Tein tajtanij akin taixtajtoltiaj
¿Hasta kemanian amo tikteixmatiltiskejok kuali tanauatilmej?
Jesús kijtoj: “Itech nochi taltikpak moteixmatiltis kuali tanauatilmej tein ika tajtoua iTaixyekanalis Dios uan ijkon nochin uelis kikakiskej, uan satepan tatamis” (Mat. 24:14). Itech nejin versículo uan itech versículos 6 uan 13 kampa no mokui tajtol “tatamis”, itech griego moijtoua télos. Nejin tajtol kijtosneki keman itech Armagedón senkis ixpoliuis nochi tein Satanás kiixyekantok (Apoc. 16:14, 16). Yejua ika tiksentokaskej tikteixmatiltiskej kuali tanauatilmej hasta tepitsin achto ke mochiuas Armagedón. Nejin se taman tein mopatak, porin achto no taman kemej tikajsikamatiaj.
Achto tikajsikamatiaj ke keman kiixpoloskiaj Ueyi Babilonia uan peuaskia tetsaujkatajyouilis, amo tikteixmatiltiskiajok kuali tanauatilmej (Apoc. 17:3, 5, 15, 16). Tikneltokayaj ke Jehová amo akin kikauaskiaok maj kiseli kuali tanauatilmej keman peuaskia tetsaujkatajyouilis (Is. 61:2). No tiknemiliayaj ke sayoj momakixtiskiaj itech tetsaujkatajyouilis akin kitekitilijtoskiaj Jehová achto ke peuaskia. Tikijtouayaj ke yejuan yeskiaj kemej judíos akin momakixtijkej keman kiixpolojkej Jerusalén itech xiuit 607 achto ke ualaskia Cristo. Yejuan kemej yeskia kinneskayotijkaj porin kiueyichiuayaj Jehová uan kitauelitayaj tein amo kuali (Ezeq. 5:11; 9:4). Sayoj ke nejin amo yejua tein Jesús kijtoj itech Mateo 24:14, kampa kijtoua ke miakej uelis kiseliskejok kuali tanauatilmej tepitsin achto ke mochiuas Armagedón keman senkis ixpoliuis tein amo kuali.
Mopatak kemej tikajsikamatiaj Mateo 24:14, yejua ika no mopatak kemej tikajsikamatiaj Apocalipsis 16:21, kampa ika motajtoua uejueyi tesiuit kemej yeskia tet. Keman okachi timomachtijkej nejin ome textos, tikitakej ke nochin ome ika tajtoua kuali tanauatilmej. ¿Keyej? Tein kijkuiloj tatitanil Pablo uelis techpaleuis maj tikajsikamatikan. Yejua kijtoj ke “akin momakixtitij” kiitaj ke kuali tanauatilmej “kualtsin ajuiyak uan kichiua maj nemikan”. Sayoj ke akin kiixnamikij Dios, kiitaj ke kuali tanauatilmej “tsojyak kemej teisa tein miket” (2 Cor. 2:15, 16). Yejuan kitauelitaj kuali tanauatilmej porin kinextia ke amo kichiujtokej tein kuali, ke Satanás kinixyekana uan ke amo uejkaua kiixpoloskej. Yejua ika, tein kijtouaj nejin ome textos ika tajtouaj kuali tanauatilmej, sayoj ke tataman kemej kiseliaj akin tikinixmatiltiaj (Juan 7:7; 1 Juan 2:17; 5:19).
Uan no, tesiuit tein ika tajtoua Apocalipsis 16:21 kijtoua ke “semi ueyi” yeski. Nejin xa kijtosneki ke keman mochiujtos tetsaujkatajyouilis, okachi nesis ke melauj tein tikteixmatiltiaj. Uan yejua ika okachi miakej kiixmatiskej Jehová (Ezeq. 39:7). ¿Kijtosneki ke satepan ke kiixpoloskej Ueyi Babilonia yetoskejok akin kiitaskej ke kuali tanauatilmej kemej yeskia teisa tein ajuiyak uan kinekiskejok kikakiskej? Xa ijkon panos. Xa kielnamikiskej oso momakaskej cuenta ke itaixpantijkauan Jehová miak xiujmej kiteixmatiltijtoyaj ke ixpoliuiskiaj taneltokalismej tein takajkayauaj.
No ijkon panok ne uejkauj keman Dios kintatsakuiltij ika majtakti taman akin nemiaj Egipto. Satepan ke Jehová ‘kinpinaujtij nochin dioses de Egipto’, “tel miakej” akin amo katkaj israelitas no kintojtokateujkej itekitikauan Dios (Éx. 12:12, 37, 38). Xa ijkon kichiujkej keman kiitakej ke mochiujtiaya nochi majtakti taman tein Moisés kijtojtiaya.
Akin kiixtaliskej kitekitiliskej Jehová satepan ke kiixpoloskej Ueyi Babilonia, uelis kinpaleuiskej iikniuan Cristo akin yetoskejok nikan taltikpak (Mat. 25:34-36, 40). Uan komo kinekij maj Jesús kinita kemej ichkamej keman kiixtalis tein technamiki tikseliskej, moneki mopataskej uan kichiuaskej tein kuali achto ke peuas Armagedón, ijkuak, taijitalmej akin yetoskejok nikan taltikpak yaskejya iluikak.
Kemej axkan tikajsikamatij nejin tamachtilis, kinextia ke Jehová semi techtasojta uan techiknelia. Uan ijkon kichiua porin “amo kineki maj nion akin ixpoliui, ta maj nochin moyolpatakan” (2 Ped. 3:9).