Maj nion teyi mitsontsakuili xionmoaui

1. ¿Keyej tiknekij timoauiskej?

¿TIKONTASOJTA Jehová, akin mitsonmakani nochi tein tikonpia, uan hasta kichiua xionyolto? ¿Tikonneki tikonnextilis ke tikontasojta? Uelis ijkon tikonchiuas komo iuan tionmotemaktia uan tionmoauia. Keman tikonchiuas nejon, peuas tionpouis iniuan ichankauan Jehová. Ijkon, moTajtsin uan motasojikniuj mitsonixyekanas uan mitsonyekpias porin yeski tiiaxka (Sal. 73:24; Is. 43:​1, 2). Uan no, komo tionmotemaktia iuan Dios uan tionmoauia uelis tikonchias tionnemis nochipaya (1 Ped. 3:21).

2. ¿Toni tikitaskej itech nejin tamachtilis?

² Xa teisa kichiujtok amo xionmoaui, komo ijkon amo xionmotekipacho porin amo sayoj tejuatsin ijkon mitsonpanouani. Tel miakej akin moauijkejya no monekik kipataskej miak taman tein kichiuayaj uan tein kinemiliayaj uan axkan kuali kitekitilijtokej Jehová uan yolpakij. Itech nejin tamachtilis ininka titajtoskej sekin akin moauijkej itech yekinika siglo. Tikitaskej keyej kinouijmakak moauiskej uan toni kinpaleuij. Keman timomachtijtiaskej, xikonita toni uelis mitsonmachtis yeski tiontelpoch oso amo.

SAMARITANOS MOAUIJKEJ

3. ¿Keyej samaritanos xa kinouijmakak moauiskej?

³ Keman Jesús nemia, samaritanos senpouiaj itech se taneltokalis. Miakej nemiaj amo uejka de Siquem uan Samaria, kampa ika norte de Judea. Para ueliskia moauiskej monekia kuali kiixmatiskej tein kijtoua iTajtol Dios porin kinemiliayaj ke sayoj Génesis hasta Deuteronomio katka iTajtol Dios, uan xa amatajkuilol Josué no. Sayoj ke kemej kimatiaj tein Dios motenkaujka itech Deuteronomio 18:​18, 19, kichiayaj maj ejko Mesías (Juan 4:25). Para moauiskej monekia kineltokaskej ke Jesús katka Mesías akin moijtojka ke ualaskia, uan miakej samaritanos ijkon kichiujkej (Juan 4:39). Uan kemej tel miakej akin kichiuayaj kemej Cristo katkaj judíos, sekin samaritanos monekik mochikauaskej amo kinchikoitaskejok (Luc. 9:​52-54).

4. Kemej kijtoua Hechos 8:​5, 6, 14, ¿toni kichiujkej samaritanos keman Felipe kinixmatiltij kuali tanauatilmej?

⁴ ¿Toni kinpaleuij samaritanos maj moauikan? Keman Felipe akin kiteixmatiltiaya kuali tanauatilmej “peuak kiteixmatiltia Cristo”, sekin ‘peuak kineltokaj itajtol Dios’ (xikonlero Hechos 8:​5, 6, 14). Samaritanos kikakkej maski Felipe katka judío. Xa kielnamikkej seki versículos kampa kijtoua ke Dios amo techichikotasojta (Deut. 10:​17-19). Yejuan “kuali kikakiaj tein Felipe kijtouaya” de Cristo, uan kineltokakej ke Dios kititanka porin no kichiuaya miak milagros, kinpajtiaya akin mokokouayaj uan kinkixtiliaya oksekin amokuali ejekamej (Hech. 8:7).

5. ¿Toni mitsonmachtia tein kichiujkej samaritanos?

