nankisaskej nejin tonal itech metsti abib. 5 Jiova kiniluij mouejkaujtatuan ke namechmakaskia inintal cananeos, hititas, amorreos, heveos uan jebuseos, se tal kampa semi onkak leche uan nekti. Keman yejuatsin namechuikas ompa, monekis nankisentokaskej nankielnamikiskej nejin tonal itech nejin metsti. 6 Itech chikome tonalmej moneki nankikuaskej pan tein amo kipia tein taxokoltia. Uan itech chikometika tonal nankiiluichiuiskej Jiova. 7 Itech chikome tonalmej moneki nankikauaskej pan tein amo kipia tein taxokoltia. Amo xikpiakan nion se taman tein kipia tein taxokoltia, uan kampa nannemij amo moneki nankipiaskej tixti tein taxokoltil. 8 Uan itech nejon tonal moneki tikiluis mokonetsin: ‘nejin nechelnamiktia tein Jiova noka kichiuak keman nikisak itech altepet Egipto’. 9 Nejin iluit yeski kemej se teisa tein tikuikas momako uan moixkuako tein mitselnamiktis. Ijkon uelis ika nantajtoskej itanauatil Jiova porin Jiova mitskixtij ompa Egipto ika imay tein semi chikauak. 10 Xijxiujtika monekis tikchiuas nejin tanauatil itech tonal tein ixyetok. 11 ”Keman Jiova namechuikas inintal cananeos, tein kiniluij nanmouejkaujtatuan ke namechmakaskia uan no namechiluij namejuan, 12 moneki nankimakaskej Jiova nanmokoneuj okichpil akin tayekana uan nanmotapialuan tein ueuetkej tein yekinika yolij. Nochin iaxkauan Jiova. 13 Sayoj ke, ikoneuj se burro tein tayekana moneki tikixpatas ika se borrego, komo amo tikpia tein ika tikixtauas moneki tikechpostekis. Uan no, moneki titaxtauas ininka mokoneuan akin tayekanaj. 14 ”Komo seki xiujmej satepan mokoneuj mitstajtania ‘¿Toni kijtosneki nejin?’, moneki tikiluis ‘Jiova techkixtij ompa Egipto kampa katkaj titakeualmej ika imay tein semi chikauak. 15 Kemej akin tekiuajtia Egipto amo techkauaya maj tikisakan ompa, Jiova kinmiktij nochin ininkoneuan akin tayekanayaj ompa Egipto, uan no inintapialuan. Yejua ika, tikmakaj Jiova totapialuan tein ueuetkej tein tayekanaj, uan no titaxtauaj porin kinmakixtij tokoneuan telpochmej akin tayekanaj’. 16 Uan nejin moneki yeski kemej teisa tein tikuikas momako uan moixkuako, porin Jiova techmakixtij ompa Egipto ika imay tein semi chikauak”.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Pedro kijtoua ke amo kiixmati Jesús
¿Keniuj Pedro uan Juan kalakij ichan Caifás?
¿Toni panoua keman Pedro uan Juan moajsij ichan Caifás?
¿Toni kijtosneki Pedro keman peuak “tauijuikaltia”?
¿Toni techmachtia tein kichiuak Pedro?
