Maski amo semi nitajtouaya, uelik nimochiuak nimisionera

Niyolik itech xiuit 1951 ompa Viena (Austria). Notatuan katkaj católicos, uan maski amo semi nitajtouaya, nikneltokaya Dios uan nochipa niktataujtiaya. Keman nikpiaya chiknaui xiuit, itaixpantijkauan Jehová peuak kimachtiaj nopaj uan satepan nomaj no peuak momachtia.

Niman peuak timonechikouaj ompa Viena itech se nechikol tein monotsa Döbling. Iniuan nochankauan tiksenchiuayaj miak taman, tiklerouayaj Biblia uan timomachtiayaj, tiayaj nechikolmej uan titapaleuiayaj keman mochiuayaj uejueyi nechikolmej. Itech nejon xiujmej, nopaj semi nechpaleuij maj niktasojta Jehová. Uan keman motataujtiaya, nochipa kiluiaya Jehová maj nejua uan nokniuj siuapil timochiuanij precursoras, sayoj ke nejua niknekia nikchiuas okse taman.

KEMAN PEUAK NIKTEKITILIA JEHOVÁ MIAK TONALMEJ

Nimoauij itech xiuit 1965 keman nikpiaya 14 xiujmej. Sayoj ke semi nechouijmakaya nikinnojnotsas ika Biblia akin amo nikinixmatia. No niknemiliaya ke okseki telpochmej okachi ueliaj kichiuayaj miak taman ke nejua, uan niknekia maj kuali mouikakan nouan. Yejua ika, satepan ke nimoauij peuak iniuan nimouika akin amo kitekitiliaj Jehová. Maski nikuelitaya iniuan nimouikas, amo kuali nimomachiliaya porin nikmatia ke amo monekia nochipa iniuan nietos. Sayoj ke ipa niksentokaya iniuan nimouikaya. ¿Toni nechpaleuij maj amo ijkon nikchiuaok?

Nejon xiujmej, Dorothée se siuapil akin kipiaya 16 xiujmej peuak tanojnotsa kajkalpan. Nikitaya ke semi kiuelitaya tanojnotsas. Nejua tepitsin nikyekanaya, sayoj ke amo semi niaya nitanojnotsati. Yejua ika, niknemilij: “Notatuan itaixpantijkauan Jehová, sayoj ke Dorothée iselti momachtia. Moneki kiyekpias imomaj akin semi mokokoua, uan maski ijkon ipa semi tanojnotsa”. Tein kichiuaya nechpaleuij maj nikneki okachi niktekitilis Jehová. Tepitsin satepan, tiomen timochiujkej tiprecursoras uan tisentanojnotsayaj, yekinika timochiujkej tiprecursoras auxiliares uan satepan regulares. Kemej Dorothée semi kiuelitaya tanojnotsas, nejua no peuak semi nikuelita. Yejua nechpaleuij maj peua nikmachti aksa. Satepan, amo semi nechouijmakayaok nitanojnotsas kajkalpan, itech ojti uan kampa yeski.

Keman se xiuitya nitapaleuijtoya kemej precursora regular, kititankej se tokniuj takat akin monotsaya Heinz maj tapaleuiti kemej precursor especial itech tonechikol. Yejua peuak momachtia Biblia ompa Canadá keman kikalpanoto iikniuj akin katkaya itaixpantijkauj Jehová. Keman nikitak niman nikueuelitak. Sayoj ke yejua kinekia mochiuas misionero uan nejua amo, yejua ika amo niknextilij ke nikueuelitaya. Sayoj ke satepan timochiujkej novios, timonamiktijkej uan tiksentokayaj kemej precursores ompa Austria.

