¿Tikonelnamiki?

¿Tikonixtajtoltiani ika nejmachkayot amaixmej Tanejmachtijkej tein yankuixtok kiskej? Xikonita ox ueli tikonnankilia nejin netajtanilmej:

¿Keniuj techpaleuis komo tikxelouaj tiempo tiktataujtiskej Jehová, tikakiskej uan itech titanemiliskej yejuatsin?

Okachi kuali titaixpejpenaskej, okachi kuali titamachtiskej, okachi titakuaujtamatiskej uan okachi tiktasojtaskej Jehová (w22.01, página 30 uan 31).

¿Keyej semi moneki maj titakuaujtamatikan iuan Jehová uan iniuan akin kinixtalijtok maj techixyekanakan?

Axkan okachi moneki titakuaujtamatiskej ke Jehová nochipa kichiua tein kinamiki. Ijkon tikchiuaj keman niman tiktakamatij tein kiixtaliaj tayekananij uan tein technauatiaj. Itech okachi ueyi tajyouilis niman tikchiuaskej tein technauatiskej maski tiknemiliskej ke amo taixejekol oso tein ouij techkisas tikchiuaskej (w22.02, páginas 4 hasta 6).

¿Keyej se ángel kiluij Zacarías ke kiitaskia ke tekiuaj judío Zorobabel kipia imako se plomada? (Zac. 4:8-10).

Tein ángel kijtoj kimatiltij ixolal Dios ke maski templo amo chijchiujtoya kemej tein Salomón kichijchiujka, kitamichijchiuaskiaj uan yeskia kemej Jehová kinekia (w22.03, página 16 uan 17).

¿Keniuj uelis kuali titajtoskej para maj kinpaleui oksekin? (1 Tim. 4:12).

Maj tikualtakamej uan maj titepoujkaitakan keman titanojnotsaskej, maj timokuikatikan ika yolpakilis itech nechikolmej uan maj timochikauakan nochipa titanankiliskej, maj nochipa tikijtokan tein melauj, maj tikinyolchikauakan oksekin uan maj amo titeyolkokokan (w22.04, páginas 6 hasta 9).

¿Keyej se koujtajtapial tein ika motajtoua itech Apocalipsis 13:1, 2 tamati kemej naui koujtajtapialmej oso tekiuajyomej tein ininka motajtoua itech Daniel capítulo 7?

Koujtajtapial tein ika motajtoua itech Apocalipsis capítulo 13 amo kiixnextia sayoj se tekiuajyot, kemej Roma, ta kinixnextia nochi tekiuajyomej akin taixyekananij nikan taltikpak (w22.05, página 9).

¿Keniuj tiknextiaj ke titakuaujtamatij ke Jehová nochipa kichiua tein kuali yetok?

Komo aksa techyolkokoua oso techchiuilia tein amo kuali amo tiksentokaj tikualantokej iuan, ta tikauaj maj Jehová kichiua tein monekis. Titakuaujtamatij ke yejuatsin kiyektalis nochi (w22.06, página 10 uan 11).

¿Toni moneki kielnamikis se tokniuj takat keman kichiua netataujtil itech nechikol?

Itech netataujtilmej amo moneki tayolmajxitiskej nion kitematiltiskej teisa. Tokniuj akin kichiua netataujtil amo moneki uejkaua tajtos, okachiok komo ika peuati nechikol (Mat. 6:7) (w22.07, página 24 uan 25).

¿Toni kijtosneki ke “akin kichiujkej tein amo kuali, kiixtaliskej tein kinnamiki kiseliskej”? (Juan 5:29).

Amo kiixtaliskej tein kinnamiki kiseliskej ika tein kichiujkej achto ke momikiliskiaj, ta kiitaskej tein kichiuaskej satepan ke oksepa nemiskej (w22.09, página 18).

¿Toni kitematiltij tokniuj Joseph Rutherford itech se ueyi nechikol tein mochiuak itech metsti septiembre xiuit 1922?

Itech se ueyi nechikol tein mochiuak ompa Cedar Point (Ohio, Estados Unidos), kijtoj: “¡Xikitakan, Tekiuaj taixyekantok! Namejuan nankiteixmatiltiaj. Yejua ika, xikteixmatiltikan, xikteixmatiltikan, xikteixmatiltikan Tekiuaj uan iTaixyekanalis” (w22.10, páginas 3 hasta 5).

Kemej kijtoua Isaías capítulo 30, ¿toni eyi taman ika techpaleuia Dios maj titaxikokan?

Nejin capítulo kinextia ke yejuatsin 1) techkaki uan technankilia keman tiktataujtiaj, 2) techixyekana uan 3) techtatiochiuia axkan uan satepan (w22.11, página 9).

¿Keyej tikmatij ke Salmo 37:10, 11, 29 ika tajtoua tein panok ne uejkauj uan tein mochiuas satepan?

Tein David kijkuiloj kinextia keniuj israelitas yolseujkanemiaj ne uejkauj keman Salomón taixyekanaya. Keman Jesús ika tajtoj Xochital tein satepan mochiuas kinextij tein kijtoua versículo 11 (Mat. 5:5; Luc. 23:43) (w22.12, páginas 8 hasta 10 uan 14).