10-16 METSTI AGOSTO
TAMACHTILIS TEIN KIPIA BIBLIA | ÉXODO 15, 16
Tein moixtajtoltia itech Biblia
(ÉXODO 16:1-16) Satepan, israelitas kiskej itech tal Elim, seki tonalmej satepan ajsikej taluakyan Sin, tein moajsi itech talmej Elim uan Sinaí. Ajsikej itech tonal 15 ojpatika metsti satepan ke kiskej Egipto. 2 Itech taluakyan, israelitas peuak kiniluiaj Moisés uan Aarón tein yejuan amo kiuelitaj. 3 Israelitas kijtouayaj: “¡Okachi kuali maj Jiova techkauani maj timikinij ompa Egipto! Ompa timotaliayaj inakastan kampa kitaliayaj nakat uan tikuayaj pan hasta tiixuiaj, sayoj ke nantechualkuikej nikan taluakyan maj timayamikikan”. 4 Yejua ika, Jiova kiluij Moisés: “Nikchiuas maj paxini tein nankikuaskej uan nochin israelitas moneki kiololoskej tein kikuaskej mojmostaj. Ijkon nikitas ox kitakamatij notanauatil. 5 Uan keman ajsis chikuasen tonal moneki nankiololoskej okse achiok ke tein mojmostaj nankiololoskej”. 6 Yejua ika, Moisés uan Aarón kiniluijkej israelitas: “Tiotakpa senkis nankimatiskej ke Jiova yejuatsin akin namechkixtij ompa Egipto. 7 Uan kualkampa nankiitaskej ichikaualis Jiova porin Jiova kikakini tein nankijtouiliaj. ¿Keyej nantechiluiaj tein amo nankiuelitaj ta tejuan amo teyi tichiuanimej?”. 8 Moisés no kiniluij: “Keman Jiova namechmakas nakat tiotak uan kualkan pan tein nankikuaskej, nankiitaskej ke Jiova kikakik tein amo nankiuelitaj. ¿Tejuan toni tichiuanimej? Maski namejuan nantechiluiaj tein amo nankiuelitaj, Jiova yejua akin nankiluijtokej”. 9 Satepan Moisés kiluij Aarón: “Xikinilui nochin israelitas: ‘Xiuikij iixpan Jiova porin kikakini tein nankijtouanij’”. 10 Niman keman Aarón tamitajtoj, israelitas moixkepkej kampa ika taluakyan. Ompa, ichikaualis Jiova monextij itech mixti. 11 Jiova no kiluij Moisés: 12 “Nikakini tein israelitas amo kiuelitaj. Yejua ika xikinilui: ‘Tiotaktempan kikuaskej nakat uan kualkampa kikuaskej pan hasta ixuiskej, uan ijkon kimatiskej ke nejua niJiova ininDios’”. 13 Yejua ika, nejon tiotak ajsikej miak codornices uan sentakuikej kampa israelitas moajsiaj, kualkan kiitakej ke tajtanakastan ajuachtaj katka. 14 Keman ajuach uakik, kiitakej ke mokauak teisa tein moixnepanoj, talpan mokauak kemej teisa takuechol tein katka kemej sekti. 15 Kemej israelitas amo kimatiaj toni katka, motajtaniayaj: “¿Toni nejon?”. Moisés kiniluij: “Jiova namechmakatok nejin tein ika nanmotamakaskej. 16 Jiova tanauatij: ‘Sayoj xikololokan tein nankikuaskej, nochin akin nemij itech sejse takenkal moneki kiololoskej ojome litro’”.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Akin kiixnextiaj Sanedrín kimelauaj Jesús uan satepan kiuikaj iixpan Pilato
¿Keyej oksepa mosentiliaj nejon kualkan akin kiixnextiaj Sanedrín?
¿Keniuj momikilia Judas, uan toni kichiua ika 30 platajtomin?
¿Keniuj judíos kitakajkayauiliaj Jesús porin kinekij maj Pilato tanauati maj kimiktikan?
17-23 METSTI AGOSTO
TAMACHTILIS TEIN KIPIA BIBLIA | ÉXODO 17, 18
Maj tiktemokan tamachtilis ika nejmachkayot
“Amo xikaua maj temokan momauan”
14 Aarón uan Hur kichikaujkej imauan Moisés keman kimaajoktoyaj ijkuak israelitas moteuijtoyaj iniuan amalequitas. Tejuan no uelis tiktemoskej keniuj tikinyolchikauaskej uan tikinpaleuiskej oksekin. Kemej neskayot, uelis tikinyolchikauaskej tokniuan akin tajyouiaj porin xiuejkejya, mokokouaj, ininchankauan kinixnamikij, ininselti momachiliaj oso porin se ininchankauj momikilij. No uelis tikinyolchikauaskej telpochmej uan ichpochmej, porin miakpa kinchikaujkauiaj maj kichiuakan tein amo kuali oso maj kitemokan kipiaskej se kuali tamachtilis, tomin oso se kuali tekit (1 Tes. 3:1-3; 5:11, 14). Maj tiktemokan keniuj uelis tikinpaleuiskej oksekin ika nochi toyolo keman tiyetoskej itech Kali kampa tiMosentiliaj, itech tanojnotsalis, keman tisentakuaskej oso keman tikinnotsaskej ika teléfono.