PEUA NIKNEJNEKI NIMOCHIUAS NIMISIONERA

Heinz miakpa nechiluiaya ke kinekia mochiuas misionero. Uan maski amo keman nechiluij maj nimochiua misionera, nechpaleuij maj no niknejneki keman nechiluiaya: “¿Ueliskia okachi tiktekitiliskej Jehová porin amo tikinpiaj pipil?”. Maski amo semi nitajtouaya ipa nitapaleuijtoyaya kemej precursora, sayoj ke nikmachiliaya ke amo ueliskia nitapaleuis kemej misionera. Maski ijkon, Heinz kisentokaya nechpaleuiaya maj niknemili nimochiuas nimisionera. No nechyolchikauak maj amo sayoj notech nitanemilijto, ta maj nikita keniuj nikinpaleuis oksekin. Tein nechyolmajxitij semi nechpaleuij.

Yolik peuak niknejneki nimochiuas nimisionera, yejua ika titajtankej tikseliskej Tamachtilis tein motemaka Galaad. Sayoj ke akin taixyekanaya Betel nechiluij maj okachi nimomachti inglés. Niman peuak nikchiua tein nechyolmajxitij, uan eyi xiuit satepan techtitankej maj titapaleuitij itech se nechikol kampa tajtouaj serbocroata ompa Salzburgo (Austria). Ompa titanojnotskej chikome xiuit, sayoj ke se xiuit titakalpanojkej itech nechikolmej. Maski nejon tajtol semi ouij katka, miakej tikinmachtiayaj ika Biblia.

Satepan, itech xiuit 1979, tokniuan akin taixyekanaj Betel techiluijkej maj tiajtiuetsinij Bulgaria. Kemej tokniuan de ompa amo ueliaj tanojnotsayaj techiluijkej maj tiknextianij ke kemej yeskia tinemitij. Techiluijkej maj amo titanojnotsakan, ta maj tikinuikilianij makuil tokniuan siuamej seki amaixmej tein tsikitsitsin. Yejuan nemiaj itech xolal Sofía ompa Bulgaria. Semi nimouia, sayoj ke Jehová nechpaleuij. Nikitak ke nejon makuil tokniuan semi yolpakiaj uan amo mouiaj maski ueliskia kintsakuaskej. Tein kichiuayaj nechyolchikauak maj nikchiua tein yeski tekit tein nechnauatiskia inechikol Dios.

Satepan oksepa titajtankej tikseliskej Tamachtilis tein motemaka Galaad uan techyoleujkej. Tiknemiliayaj ke tiaskiaj Estados Unidos uan tikseliskiaj nejon tamachtilis itech tajtol inglés. Sayoj ke itech noviembre xiuit 1981, inechikol Jehová no peuak kitemaka nejin tamachtilis itech Betel de Wiesbaden (Alemania). Uan okachi nikajsikamatik porin tamachtilis motemakak itech tajtol alemán. ¿Kani techtitaniskiaj?

TITAPALEUITOJ ITECH SE ALTEPET KAMPA SEMI MOTEUIAYAJ

Techtitankej Kenia. Sayoj ke Betel de ompa, techtajtanij ox tiknekiaj tiaskej titapaleuitiuij Uganda, se altepet tein yetoya tanakastan de Kenia. Kemej 10 xiujmej achto, se takat akin monotsaya Idi Amin uan kinixyekanaya soldados kitakuilijka tekiuaj de Uganda. Keman yejua taixyekantoya, tel miakej momikilijkej uan millones tel tajyouijkej. Uan itech xiuit 1979, akin kitauelitayaj Idi Amin kitakuilijkej para maj amo yejua taixyekanaok. Yejua ika amo semi niknekia nias porin itech nejon altepet motelteuiayaj. Sayoj ke tein timomachtijkej Galaad techpaleuij maj titakuaujtamatikan iuan Jehová, yejua ika tiknekkej tiaskej.

Ompa Uganda mochiujtoya miak taman tein amo kuali. Tekiuaj amo kitemakaya at, luz uan okseki taman tein monekia. Amo uelia se tanotsaya ika teléfono porin amo kualtiayaj. Akin ompa nemiaj momijmiktiayaj uan tachtekiaj, okachi ijkon kichiuayaj de youak. Yejua ika keman tayouayan katka nochin mokauayaj ininchan, moujtoyaj uan hasta motataujtiayaj para maj amo akin kintachtekiani oso kinmiktiani. Sayoj ke maski mochiujtoya miak taman tein amo kuali, tokniuan kisentokayaj semi takuaujtamatiaj iuan Jehová.

