¿Keniuj uelis tikueyitalis Jehová keman timonamiktis?

1, 2. ¿Keniuj kineki Jehová maj momachilikan akin monamiktiskej?

¿TIKPIA monovio oso monovia? ¿Timonamiktitia? Komo kemaj xa semi timouelitstok. Axkan xa nankiitstokej miak taman tein moneki mochiuas. Uan Jehová kineki xiyolpakikan keman namonamiktiskeja uan kuali ximouikakan keman nansenyetoskejya (Prov. 5:18; Cant. 3:11).

² Semi moneki xikueyitalikan Jehová itech tonal keman namonamiktiskej. ¿Keyej uan keniuj uelis ijkon nankichiuaskej? Itech nejin tamachtilis tiknankiliskej nejin netajtanil. Maski nejin tamachtilis semi kinpaleuis akin monamiktiskej, tein tikitaskej techpaleuis tinochin maj tikueyitalikan Jehová komo techyoleujkej akin monamiktitij oso komo techtajtaniaj maj tikinyolmajxitikan.

¿KEYEJ MONEKI NANKIUEYITALISKEJ JEHOVÁ?

3. Keman nankiixtaliskej toni nankichiuaskej keman namonamiktiskej, ¿toni moneki nankiitaskej uan keyej?

³ Komo nankiixtalijtokej toni nankichiuaskej keman namonamiktiskej, moneki nankiitaskej toni tayolmajxitia Jehová itech Biblia. ¿Keyej? Porin yejua kiixtalij maj se takat uan se siuat monamiktikan, uan yejua kinnamiktij Adán uan Eva (Gén. 1:28; 2:24). Yejua ika moneki nankiitaskej maj kiueyitali Jehová tein nankichiuaskej keman namonamiktiskej.

4. Keman nankiitaskej toni nankichiuaskej, ¿keyej no moneki nankielnamikiskej keniuj tanemilia Jehová?

⁴ Keman nankiitaskej toni nankichiuaskej keman namonamiktiskej, no moneki nankielnamikiskej keniuj tanemilia Jehová porin yejua namoTajtsin uan namotasojikniuj (Heb. 12:9). Uan kemej nankinekij nankisentokaskej kuali iuan namouikaskej, amo keman nankichiuaskiaj teisa tein ika nankiyolkokoskiaj Jehová nejon tonal oso okse tonal (Sal. 25:14). Keman nankinemiliskej keniuj Jehová semi namechpaleuiani uan keniuj namechpaleuis satepan, nankinekiskej nankitasojkamatiliskej uan nankiueyitaliskej keman namonamiktiskej (Sal. 116:12).

¿KENIUJ UELIS NANKIUEYITALISKEJ JEHOVÁ?

5. ¿Keniuj novios uelis kinpaleuis Biblia maj kimatikan toni kichiuaskej keman monamiktiskej?

⁵ Biblia amo kijtoua sejse taman tein moneki kichiuas se tokniuj keman monamiktis oso keman iluitiskejya. Yejua ika akin monamiktiskej yejuan kiixejekoskej toni kichiuaskej, kiitaskej ox kichiuaskej tein momattokej kampa nemij uan tein kiuelitaj. Sayoj ke tokniuan akin monamiktitij no moneki kichiuaskej tein tanauatia tekiuaj (Mat. 22:21). Tein yeski taman tein kiixtaliskej kichiuaskej uelis kiueyitaliskej Jehová uan kiyolpaktiskej komo kichiuaj tein tayolmajxitia itech Biblia. Maj tikitakan seki taman tein tayolmajxitia.

6. Kemej kijtoua Romanos 13:​1, 2, ¿keyej novios moneki kichiuaskej tein tanauatiaj tekiuanij?

⁶ Xikchiuakan tein tanauatiaj tekiuanij (Rom. 13:​1, 2). Itech miak altepemej tekiuanij kiixtaliaj seki taman tein moneki kichiuaskej novios para uelis monamiktiskej. Yejua ika xitajtanikan toni tanauatiaj kampa namejuan nanemij. Xikintajtanikan tayekananij komo moneki maj namechpaleuikan.b

7. ¿Toni moneki kichiuaskej novios para maj mochiua tein kuali keman monamiktiskej?