Tein moixtajtoltia itech Biblia
(ÉXODO 17:1-16) Nochin israelitas kiskej taluakyan Sin. Moseuijtiayaj ijkon kemej Jiova kinnauatijka. Satepan ajsikej Refidim uan ompa kitalijkej inintakenkaluan, sayoj ke amo onkaya at tein ueliskia tayiskej. 2 Yejua ika, israelitas peuak kualanij iuan Moisés uan kiluiaj: “¡Xitechmaka at tein titayiskej!”. Moisés kinnankilij: “¿Keyej nankualanij nouan? ¿Keyej nankisentokaj nankiyejyekouaj Jiova?”. 3 Sayoj ke israelitas amikiaj. Uan kisentokayaj kualaniaj iuan Moisés uan kiluiayaj: “¿Keyej titechkixtij itech altepet Egipto? ¿Tikneki titechmiktis tejuan, tokoneuan uan no totapialuan porin amo tikpiaj at tein titayiskej?”. 4 Yejua ika, Moisés kitataujtij Jiova, uan kiluij: “¿Toni nikchiuas iniuan israelitas? ¡Kinekijya nechtetemaskej!”. 5 Ompa, Jiova kiluij Moisés: “Ximotayekanalti iniuan seki tayekananij, uan ximaktiuj mokouj tein ika tikuitek ueyiat Nilo. 6 Niyetos moixpan itech ueyi tet ompa Horeb. Moneki tikuitekis ueyi tet, uan kisas at tein israelitas uelis tayiskej”. Moisés ijkon kichiuak ininixpan tayekananij israelitas. 7 Yejua ika, tatokaytij Masá uan Meribá porin ompa israelitas kualankej iuan Moisés uan porin kiyejyekojkej Jiova keman kijtojkej: “¿Touan yetok Jiova oso amo?”. 8 Satepan, amalequitas yajkej Refidim kinteuitoj israelitas. 9 Yejua ika, Moisés kiluij Josué: “Xikinixpejpena seki takamej uan xiyakan ximoteuitij iniuan amalequitas. Mosta niyetos tepekuapan ika nokouj tein Dios akin melauak nechiluij maj nikualki”. 10 Josué kichiuak ijkon kemej kiluij Moisés uan moteuito iniuan amalequitas. Uan Moisés, Aarón uan Hur pankiskej tepekuapan. 11 Keman Moisés momaajoktoya israelitas tataniaj, sayoj ke keman kintemouiaya imauan, amalequitas tataniaj. 12 Keman Moisés makoujtik, kiuikilijkej se tet kampa motalis. Aarón uan Hur moketskej inajnakastan uan kimapaleuijkej, ijkon kisentokak momaajoktoya hasta ke pankalakik tonaltsin. 13 Yejua ika, Josué kintanik amalequitas. 14 Ompa, Jiova kiluij Moisés: “Xikijkuilo nejin itech amatajkuilol, nejon namechpaleuis xikelnamikikan uan miakpa xikilui Josué: ‘Senkis nikinixpolos amalequitas uan amo akin kinelnamikisok’”. 15 Satepan, Moisés kichijchiuak se altar tein kitokaytij Jiova-Nisí 16 keman kijtoj: “Porin timoixeuij tikixnamikis Jah, Jiova nochipa kinteuis amalequitas”.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Pilato uan Herodes kiitaj ke Jesús amo kichiuak tein amo kuali
¿Keniuj tanankilia Jesús keman kitajtaniaj ox yejua se tekiuaj?
¿Toni kiniluia Pilato miakej akin moajsij kalampa? ¿Toni kijtouaj yejuan? ¿Toni kichiua Pilato?
¿Keyej Herodes Antipas yolpaki keman kiita Jesús? ¿Toni kichiua iuan Jesús?
¿Keyej Pilato kineki kikajkauas Jesús?
24-30 METSTI AGOSTO
TAMACHTILIS TEIN KIPIA BIBLIA | ÉXODO 19, 20
Maj tiktemokan tamachtilis ika nejmachkayot
Mochiuaskej “tekiuanij uan tiopixkamej”
5 Netenkaualis ika Tanauatil no tapaleuij maj moajsiskiaj tiopixkamej akin kipaleuiskiaj xolal Israel. Yejuan kinixnextiayaj oksekin tiopixkamej akin moajsiskiaj satepan akin okachi kuali kinpaleuiskiaj taltikpakneminij (Heb. 7:11; 10:1). Tein melauj, kinextiaya ke israelitas ueliskiaj mochiuaskiaj “tekiuanij uan tiopixkamej” komo kitakamatiskiaj itanauatiluan Jiova (xikonixtajtolti Éxodo 19:5, 6). Sayoj ke, xolal Israel amo tatakamatik. Amo kuali kiselij Mesías, ta kiixtopeuak akin katka yekinika konetsin akin ualaya itech ichankauan Abrahán. Yejua ika Dios kiixtopeuak xolal.