Itech xiuit 1982, Heinz uan nejua tiajsikej itech xolal Kampala, ompa Uganda. Keman tiajsikej, makuil metsti tinenkej ininchan Sam uan Christina Waiswa, akin kinpiayaj makuil ininpipiluan uan no ompa nemiaj naui ininchankauan. Yejuan sayoj takuayaj sepa itech tonal, maski ijkon nochipa techuantiaj tein kipiayaj. Keman iniuan tinemiaj techmachtijkej miak taman uan nejon techpaleuiskia satepan. Timomachtijkej timopakaskej ika amo miak at uan satepan tikuiaj para baño, ijkon amo tikauilouayaj. Itech xiuit 1983, tinemitoj okseko kampa amo semi mochiuaya tein amo kuali itech nejon xolal Kampala.

Semi tikuelitayaj titanojnotsaskej. Nikelnamiki ke se metsti tiktemakakej naui mil amaixmej. Sayoj ke okachi tiyolpakiaj keman tikitayaj ke akin tikinnojnotsayaj kiuelitayaj kiixmatiskej Dios. Heinz uan nejua tisejsemej tikinmachtiayaj ika Biblia kemej 10 oso 15, uan tein kichiuayaj techmachtiaya miak taman. Maski sejse semana monekia uejka nejnemiskej para yaskej nechikolmej, amo keman kijtouayaj ke amo kiuelitayaj uan nochipa yolpaktoyaj.

Itech xiuit 1985 uan 1986 ojpa moteuijkej itech altepet Uganda. Miakpa tikinitayaj pipil akin katkaj soldados uan kipiayaj uejueyi teposmej tein ika tetatoponiliayaj uan yejuan tatsakuiliayaj itech carreteras. Nochipa tiktataujtiayaj Jehová para maj tikmatinij toni tikchiuaskej uan maj amo timouinij keman titanojnotsayaj, uan yejua technankiliaya. Miakpa tikelkauayaj tein techpanouaya keman tikajsiaj aksa akin kinekia momachtis Biblia.

No semi tikuelitayaj tikinnojnotsaskej akin yajkaj nemitoj ompa Uganda. Sekin akin tikinmachtijkej katkaj Murat uan Dilbar Ibatullin, yejuan katkaj de Tartaristán (Rusia central). Murat katka tapajtijkej, uan nochin omen moauijkej uan axkan kisentokaj kitekitiliaj Jehová. Satepan nikixmatik Tatjana Vileyska, se siuat de Ucrania akin semi tayokoxtoya uan hasta kinemiliaya momiktis. Tatjana moauij, mokepak ialtepeuj uan satepan tapaleuij maj motajtolkepa toamaixuan itech tajtol ucraniano.a

TITAPALEUITOJ ITECH OKSE ALTEPET

Itech xiuit 1991, keman tipaxalotoj Austria, Betel de ompa technotsak uan techiluij ke techtitaniskiaj maj titapaleuitij Bulgaria. Miak xiujmej amo techkaujkej maj titanojnotsakan itech miak altepemej de Europa, sayoj ke nejon mopatakaya uan axkan ueliaya titanojnotsayaj, uan Bulgaria no katka semej de nejon altepemej. Kemej namechtapouijkaya, Heinz uan nejua ipa tiajkajya ompa para tikauatiuij seki amaixmej keman amo techkauayaj maj titanojnotsakan, sayoj ke axkan tiaskiaj para ompa titapaleuiskej.

Technauatijkej maj amo timokepakanok Uganda. Yejua ika, amo uelik tikuitoj tein tikpiayaj uan amo uelik timonauatijkej iniuan tokniuan, ta niman tiajkej Betel de Alemania, kampa techmakakej se carro uan desde ompa tikisteujkej para Bulgaria. Titapaleuitoj itech se grupo kampa sayoj moajsiaj kemej 20 tanojnotsanij itech se xolal tein monotsa Sofía.