⁷ Xikitakan maj mochiua tein kuali (1 Cor. 10:​31, 32). Keman namonamiktiskej, xiknextikan ke namechixyekana ichikaualis Dios uan amo kemej tanemiliaj nikan taltikpak (Gál. 5:​19-26). Kemej novio yejua akin kinixyekanas ichankauan, moneki kiitas maj mochiua tein kuali keman monamiktiskej uan maj nochin moyolpaktikan. ¿Keniuj uelis ijkon mochiuas? Miakej kiixtaliaj maj motemaka se tanojnots keman monamiktiskej, uan komo tokniuj mochikaua kuali kinnojnotsas uan kinpoujkaitas, nochin akin takaktoskej kinpaleuis maj kiitakan ke Jehová kiixtalijtok maj se monamikti. No tapaleuis maj amo kiauilmatikan nejon tonal. Yejua ika komo ueli, miakej novios kiixtaliaj maj tanojnots motemaka itech Kali kampa tiMosentiliaj. Komo ijkon kiixtaliaj, moneki niman kinijkuilouiliskej se carta tayekananij.

8. Komo nankichiuatij iluit keman namonamiktiskej, ¿keniuj uelis nankiueyitaliskej Jehová? (Romanos 13:13).

⁸ (Xikonlero Romanos 13:13). Komo nankichiuaskej iluit keman namonamiktiskej, ¿keniuj uelis nankinextiskej ke amo nantanemiliaj kemej akin nemij nikan taltikpak? Tajtolmej ‘iluimej kampa tel eliuistij’ itech griego kijtosneki iluimej kampa tel tayij tein teuintij, uan tatsotsonaj hasta tel youakya (xikonita nota de estudio “fiestas descontroladas”, tein kipia Romanos 13:13). Komo nankiixtaliaj nankitemakaskej tayil nejon tonal, desde achto xikchiuakan tein tapaleuis maj amo akin tel tayi.c Komo onkas tatsotson, xikitakan maj amo kintelkuejso oksekin para uelis monojnotsaskej. Uan no kuali xikitakan katiyejua tatsotson nankitaliskej uan toni kijtoua para maj amo akin kikuejmolo.

9. ¿Toni moneki kiitaskej novios keman kiixejekoskej toni mochiuas keman monamiktiskej?

⁹ Itech seki xolalmej, keman novios monamiktiaj inintasojikniuan oso ininchankauan moketsaj para kiniluiskej teisa. Uan kemansa no kitaliaj videos oso fotos den novios oso kichiuaj okseki taman. Nejon kichiua maj miakej kielnamikikan nejon tonal. Sayoj ke moneki nankiitaskej maj nochi mochiua kemej moneki uan maj tayolchikaua (Filip. 4:8). Ximotajtanikan: “¿Kuali kiitaskej akin yaskej? ¿Tein kijtoskej oso tein kitaliskej kinextis ke kipoujkaitaj maj se takat uan se siuat monamiktikan?”. Sayoj ke okachi moneki namotajtaniskej nejin: “¿Kiueyitalis Jehová?”. Maski uelis kijtoskej teisa tein teuetskitij, amo moneki kijtoskej tein kichiuas maj oksekin itech tanemilikan auilnemilis (Efes. 5:3). Komo namochankauan oso namotasojikniuan kijtoskej teisa, xikinyekiluikan toni amo nankinekij maj kijtokan.

10. ¿Keyej novios amo moneki kichiuaskej se iluit kemej para kinueyitaliskej? (1 Juan 2:​15-17).

¹⁰ Amo xikchiuakan se iluit kemej para namechueyitaliskej (xiklero 1 Juan 2:​15-17). Akin kitasojtaj Jehová mochikauaj kiueyitaliskej yejua uan amo maj yejuan kinueyitalikan. Yejua ika komo novios kinekij kiueyitaliskej Dios, amo moneki kigastaroskej miak tomin uan amo ‘kinextijtinemiskej tein kipiaj para maj kinueyitalikan’. ¿Keniuj namechpaleuis komo amo nankichiuaj se ueyi iluit? Maj tikitakan tein kijtoua Mike, se tokniuj takat de Noruega: “Kemej amo timotauikaltijkej, uelik tiksentokakej titapaleuijkej kemej precursores. Maski amo katka se ueyi iluit, tel tikuelitakej uan amo keman tikelkauaskej”. Uan Tabitha se tokniuj siuat de India, kijtoua: “Kemej amo ueyi iluit tikchiujkej, nonovio, nejua uan tochankauan tinochin tikuelitakej tein tikixtalijkej maj mochiua uan amo monekik miak taman tikixpejpenaskej, yejua ika amo semi timosioujtijkej”.

11. ¿Keniuj moneki motakentiskej novios keman monamiktiskej? (No xikonita taixkopimej).