⁵ Samaritanos ueliskia amo kikakiskej Felipe porin yejua katka judío oso porin amo keman kikaktoyaj tein tamachtiaya. Sayoj ke yejuan amo ijkon kichiujkej, ta niman moauijkej keman kineltokakej ke yekmelauj katka tein Felipe tamachtiaya. Biblia kijtoua: “Keman Felipe kinixmatiltij kuali tanauatilmej tein ika tajtoua iTaixyekanalis Dios uan itokay Jesucristo, kineltokilijkej uan moauijkej takamej uan siuamej” (Hech. 8:12). Uan tejuatsin, ¿tikonneltoka ke yekmelauj tein kijtoua Biblia? ¿Tikonneltoka ke itaixpantijkauan Jehová motasojtaj ijkon kemej Jesús kijtoj ke motasojtaskiaj imomachtijkauan? (Juan 13:35). Komo ijkon, amo xikonmouili tionmoauis. Jehová mitsontatiochiuis.

6. ¿Toni mitsonmachtia tein kipanok Ruben?

⁶ Ruben akin nemi Alemania, kiixmatik Jehová desde ke katka piliok porin ichankauan itaixpantijkauan Jehová, sayoj ke keman katka telpoch peuak motajtania ox Dios yekmelauj nemi. ¿Toni kipaleuij? Yejua kiitak ke kipolouaya okachi momachtis, yejua ika kiixtalij kichiuas nejon. Yejua kijtoua: “Para nikmatis toni nikneltokas, peuak nimomachtia tein nechpaleuiskia. Yejua ika niktemoj tamachtilis kampa kijtoua ox aksa tachijchiuak oso nochi iselti nesik”. Kileroj amaix ¿Existe un Creador que se interese por nosotros?, nejon kipaleuij maj okachi takuaujtamati. Yejua kijtoua: “Nikelnamiki ke keman nikleroj nimomakak cuenta ke Jehová yekmelauj nemi”. Uan no, Ruben ixmatito ueyi kali kampa techixyekanaj uan semi kimojkaitak kiitas ke itech nochi taltikpak itekitikauan Dios kuali mouikaj. Keman mokepak Alemania moauij, ijkuak kipiaya 17 xiuit. Komo amo semi tikonneltoka tein tionmomachtiani itech Biblia, xikontemo tamachtilis itech toamaixuan. Komo kuali timomachtiaj techpaleuis maj tikneltokakan tein tamachtia Biblia (Efes. 4:​13, 14). Uan keman tikonkakis keniuj itekitikauan Jehová itech nochi taltikpak kuali mouikaj uan motasojtaj, uan keman tikonitas ke itech monechikol no ijkon kichiuaj, okachi tikontasojtas tokniuan itech nochi taltikpak.

SAULO DE XOLAL TARSO MOAUIJ

7. ¿Toni kinemiliaya Saulo, uan keyej monekia kipatas nejon?

⁷ Maj tiknemilikan tein kipanok Saulo de xolal Tarso. Yejua kuali momachtij inintaneltokalis judíos, uan miakej peuaya kiixmatiaj (Gál. 1:​13, 14; Filip. 3:5). Itech nejon tonalmej miakej judíos kinemiliayaj ke akin kichiuayaj kemej Cristo katkaj apóstatas, yejua ika Saulo semi kintajyouiltiaya. Yejua kinemiliaya ke kichiujtoya tein Dios kinekia (Hech. 8:3; 9:​1, 2; 26:​9-11). Komo Saulo kineltokaya Jesús uan moauiaya kemej imomachtijkauj, ipa kitajyouiltiskiaj.

8. 1) ¿Toni kipaleuij Saulo maj moaui? 2) Kemej kijtoua Hechos 22:​12-16, ¿keniuj Ananías kipaleuij Saulo? (No xikonita taixkopin).

⁸ ¿Toni kipaleuij Saulo maj ueli moaui? Keman Jesús kiualnojnotsak desde iluikak, se tanex kiixmiktij Saulo (Hech. 9:​3-9). Eyi tonalmej amo kikuaj nion teyi, uan xa itech tanemilijtoya tein kipanok. Kineltokak ke Jesús katka Mesías uan ke taneltokalis tein melauak yejuan akin kichiuayaj kemej Cristo. Uan xa no semi motayokoltij porin tapaleuij maj kimiktikan Esteban (Hech. 22:20). Keman panok nejon eyi tonalmej, Ananías se imomachtijkauj Jesús kiitato Saulo, yejua kuali kinojnotsak, kichiuak maj oksepa tachia uan kiluij maj niman moaui (xikonlero Hechos 22:​12-16). Saulo moyolyemanij, kikakik Ananías uan moauij (Hech. 9:​17, 18).

