“Amo keman nietoya noselti”

NOTATUAN KUALI NECHMACHTIJKEJ

Nopaj uan nomaj semi katkaj católicos. Sayoj ke keman kiitakej itech Biblia ke Dios monotsa Jehová, niman mochiujkej itaixpantijkauan Jehová. Kemej nopaj katka koujxijxinkej amo kinchijchiuakok imágenes de Jesús uan kiyekchijchiuak yekinika piso de tochan kampa ueliskia timonechikoskej. Nejon katka yekinika Kali kampa tiMosentiliaj tein mochijchiuak ompa San Juan del Monte, se xolaltsin de Manila, Filipinas.

Niyolik itech xiuit 1952 uan notatuan niman nechpaleuijkej maj nikixmati Jehová, ijkon kemej kinmachtijtoyaj nauin nokniuan takamej uan eyin nokniuan siuamej akin tayekanayaj. Nopaj nochipa nechiluiaya maj mojmostaj niklero se capítulo de Biblia. Uan no timosenmachtiayaj seki toamaixuan. Kemansa notatuan kinkauayaj maj tokniuan takalpanouanij uan betelitas mokauanij tochan. Semi techyolchikauayaj uan tiyolpakiaj keman tokniuan techtapouiayaj tein kinpanouaya. Uan nejon kichiuak maj okachi tiktayekanaltikan tiktekitiliskej Jehová.

Tein kichiujkej notatuan nechmachtij maj amo keman nikaua Jehová. Itech xiuit 1971, satepan ke momikilij nomaj porin mokokouaya, nopaj uan nejua timochiujkej precursores. Sayoj ke itech xiuit 1973, keman nikpiaya 20 xiujmej, nopaj momikilij. Semi nimomachiliaya noselti. Sayoj ke tein kijtoua Biblia ke “tikchiaj” nechpaleuij maj amo semi nimotayokolti uan maj amo nikaua Jehová (Heb. 6:19). Satepan ke momikilij nopaj, nechixtalijkej kemej precursor especial itech isla de Coron, ompa Palawan.

OUIJ KATKA KAMPA NITAPALEUIAYA UAN NIETOYA NOSELTI

Niajsik Coron keman nikpiaya 21 xiujmej. Kemej nimoskaltij itech se ueyi xolal, semi nikmojkaitak maj itech nejon isla amo onkani luz, at, carros nion motos. Maski moajsiaj seki tokniuan, kemansa monekia nias noselti nitanojnotsatiuj porin amo nikpiaya se compañero maj no precursor. Itech yekinika metsti semi nikintemouaya nochankauan uan akin kuali iniuan nimouikaya. Mojmostaj youak niajkotachiaya uan nikinitaya sitalimej uan semi nichokaya. Amo niknekiaok ompa nitapaleuis uan niknekia nimokepas nochan.

Ijkuak, niktapouiaya Jehová keniuj nimomachiliaya. Nikelnamikia seki taman tein niklerojka itech Biblia uan itech toamaixuan. Miakpa itech nitanemiliaya Salmo 19:​14, uan nikajsikamatik ke ueliskia nikitas Jehová kemej “noTepejxit uan noTemakixtijkauj” komo itech nitanemiliaya seki taman tein kiyolpaktiskia, kemej tein kichijchiuak uan kemej tamati. Tel miakpa nikleroj se tamachtilis tein semi nechpaleuij, nejon kisak itech amaix La Atalaya, tamachtilis motokaytia “Usted nunca está solo”.a Keman nietoya noselti, nikmachiliaya ke sayoj nietoya iuan Jehová, yejua ika uelia semi niktataujtiaya, nimomachtiaya, uan nitanemiliaya.

Niman ke niajsik Coron nechixtalijkej kemej tayekankej. Kemej ompa sayoj nejua katka nitayekankej, nikixyekanaya Escuela tein Techmachtia iTekiyo Dios, Nechikol tein Techmachtia iTekiyo Dios, Nemachtil ika Amaix itech Nechikol uan Nemachtil ika amaix Tanejmachtijkej. Uan no itamian semana monekia niktemakas tanojnotsmej. Nochi nejin nechpaleuij maj amo nimomachiliok noselti.