¹¹ ¿Nankimatijya toni namotaliliskej keman namonamiktiskej? Tikmatij ke nankinekij kualtsin namoitaskej. Desde ne uejkaujya, se novio uan se novia ipa kuali kiitayaj toni motaliliskej para maj kualtsin moitanij (Is. 61:10). Maski xa namotaliliskej se tasal tein kinamiki para nejon tonal, moneki nankiitaskej ke tein nankikuitokej yejua tein kinamiki motalilis se akin kitekitilia Dios (1 Tim. 2:9). Xikitakan maj oksekin amo sayoj kiitstokan tein namotaliliskej oso kemej namochijchiuaskej, ta maj kiueyitalikan Jehová (1 Ped. 3:​3, 4).

12. ¿Keyej novios moneki kiixtopeuaskej costumbres tein Biblia kijtoua ke amo kuali yetok?

¹² Xikixtopeuakan tein kichiuaj kampa nanemij komo Biblia kijtoua ke amo kuali yetok (Apoc. 18:4). Sekin novios keman monamiktiaj kichiuaj miak costumbres tein kichiuaj itech taneltokalismej, kiitatij se naual uan kichiuaj seki taman para maj amo teyi kinpano. Sayoj ke Jehová technejmachtia maj amo tikchiuakan nochi nejon taman tein amo kuali (2 Cor. 6:​14-17). Komo kampa nanemij kichiuaj seki taman tein amo nankiyekmatij ox kiuelita Jehová, xitatsintokakan toni kijtosneki oso keyej kichiuaj. No xiktemokan textos itech Biblia tein namechpaleuis kuali xikixpejpenakan toni nankichiuaskej keman namonamiktiskej.

13. ¿Keniuj novios uelis kichiuaskej kemej Jehová keman kintayokoliskej teisa?

¹³ ¿Momattokej kampa nanemij kintayokoliskej teisa akin monamiktiaj? Akin kipiaj miak tomin xa tetayokoliaj teisa tein tel patiyoj, sayoj ke akin amo semi kipiaj tomin xa amo uelij. Maski ijkon, Biblia techyolchikaua maj titemakakan uan keman ijkon tikchiuaj tiyolpakij (Prov. 11:25; Hech. 20:35). Sayoj ke novios amo kinekij maj akin kinyoleujkej kimachilikan ke moneki kintayokoliskej teisa oso ke tein kintayokolijkej amo tel patiyoj. Tikchiuaj kemej Jehová keman tiktasojkamatij nochi tein techtayokoliaj porin techmakaj tein uelij uan porin kinekij ijkon kichiuaskej (2 Cor. 9:7).

TEIN UELIS NANKICHIUASKEJ KOMO NAMECHPANOUA SEKI TAMAN

14. ¿Toni kinpanouani seki novios?

¹⁴ Xa ipa ouij yeski nankiitaskej toni nankichiuaskej keman namonamiktiskej para maj kiueyitali Jehová. Xa namechouijmakas nankiixtaliskej nankichiuaskej se iluit tein amo ueyi. Maj tikitakan tein kipanok Charlie, akin nemi Islas Salomón, yejua kijtoua: “Kemej tel miakej totasojikniuan uan kampa tinemij nochin kinekij maj se kinyoleua, ouij techkisak tikixtaliskej akonimej tikinyoleuaskej”. Tabitha akin ika titajtojkej itech párrafo 10, kijtoua: “Kampa nejua ninemi, momattokej miakej kinyoleuaskej keman aksa monamiktia. Yejua ika, keman tikiniluijkej totatuan ke sayoj tikinyoleuaskiaj kemej 100, amo niman kinekkej”. Uan Sarah akin nemi India, kijtoua: “Miakej sayoj kiitaj ox se kipia miak tomin uan maj oksekin kuali toka tajtokan, yejua ika keman yaya nimonamiktiti, sekin nechiluiayaj ke monekia maj nikchiua okachi ueyi iluit ke tein kichiujkaj noprimos”. ¿Toni uelis nankichiuaskej komo no ijkon namechpanoua?

15. ¿Keyej novios moneki nochipa motataujtiskej keman kiixtalijtoskej toni kichiuaskej?