Ompa Bulgaria tikpiakej okseki ouijkayomej. Yekinika, amo tiueliaj inintajtol. Ojpatika, sayoj tikinpiayaj ome amaixmej itech tajtol búlgaro: La verdad que lleva a vida eterna uan Tanojnotsmej tein ualeuaj itech Biblia. Uan expatika, semi ouij katka maj aksa peuani tikmachtianij ika Biblia. Maski ijkon, tokniuan semi kiuelitayaj tanojnotsaskej. Sayoj ke akin pouiaj itech Iglesia ortodoxa amo kiuelitakej maj titanojnotsanij uan yejua ika peuak techixnamikij.

Itech xiuit 1994, tekiuaj kijtoj ke itaixpantijkauan Jehová amo yeskiaok se taneltokalis, uan miakej akin ompa nemiaj techmouiliayaj porin kinemiliayaj ke tikchiuayaj tein amo kuali. Seki tokniuan kintsakkej. Techijtouiliayaj miak taman itech periódicos uan itech televisión, kijtouayaj ke tiitaixpantijkauan Jehová tikinkauaj tokoneuan maj momikilikan porin amo tiknekij maj kintalilikan esti uan ke timoyolchikauaj maj toselti timomiktikan. Yejua ika ouij katka se tanojnotsas. Keman titanojnotsayaj tikinajsiaj miakej akin techtsajtsiliayaj, kinotsayaj policía uan hasta techmojmotayaj ika miak taman. Amo uelia tikseliayaj amaixmej itech nejon altepet, uan tel ouij katka tikajsiskej kani timosentiliskej. Se tonal, keman mochiujtoya se ueyi nechikol, policía techtakaualtito. Heinz uan nejua amo timomattoyaj maj ijkon techtauelitakan. ¡Tel tamamej katkaj akin nemiaj Uganda, yejuan katkaj yolkualmej uan kualtsin techkakiaj! ¿Toni techpaleuij maj tiksentokakan tiyolpakikan?

Semi techpaleuij tietoskej iniuan tokniuan. Yejuan semi yolpakiaj porin kiixmatkej Jehová uan kitasojkamatiaj maj ompa iniuan tietonij. Tinochin timopaleuiayaj uan timoyekpiayaj. Heinz uan nejua tikitakej ke komo tiksentokaj tikintasojtaj oksekin uan amo semi itech titanemiliaj tein techpanotok, uelis tiyolpakiskej kampa yeski titapaleuijtoskej.

Seki xiujmej satepan, amo semi ouijok katka se tanojnotsas. Itech xiuit 1998, tekiuaj kijtoj ke itaixpantijkauan Jehová oksepa yeskia se taneltokalis, uan peuak motajtolkepaj miak amaixmej itech tajtol búlgaro. Itech xiuit 2004 peuak motekiti itech Betel tein yekin kichijchiujkaj. Axkan moajsij 57 nechikolmej ompa Bulgaria, uan moajsij 2,953 tanojnotsanij. Itech xiuit 2024 keman tikelnamikkej imikilis Cristo, mosentilijkej 6,475. Uan itech xolal Sofía, kampa sayoj yetoyaj makuil tokniuan siuamej, axkan moajsij chiknaui nechikolmej. Tikitaj ke yekmelauj mochiujtok nejin tein moijtojka: “Tein tsikitsin mochiuas mil” (Is. 60:22).

OUIJKAYOMEJ TEIN TIKPIAKEJ

Miakpa semi nikokolispeuani. Tapajtianij nechajxilianij miak tumores, uan se yetoya itech notsontekon. Kemej nechpajtiayaj semi nechsioujtiaya, uan keman nechtekkej ompa India, uejkaujkej 12 horas para kikixtiskej tumor sayoj ke ipa mokauakok tepitsin. Satepan ke nechtekkej timokaujkej Betel de ompa para nimoseuis uan satepan timokepkej Bulgaria.