Semi kualtsin katka nitanojnotsas ompa Coron, uan satepan sekin akin nikinmachtiaya moauijkej. Sayoj ke no ouij katka porin kemansa para niajsis kampa nitanojnotsaskia monekia ninejnemis tajko tonal uan amo nikmatia kani nimokauaskia. No titanojnotsayaj itech okseki tsikitsitsin islas, uan para niajsiskia ompa monekia nias itech lancha maski at semi moajkotatamotaya uan tel kiouia, uan nejua amo uelia niajkuia. Sayoj ke Jehová nochipa nechyekpiak uan nechpaleuij. Satepan nikajsikamatik ke nejon nechpaleuiskia para nikixnamikis okseki ouijkayomej kampa no nitapaleuiskia.

PAPÚA NUEVA GUINEA

Itech xiuit 1978, nechtitankej Papúa Nueva Guinea tein moajsi norte de Australia. Papúa Nueva Guinea se ueyi altepet tein tel tepeyoj uan taueyika ijkon kemej España. Maski akin ompa nemiaj katkaj kemej eyi millones, tajtouayaj panoua 800 tajtolmej. Sayoj ke tel miakej no tajtouayaj pidgin de Nueva Guinea, tein moixmati kemej tok pisin.

Yekinika nechtitankej itech se nechikol kampa tajtouayaj inglés ompa Port Moresby. Sayoj ke amo niuejkauak porin satepan nitapaleuito itech se nechikol kampa tajtouayaj tok pisin uan peuak nimomachtia nejon tajtol. Niman ika nitanojnotsaya tajtolmej tein nimomachtiaya. Nejon nechpaleuij maj niman niueli nejon tajtol. Uan amo uejkaua niktemakayaya tanojnotsmej itech tajtol tok pisin. Ayamo ajsia se xiuit keman niajsik Papúa Nueva Guinea uan nechixtalijkej maj nikinkalpano nechikolmej, uan no nechiluijkej maj nitakalpano kampa tajtouayaj tok pisin itech miak uejueyi xolalmej.

Kemej ueuejka moajsiaj nechikolmej, monekik nikixyekanas miak uejueyi nechikolmej, nejon kichiuak maj miakkan niajtinemi. Nimomachiliaya noselti porin ayamo nikixmatia ueyi altepet, nion kemej tajtouayaj uan tein kichiuayaj. Kemej semi tepeyoj katka uan ouijkan, amo onkayaj carreteras uan sayoj uelia nikuia avión para nias itech sejse nechikol. Miakpa noselti niaya itech avión tein amo semi kualtiaya, uan semi nimouia kemej keman niaya itech lancha.

Amo miakej kipiayaj teléfono, yejua ika nikintitaniliaya cartas tokniuan. Miakpa achto nejua niajsia ke cartas tein nikijkuilouaya, uan yejua ika monekia nikintajtanis akin ompaka nemiaj maj nechiluianij kani nemiaj tokniuan. Keman nikinajsia, nochipa kuali nechseliayaj uan nikelnamikia keyej niaya nikinkalpanoti. Nikitak keniuj nechpaleuij Jehová uan nejon kichiuak maj nikmachili ke nouan yetoya.

Itech yekinika nechikol tein nikpiak itech se isla tein motokaytia Bougainville, se tokniuj takat uan isiuatsin akin semi yolpakiaj nechtajpalojkej. Nechtajtanijkej: “¿Titechelnamiki?”. ¡Kemaj nikinelnamikia! Nikinnojnotska keman yekinika niajsik Port Moresby, uan nikinmachtijka ika Biblia. Sayoj ke satepan, se tokniuj akin ompa nemia kisentokak kinmachtia, uan moauijkajya. Nejon katka semej tatiochiualismej tein Jehová nechmakak keman eyi xiujmej nietoya Papúa Nueva Guinea.

NOCHANKAUAN AMO MIAKEJ KATKAJ UAN SEMI TEKITIAJ

Niajki de Coron itech xiuit 1978, sayoj ke achto nikixmatik se tokniuj siuat akin semi tekitia uan monotsaya Adel. Yejua iselti kiniskaltijtoya ome ikoneuan, Samuel uan Shirley, kiyekpiaya inan uan no katka precursora regular. Itech metsti mayo xiuit 1981, nimokepak Filipinas para iuan nimonamiktis. Peuak tiksentekitiliaj Jehová kemej precursores regulares uan tikinyekpiaj tochankauan.