9. ¿Toni mitsonmachtia tein kichiuak Saulo?

⁹ Tein kichiuak Saulo techmachtia miak taman. Yejua amo moauiskia komo moueyimatiskia oso mouiskia. Sayoj ke amo kichiuak nejon. Saulo katka yolyemanik uan kipatak seki taman para ueliskia mochiuas imomachtijkauj Jesús (Hech. 26:​14, 19). Yejua kiixtalij kitojtokas Cristo maski kimatia ke kitajyouiltiskiaj (Hech. 9:​15, 16; 20:​22, 23). Satepan ke moauij, kisentokak takuaujtamatik iuan Jehová keman kiixnamikik miak taman tein amo kuali (2 Cor. 4:​7-10). Keman tejuatsin tionmoauis para tionmochiuas itaixpantijkauj Jehová, xa mitsontajyouiltiskej oso mitsonixnamikiskej, sayoj ke amo tionyetos moselti. Jehová uan Jesús nochipa mitsonpaleuiskej (Filip. 4:13).

10. ¿Keniuj mitsonpaleuia tein kipanok Anna?

¹⁰ Maj tikitakan tein kipanok Anna, akin nemi Europa del Este. Satepan ke imomaj moauij, ipopaj Anna kikauak maj momachti Biblia keman kipiaya 9 xiujmej. Sayoj ke okseki ichankauan akin no nemiaj ichan peuak kiixnamikij keman kimatkej ke momachtijtoya Biblia iniuan itaixpantijkauan Jehová. Ichankauan kinemiliayaj ke semi tepinaujtij katka maj aksa mochiuani itaixpantijkauj Jehová. Keman kipiaya 12 xiuit, Anna kiluij ipopaj ke kinekia moauis. Ipopaj kitajtanij ox kinekia moauis porin yejua ijkon kinekia oso porin kichikaujkauiayaj. Yejua kinankilij: “Semi niktasojta Jehová”. Yejua ika ipopaj kiitak ke kuali yetoya maj moauiani. Satepan ke moauij, ichankauan Anna kisentokayaj kikejkelouayaj uan kitajyouiltiayaj. Semej ichankauan kiluij: “Okachi kuali tietoskia komo tiauilnemiskia uan titachichinaskia ke tiyeski tiitaixpantijkauj Jehová”. ¿Keniuj Anna uelik taxikoj? Yejua kijtoua: “Jehová nechpaleuij maj nitaxiko, uan nomaj uan nopaj no semi nechpaleuijkej”. Anna kijkuiloj tein Jehová kichiuani para kipaleuis uan kemansa kileroua para amo kielkauas. Komo tejuatsin tionmoui maj mitsonixnamikikan oso mitsontajyouiltikan, xikonelnamiki ke Jehová no mitsonpaleuis (Heb. 13:6).

CORNELIO MOAUIJ

11. ¿Toni ueliskia kichiuas maj Cornelio amo moaui?

¹¹ No uelis techmachtis tein kichiuak Cornelio. Yejua katka se takat “akin kinixyekanaya 100 soldados” (Hech. 10:1). Yejua ika semi kiixmatiaj kampa nemia uan kampa taixyekanaya. Biblia no kijtoua ke Cornelio “semi kinpaleuiaya pobres” (Hech. 10:2). Jehová kititanik tatitanil Pedro para maj kimatiltiani kuali tanauatilmej. ¿Toni kichiuak Cornelio? ¿Uejkauak mochiak para moauis porin kitelixmatiaj?

12. ¿Toni kipaleuij Cornelio maj moaui?