Keman ayamo niyekpajtia, Heinz kiajxilijkej Huntington, se kokolis tein amo semi moixmati uan tepanoltiliaj se ichankauan. Nejon kokolis kichiuak maj amo semi ueli nejnemiok nion maj ueli tajtook uan maj taman moolini. Okachi peuak mokokoua uan monekia okachi nikyekpias. Kemansa semi nisiouia uan nechtekipachouaya maj amo ueliniok nikpaleui. Sayoj ke Bobi, se tokniuj takat miakpa kiuikaya maj tanojnotsati. Bobi amo kitekipachouaya toni kijtoskiaj oksekin keman kiitayaj ke Heinz amo yektajtouaya, oso ke amo kuali kinoliniaya imauan oso imetsuan. Keman monekia maj nikpaleui notakatsin, yejua nochipa motemakaya nechpaleuis. Maski Heinz uan nejua tikixtalijkej amo tikinpiaskej tokoneuan, Jehová techmakak Bobi akin katka kemej tokonetsin (Mar. 10:​29, 30).

Uan satepan Heinz no kikuik cáncer uan momikilij itech xiuit 2015. Semi niktemoua notakatsin, yejua nochipa nechpaleuiaya maj amo semi nimotekipacho, uan axkan ke amo nouan yetokok amo kuali nimomachilia nietos noselti. Sayoj ke nochipa nikelnamiki kemej yeskia yoltokok (Luc. 20:38). Miakpa nikelnamiki keniuj tajtouaya uan keniuj kuali nechyolmajxitiaya. Semi nimotasojkamati porin miak xiujmej uelik tiksentekitilijkej Jehová.

SEMI NIKTASOJKAMATILIA JEHOVÁ PORIN NECHPALEUIJ

Nikitani ke Jehová nechpaleuiani maj nikxiko miak tataman ouijkayomej. No nechpaleuij maj nimochiua nimisionera uan maj nikintasojta oksekin maski amo semi nitajtoua porin nipinaua (2 Tim. 1:7). Jehová techpaleuij maj nejua uan nokniuj siuapil tiktekitilikan miak tonalmej. Yejua uan itakatsin kinkalpanouaj nechikolmej ompa Europa kampa tajtouaj serbia. Jehová kinankilij tein nopaj kitajtaniaya keman tikatkaj tisiuapipil.

Nochipa keman nimomachtia Biblia nechpaleuia maj niyolseujto. Keman nikpiani ouijkayomej ‘okachi chikauak nimotataujtiani’, ijkon kemej kichiuak Jesús (Luc. 22:44). Uan nikita keniuj Jehová nechnankilia keman tokniuan de nonechikol Nadezhda (Sofía) nechnextiliaj ke nechtasojtaj. Yejuan nechyoleuaj maj iniuan nieto uan miakpa nechiluiaj ke nechtasojtaj, uan nejon semi nechyolpaktia.

Semi itech nitanemilia keman Dios kichiuas maj oksepa nemikan akin momikilijkejya. Niknemilia keniuj nejua uan nochankauan tisenyetoskej itech xochital, uan ke notatuan yetokej tokalixpan uan kualtsin moitaj kemej keman monamiktijkej, nokniuj siuat kichijchiujtok se tapalol para kualtsin kinselis nochankauan, uan Heinz yetok inakastan icaballo. Semi niyolpaki keman niknemilia nejin uan nechpaleuia maj nitaxiko uan maj niktasojkamatili Jehová.

Keman itech nitanemilia nochi tein kuali tein Jehová nechmakani uan nochi tein nikselis, nimomachilia kemej David akin kijtoj: “¿Kani nietoskia komo amo nitakuaujtamatiskia? ¿Ueliskia nikitas tein kuali tein Jehová kichiua itech tal kampa nemij akin yoltokej? Ximochia uan xitakuaujtamati iuan Jehová; xiyolchikauak. Kemaj, ximochia uan xitakuaujtamati iuan Jehová” (Sal. 27:​13, 14).