6 Kemej xolal Israel kiixtopeuak Jiova, amo uelikok ompa kiskej nochin akin mochiuaskiaj tekiuanij uan tiopixkamej. ¿Kijtosnekia nejon ke Tanauatil amo tapaleuij? Amo. Tanauatil kiyekpiaskia konetsin uan kinpaleuiskia taltikpakneminij maj kiixmatiskiaj Mesías. Uan ijkon mochiuak keman Cristo ualaj nikan taltikpak uan uelik kiixmatkej. Yejua ika Biblia kijtoua ke “Cristo yejua itamilis Tanauatil” (Rom. 10:4, TNM). Sayoj ke ¿akonimej ueliskiaj mochiuaskej tekiuanij uan tiopixkamej? Jiova kichiuak okse netenkaualis tein kiyeknextiaya ke moajsiskia se yankuik xolal.
Tein moixtajtoltia itech Biblia
(ÉXODO 19:1-17) Eyi metsti satepan ke israelitas kiskej altepet Egipto. Itech tonal keman kiskej, ajsikej taluakyan Sinaí. 2 Keman kiskej Refidim ajsikej taluakyan Sinaí uan iixpan tepet kintalijkej inintakenkaluan. 3 Satepan Moisés pankisak, monextito iixpan Dios akin melauak. Jiova kinotsak tepekuapan uan kiluij: “Yejua nejin tein moneki tikiniluis ichankauan Jacob uan tein moneki tikinmatiltis israelitas: 4 ‘Namejuan nankitakej tein nikinchiuilij akin nemiaj Egipto, uan namechuikas kemej se águila itech iajtapaluan uan namechejkoltis nikan. 5 Uan axkan komo senkis nanechtakamatij, uan nankichiuaj tein nikijtojka, sayoj namejuan nanyeskij noaxkauan uan itech nochi xolalmej sayoj namejuan namechpatiuitas, porin nochi taltikpak noaxka. 6 Nanmochiuaskej tekiuanij uan tiopixkamej uan se altepet yektik tein noaxkaʼ. Yejua nejin tein moneki tikiniluis israelitas”. 7 Yejua ika, Moisés temok, kinnechikoj nochin tayekananij uan kiniluij nochi tein Jiova kinauatijka. 8 Satepan nochin kijtojkej: “Tikchiuaskej nochi tein Jiova kijtoj”. Moisés niman kiluito Jiova tein kijtojkej israelitas. 9Uan Jiova kiluij Moisés: “Nitemos itech mixti keman nitajtos mouan, ijkon israelitas uelis kikakiskej uan no mouan takuaujtamatiskej nochipa”. Moisés kiluito Jiova tein kijtojkej israelitas. 10 Ompa, Jiova kiluij: “Xiyouj kampa yetokej israelitas uan xikinchiua maj yektikej axkan uan mosta, yejuan moneki kipakaskej inintaken. 11 Itech expatika tonal moneki mochixtoskej porin Jiova ualpantemos itech tepet Sinaí, uan nochin israelitas kiitaskej. 12 Moneki tikiniluis maj sayoj moajsikan itsintan tepet, xikinilui: ‘Amo xitejkokan itech tepet uan amo xitaksakan kampa amo moneki nanpanoskej. Akin taksas itech tepet moneki mikis. 13 Amo xikmatokakan akin ijkon kichiuas, ta monekis xiktetemakan oso xikmotakan. Moneki ijkon nankichiuaskej yeski tapial oso taltikpaknenkej, maj amo kisentoka yolto’. Keman kipitsaskej se kuaomit uelis nanmotokiskej itech tepet”. 14 Satepan, Moisés ualtemok itech tepet uan peuak kinchiua maj yektikej israelitas uan yejuan kipakkej inintaken. 15 Moisés kiniluij: “Xikchiakan maj ajsi expatika tonal uan amo ximotekakan iuan nion akin”. 16 Uan kualkan itech expatika tonal peuak tatikuini uan tapepetani. Onkaya mixti tilauak tepekuapan uan mokakia ke kipitsayaj se kuaomit tein chikauak kakistia. Nochin akin yetoyaj itech inintakenkaluan peujkej moujkauiuiyokaj. 17 Yejua ika, Moisés kinkixtij israelitas itech takenkalmej uan yajkej itsintan tepet uan ijkon moajsikej iuan Dios akin melauak.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Pilato kijtoua: “Nikan yetok ya nijin tagat”
¿Keniuj Pilato kitemoua kipaleuis Jesús uan maj amo itajtakol tein kipanos?