¹² ¿Toni kipaleuij Cornelio maj moaui? Biblia kijtoua ke “kimojkatokaya Dios iniuan nochin akin nemiaj ichan” uan ‘nochipa kitataujtiaya’ (Hech. 10:2). Keman Pedro kimatiltij kuali tanauatilmej, Cornelio uan ichankauan kineltokakej Cristo uan niman moauijkej (Hech. 10:​47, 48). Tikmatij ke Cornelio kinekik kipatas seki taman para uelis kiueyichiuas Jehová iniuan ichankauan (Jos. 24:15; Hech. 10:​24, 33).

13. ¿Toni mitsonmachtia tein kichiuak Cornelio?

¹³ Ijkon kemej Saulo, Cornelio katka ueyichiujkej uan nejon ueliskia kitsakuilis maj kitojtoka Cristo. Sayoj ke yejua amo kikauak maj nejon kitsakuili. Uan tejuatsin, ¿no moneki tikonpatas miak taman para tionmoauis? Komo ijkon, Jehová mitsonpaleuis. Yejua mitsontatiochiuis komo tionmochikaua tikonchiuas tein Biblia kijtoua.

14. ¿Keniuj mitsonpaleuia tein kipanok Tsuyoshi?

¹⁴ Tsuyoshi, se tokniuj takat akin nemi Japón, monekik kipatas seki taman tein kichiuaya kampa tekitia para uelis moauis. Yejua kipaleuiaya akin taixyekanaya itech escuela Ikenobo kampa momachtiayaj keniuj tachijchiuaskej ika xochit. Akin taixyekanaya kiuikaya xochimej kampa aksa momikiliaya uan teuantia itech tein kichiuayaj budistas keman aksa momikiliaya. Keman amo uelia yaya, Tsuyoshi monekia yas uan yejua monekia teuantis iniuan budistas. Sayoj ke keman momachtij itech Biblia keniuj moajsij mikemej, kiitak ke amo ueliskia moauis komo kisentokaya kichiuaya nejon. Yejua ika, amo kichiuakok (2 Cor. 6:​15, 16). Kinojnotsak akin taixyekanaya itech nejon escuela, uan kiluij keyej amo teuantiskiaok uan yejua kikauak maj kisentoka tekiti maski kichiuaskia okse tekit. Tsuyoshi moauij kemej se xiuit satepan ke peuak momachtia Biblia.a Komo moneki tikonpatas seki taman tein tikonchiua itech motekiuj para tikonyolpaktis Dios, xikonmati ke yejua mitsonpaleuis tejuatsin uan mochankauan para maj amo teyi namechpolo (Sal. 127:2; Mat. 6:33).

AKIN NEMIAJ CORINTO MOAUIJKEJ

15. ¿Toni ueliskia kichiuas maj amo moauikan akin nemiaj Corinto?

¹⁵ Akin nemiaj Corinto kinixmatiaj ke semi tekitiaj para kipiaskej miak taman uan ke semi auilnemiaj. Miakej kichiuayaj miak taman tein Jehová techiluia ke amo kuali. Yejua ika semi ouij yeskia maj aksa peuani kitekitiliani Jehová. Sayoj ke keman tatitanil Pablo ajsik itech nejon xolal uan peuak kinmatiltia kuali tanauatilmej de Cristo, miakej de Corinto akin kikakkej ‘peuak taneltokaj uan moauiaj’ (Hech. 18:​7-11). Uan no, toTekotsin Jesucristo monextij iixpan Pablo uan kiluij: “Onkakej miakej itech nejin ueyi xolal akin notech taneltokaskej”. Yejua ika, tatitanil ompa mokauak se xiuit uan tajko para tanojnotsas.

16. ¿Toni kinpaleuij maj moauikan akin nemiaj Corinto? (2 Corintios 10:​4, 5).