Maski nikinpiayaya nochankauan, itech xiuit 1983 oksepa nechixtalijkej kemej precursor especial. Nechiluijkej maj nitapaleuiti itech isla de Linapacan, ompa Palawan. Maski uejka katka uan amo akin katka itaixpantijkauj Jehová, tiajkej tinochin ompa tinemitoj. Keman tikuikayajya ompa kemej se xiuit, inan Adel momikilij. Maski semi timotayokoltiayaj, tiksentokayaj titanojnotsayaj uan nejon semi techpaleuij. Uan kemej miakej akin tikinmachtiayaj ika Biblia kichiuayaj tein momachtiayaj, tikitakej ke itech nejon isla monekia maj mochijchiua se Kali kampa tiMosentiliaj. Uan tikchijchiujkej se tsikitsin kali. Semi tiyolpakkej keman tikitakej ke touan mosentilijkej 110 keman tikelnamikkej imikilis Cristo maski yekin tikuikayaj eyi xiuit. Uan miakej moauijkej satepan ke tiajkej.

Itech xiuit 1986, nechtitankej Culion, itech se isla kampa miakej kipiayaj lepra. Satepan Adel no kiixtalijkej kemej precursora especial. Keman tiajsikej, tikinmouiliayaj tikinnojnotsaskej akin ininnakayo tamantik katka por kokolis lepra. Sayoj ke tokniuan akin ompa nemiaj, techiluijkej ke akin kipiayaj lepra kinpajtijtoyajya uan ke amo techmauaskiajok. Sekin yayaj nechikolmej ichan se tokniuj siuat. Niman timomatkej uan semi tiyolpakkej tikiniluiskej ke Biblia kijtoua ke amo akinok kokolispeuas porin yejuan kimachiliayaj ke Dios uan oksekin kinixtopeuayaj. Kuali timomachiliayaj keman tikitayaj ke yolpakiaj keman kimatiaj ke amo akin kokolispeuaskiaok (Luc. 5:​12, 13).

¿Toni kinpaleuij tokoneuan maj momatikan ompa Culion? Adel uan nejua tikinyoleujkej ome ichpochmej de Coron para maj tokoneuan kinpianij akonimej iniuan mouikaskej. Samuel, Shirley uan nejin tokniuan kiuelitayaj kinmatiltiskej oksekin tein kijtoua Biblia. Yejuan kinmachtiayaj miakej pipilkonemej, uan Adel uan nejua tikinmachtiayaj inintatuan. Kemansa tikinmachtiayaj hasta 11 kalyetonij. Tikinmachtijtoyaj tel miakej akin peuayaj kitekitiliayaj Jehová uan uelik tikchiujkej se yankuik nechikol.

Kampa niajsik sayoj nejua katka nitayekankej. Yejua ika tokniuan de Betel nechnauatijkej maj nejua nikixyekana nechikolmej sejse semana kampa mosentiliayaj chikueyi tanojnotsanij ompa Culion, uan itech xolaltsin tein monotsa Marily kampa mosentiliayaj chiknaui tanojnotsanij no nejua monekia nikixyekanas nechikolmej. Para ompa tiajsiskej monekia tikpanauiskej mar eyi hora. Satepan ke tamia nechikol, iniuan nochankauan tinejnemiaj miak horas itech tepemej para titamachtitiuij itech se xolaltsin tein monotsa Halsey.

Satepan tel miakej mochiujkej itaixpantijkauan Jehová ompa Marily uan Halsey, yejua ika itech sejsemej de nejon xolaltsitsin monekik tikchijchiuaskej se Kali kampa tiMosentiliaj. Ijkon kemej kichiujkej Linapacan, tokniuan uan oksekin akin kuali techkakiaj kitemakakej miak taman tein mokuiskia para mochijchiuas kali uan tel tekitikej. Itech kali tein kichijchiujkej Marily uelia mosentiliayaj 200 uan uelia mopatauaya para mochiuaskej uejueyi nechikolmej.