¿Keniuj romanos kinuijuitekiaj oksekin?
Satepan ke kiuijuitekkej Jesús, ¿toni no kichiuiliaj?
31 METSTI AGOSTO HASTA 6 METSTI SEPTIEMBRE
TAMACHTILIS TEIN KIPIA BIBLIA | ÉXODO 21, 22
Tein moixtajtoltia itech Biblia
(ÉXODO 21:1-21) ”Uan no, moneki tikinmakas nejin tanauatilmej: 2 ”Komo tikoua se takeual hebreo, mitstekitilis chikuasen xiujmej, uan itech chikometika xiuit moneki tikauas maj youi uan amo teyi taxtauas. 3 Komo ejkok iselti yas iselti, sayoj ke komo ejkok iuan inamik monekis yas iuan. 4 Komo iteko kinamiktia, uan siuat kinpia ikoneuan, siuat uan ikoneuan yeskij iaxkauan iteko. Yejua ika takeual yas iselti. 5 Sayoj ke, komo takeual miakpa kijtoua ‘Amo nikneki niyas porin niktasojta noteko, nonamik uan nokoneuan’, 6 iteko kinextis iixpan Dios akin melauak. Yejua ika, iteko kinakastalis itech puerta oso inakastan puerta uan kinakaskoyonis ika se tepos uan ijkon yeski nochipaya itakeual. 7 ”Komo se takat kinamaka iichpoch kemej takeual, ichpoch amo kikauaskej maj youi kemej se takat takeual. 8 Komo iteko amo kikui kemej okse isiuauj porin amo kiuelita uan kiajsi akin kineki kikouas, amo uelis kinamakiltis nion se analtekojkayot porin amo kichiuak tein kinamikia iuan. 9 Sayoj ke, komo iteko kinamiktia iuan ikoneuj, moneki kimakas tein moneki kemej yeskia iichpoch. 10 Komo tekoneuj kitemoua okse inamik, moneki kisentokas kimakas tein kikuas, tein motalilis uan moneki kisentokas iuan motekas. 11 Komo takat amo kimaka nion se taman, siuat uelis yas uan amo teyi taxtauas. 12 ”Akin kiteuis se takat uan kimiktis moneki mikis. 13 Sayoj ke, komo amo kinekia kimiktis uan Dios akin melauak kikaua maj pano, akin temiktij uelis cholos kampa nimitsiluis. 14 Komo se takat kualani iuan se taltikpaknenkej uan kimiktia porin ijkon kiixtalij, nejon takat moneki mikis maski tikixtis itech noaltar. 15 Akin kiteuis itat oso inan moneki mikis. 16 ”Komo se takat kikitskia se taltikpaknenkej uan kinamaka oso kiitaj ke kitsakuilijtok, akin ijkon kichiuas moneki mikis. 17 ”Akin kijtouilis itat oso inan maj kipano tein amo kuali, moneki mikis. 18 ”Komo ome takamej moteuiaj uan semej kixokoliaj ika se tet oso mayit uan amo miki sayoj ke moneki uetstos, moneki mochiuas nejin: 19 Komo ueli meua uan nejnemi ika se topil, takat akin kixokolij amo kitatsakuiltiskej, sayoj ke moneki kiixtauilis tonalmej tein amo tekitis hasta maj pajti. 20 ”Komo se takat kiteuia itakeual ika se kouit, yeski siuat oso takat uan takeual miki keman kimatoyaj, takeual moneki kimakepaskej. 21 Sayoj ke, komo amo miki itech se oso ome tonal amo moneki kimakepaskej, porin iteko kikouak ika itomin.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Kiuikaj Jesús kampa kimiktiskej
¿Toni kijtouiliaj Jesús taixyekananij itech taneltokalis?
¿Keyej Pilato moui?
¿Toni tiopixkamej kiluiaj Pilato porin kinekij maj tanauati maj kimiktikan Jesús?
¿Toni kijtosneki Jesús keman ika tajtoua se kouit tein selistok uan satepan uaki?