¹⁶ ¿Toni kinpaleuij maj moauikan akin nemiaj Corinto? (Xikonlero 2 Corintios 10:​4, 5). Dios kinpaleuij ika iTajtol uan ichikaualis maj kipatakan kemej nemiaj (Heb. 4:12). Akin nemiaj Corinto kuali kiselijkej kuali tanauatilmej uan amo kichiuayajok seki taman tein amo kuali, kemej tauanaskej, tachtekiskej uan auilnemiskej iniuan inintakaikniuan oso ininsiuaikniuan (1 Cor. 6:​9-11).b

17. ¿Toni mitsonmachtia tein kichiujkej akin nemiaj Corinto?

¹⁷ Sekin akin nemiaj Corinto, monekik kipataskej miak taman para ueliskia moauiskej, sayoj ke amo keman kinemilijkej ke amo ueliskia kichiuaskej. Yejuan semi mochikaujkej para yaskej itech ‘ojti kampa takopitsyan tein teajxitia kampa se nemis nochipaya’ (Mat. 7:​13, 14). ¿Uan tejuatsin? ¿Tionmochikaujtok tikonkauas seki taman tein amo kuali yetok? ¡Amo xionmosenkaua! Xikontajtani Jehová maj mitsonpaleui ika ichikaualis para uelis tikonixtopeuas tein amo kuali tein tikonnejneki tikonchiuas.

18. ¿Keniuj mitsonyolchikaua tein kipanok Monika?

¹⁸ Monika, akin nemi itech altepet Georgia, monekik semi mochikauas keman katka siuapilok para amo kiitasok tein amo kuali uan para amo kijtosok pitsotik tajtolmej porin kinekia moauis. Yejua kijtoua: “Achto ke nimoauis Jehová nechpaleuij maj ueli nimopata porin nechmakaya chikaualis keman niktataujtiaya, Jehová kimatia ke niknekia nikchiuas tein kuali uan nochipa nouan yetoya para nechpaleuis uan nechixyekanas”. Monika moauij keman kipiaya 16 xiujmej. Uan tejuatsin, ¿no moneki tikonkauas seki taman para tikonyolpaktis Jehová uan tikontekitilis? Dios mitsonmakas ichikaualis komo tikonsentoka tikontajtania para uelis tikonpatas tein moneki (Juan 3:34).

KOMO TIONTAKUAUJTAMATI UELIS TIKONIXNAMIKIS TEIN YESKI TAMAN

19. ¿Toni mitsonpaleuis xikonixnamiki ouijkayomej tein kemej yeskiaj tepemej? (No xikonita taixkopin).

¹⁹ Amo xikonelkaua ke Jehová mitsontasojta uan kineki xionpoui iniuan ichankauan, uan nochipa ijkon yeski hasta keman monekis tikonixnamikis miak taman para uelis tionmoauis. Jesús kiniluij sekin imomachtijkauan: “Komo namotakuaujtamatilis tamati kemej se pisiltik xinach tein kiluiaj mostaza, uelis nankiluiskej nejin tepet ‘Ximoajchiua’, uan moajchiuas; nochi uelis nankichiuaskej” (Mat. 17:20). Nejon imomachtijkauan Jesús sayoj seki xiujmej iuan yetoyaj, yejua ika monekia kisentokaskej okachi takuaujtamatiskej. Maski ijkon, Jesús motenkauak iniuan ke komo semi takuaujtamatiaj, Jehová kinpaleuiskia maj kiixnamikikan tein yeski taman tein kemej yeskiaj tepemej. ¡Uan tejuatsin no mitsonpaleuis!

20. ¿Toni mitsonmachtia tein kichiujkej ne uejkauj uan itech nejin tonalmej?

²⁰ Komo tikonita ke teisa mitsontsakuilia para uelis tionmoauis, niman xikonchiua tein monekis. Tikitakejya tein kichiujkej miakej tokniuan itech yekinika siglo uan itech nejin tonalmej tein uelis techyolseuiskej uan techyolchikauaskej. Komo inintech tiontanemilia tikonitas keniuj mitsonyolchikauaskej para tionmotemaktis iuan Jehová uan tionmoauis. ¡Komo ijkon tikonchiua yejua tein okachi kuali yeski!