NITAYOKOYAK, NIMOMACHILIJ NOSELTI UAN OKSEPA NIYOLPAKIK

Itech xiuit 1993, keman tokoneuan moskaltijkajya, Adel uan nejua peuak tikinkalpanouaj nechikolmej ompa Filipinas. Satepan, itech xiuit 2000, nechyoleujkej maj nikseli Tamachtilis tein kinpaleuia Tokniuan Takamej itech iTekiyo Dios para maj satepan nejua nitamachti. Nikmachiliaya ke amo ueliskia nikchiuas nejon tekit, sayoj ke Adel nochipa nechyolchikauaya uan nechelnamiktiaya ke Jehová nochipa nechpaleuiskia maj ueli nikchiua (Filip. 4:13). Adel kimatia tein nechiluiaya porin yejua kisentokaya kitekitiliaya Jehová maski mokokouaya.

Itech xiuit 2006 keman nitamachtijtoya, Adel kiajxilijkej párkinson. Amo tikneltokayaj. Nikiluij ke ueliskia tikauaskej tekit tein tikchiujtoyaj para ueliskia okachi nikyekpias, sayoj ke yejua nechiluij: “Nikneki xiktemo se tapajtijkej akin nechitas. Nitakuaujtamati ke Jehová techpaleuis maj tiksentokakan tikchiuakan tekit tein tikpiaj”. Adel kisentokak yolpakik chikuasen xiujmej keman kitekitilij Jehová. Keman amo ueliaok nejnemia, tanojnotsaya itech isilla de ruedas. Keman amo semi ueliaok tajtouaya, tanankiliaya itech nechikolmej ika se oso ome tajtolmej. Miakej tokniuan kitajkuilouiliayaj uan kitasojkamatiliayaj porin amo keman kikauak Jehová hasta ke momikilij itech xiuit 2013. Panoua 30 xiujmej iuan nietoya nosiuatsin Adel akin semi nechpaleuiaya uan tetasojtaya, sayoj ke kemej amo nemiaok semi nimotayokoltiaya uan nimomachiliaya noselti.

Niksentokak nikchiuak tekit tein nikpiaya ijkon kemej Adel kinekia. Kemej nikchiujtoya miak taman, nechpaleuij maj amo nimomachiliok noselti. Itech xiuit 2014 hasta xiuit 2017 nechnauatijkej maj nitakalpano itech nechikolmej kampa motajtoua tagalo itech altepemej kampa amo uelia se tanojnotsaya. Satepan nitakalpanoj itech nechikolmej kampa no tajtouaj tagalo ompa Taiwán, Estados Unidos uan Canadá. Itech xiuit 2019, no peuak niktemaka Tamachtilis para akin kiteixmatiltiaj iTaixyekanalis Dios itech tajtol inglés ompa India uan Tailandia. Semi niyolpakik nikchiuas nejon tekimej. Okachi niyolpaki keman okachi niktekitilia Jehová.

NOCHIPA TECHPALEUIAJ KEMAN MONEKI

Kampa nitapaleuiani, nochipa nikintasojtani tokniuan. Yejua ika semi nitayokoya keman nikinkaujteua. Sayoj ke keman niouj okseko nochipa nitakuaujtamati iuan Jehová. Miakpa nikitani keniuj nechpaleuia, uan nejon nechyolchikaua keman mopata teisa. Axkan nitapaleuia kemej precursor especial nikan Filipinas. Semi niyolpaki itech nechikol kampa nietok porin tokniuan mochiujkej kemej nochankauan akin nechyekpiaj. Uan semi niyolpaki porin Samuel uan Shirley kisentokaj kitekitiliaj Jehová ijkon kemej kichiuak ininmomaj (3 Juan 4).

Nechpanouani miak taman tein amo kuali porin nikitak keniuj tajyouij nosiuatsin uan yolik okachi tanaujtiaj porin motelkokouaya. Uan keman mopataya teisa no monekik nimomatis ijkon ninemis. Sayoj ke nikitani ke Jehová “amo uejka yetok” de nejua (Hech. 17:27). ‘Imay Jehová amo teyi kitsakuiliaʼ para kinpaleuis uan kinyolchikauas itekitikauan maski tel uejka moajsiskej (Is. 59:1). Semi niktasojkamatilia Jehová porin kemej yeskia noTepejxit akin nochipa nouan yetoni. Amo keman nietoya noselti.