¹⁵ Ximotataujtikan nochipa keman nankiitaskej toni nankichiuaskej keman namonamiktiskej. Uelis nankitataujtiskej Jehová komo teisa namechtekipachoua oso keman nankiixtaliskej teisa (Filip. 4:​6, 7 uan nota de estudio kampa kijtoua “en cualquier situación”). No uelis nankitajtaniskej maj namechpaleui kuali xitaixpejpenakan, xiyolseujtokan keman namotekipachoskej, uan xiyolchikaujkej keman oksekin namechiluiskej xikchiuakan tein amo nankiixtalijtokej (1 Ped. 5:7). Keman nankiitaskej keniuj Jehová namechpaleuia, okachi iuan nantakuaujtamatiskej. Tabitha no kijtoj: “Nonovio uan nejua techtekipachouaya maj timokualantianij tejuan oso iniuan tochankauan porin tataman tein tiknekiaj tikchiuaskej. Yejua ika nochipa timotataujtiayaj achto ke tikixtaliskiaj seki taman. Tikitakej keniuj Jehová techpaleuij maj tejuan uan tochankauan amo timokualantianij”.

16, 17. Keman novios kiixtalijtoskej toni kichiuaskej keman monamiktiskej, ¿keyej yejuan uan ininchankauan moneki kuali monojnotsaskej?

¹⁶ Kuali ximonojnotsakan namejuan nanomen uan iniuan namochankauan (Prov. 15:22). Achto ke novios monamiktiskej moneki kiixtaliskej miak taman porin moneki kiitaskej kemanian monamiktiskej, kanachi tomin kigastaroskej, akonimej kinyoleuaskej uan okseki taman. Achto ke nankiixtaliskej teisa, xikitakan toni uelis nankichiuaskej, toni tein tayolmajxitia Biblia uelis namechpaleuis, uan tein xa namechyolmajxitiskej tokniuan akin semi kitasojtaj Jehová oso kemanya kitekitilijtokej. Keman namonojnotsaskej nanomen uan nankiniluiskej namochankauan tein nankiuelitaskiaj maj mochiua, kuali xikinnojnotsakan, xikinajsikamatikan uan komo ueli xikchiuakan tein namechiluiaj. Takan namotatuan namechiluiaj ke kinekij maj mochiua teisa keman namonamiktiskej, xikchiuakan komo nankiitaj ke uelis. Porin yejuan no semi yolpakij por namejuan. Uan komo amo ueli nankichiuaj tein kinekij, xikinyekiluikan keyej amo (Col. 4:6). Xikiniluikan namochankauan ke nankitemouaj nankiueyitaliskej Jehová nejon tonal uan ke nankinekij maj nochin yolpakikan.

¹⁷ ¿Toni uelis nankichiuaskej komo namotatuan amo itaixpantijkauan Jehová? Xa ouij yeski nankiniluiskej tein nankiixtalijtokej, sayoj ke okachi namechajsikamatiskej komo kuali nankinnojnotsaj. Santhosh se tokniuj akin nemi India, kijtoua: “Tochankauan kinekiaj maj tikchiuakan seki taman tein kichiuaj itech taneltokalis hindú, uan semi kinouijmakak kiajsikamatiskej tein nonovia uan nejua tikixtalijtoyaj. Yejua ika tiknemilijkej tikchiuaskej seki taman tein yejuan kinekiaj uan tikmatiaj ke amo kiyolkokoskia Jehová. Tikpatakej takual uan tiktemakakej tein yejuan kinekiaj. Uan no, tikixtalijkej maj amo akin cantaro nion maj timijtotikan porin yejuan amo momattoyaj ijkon kichiuaskej”.

18. ¿Toni kinpaleuis novios maj nochi mochiua kemej kiixtalijtokej? (1 Corintios 14:40; no xikonita taixkopin).

¹⁸ Maj ixyetoya nochi tein nankichiuaskej. Komo desde achto nankiitaj toni nankichiuaskej keman namonamiktiskej, nejon tonal amo namechtekipachos maj teisa namechpolo (xikonlero 1 Corintios 14:40). Wayne akin nemi Taiwán, kijtoua: “Seki tonalmej achto ke timonamiktiskiaj timosentilijkej iniuan akin techpaleuiskiaj. Ika titajtojkej tein tikchiuaskiaj nejon tonal uan timomamachtijkej para maj nochi kuali mochiuani”. Para maj kuali momachilikan akin yaskej, xikchiuakan nochi tein nankiixtalijtokej itech hora tein nankijtojkej.

19. ¿Toni uelis kichiuaskej novios para maj itech iluit nochi moyekchiua?

¹⁹ Komo nankiitaj toni ueliskia panos keman namonamiktiskej, nankimatiskej toni nankichiuaskej para maj amo namechpano (Prov. 22:3). Xiknemilikan nejin, komo kampa nanemij momattokej ajsiskej akin amo kinyoleujkej keman aksa monamiktia, xikitakan toni uelis nankichiuaskej para maj amo ijkon pano. Uan no, komo yaskej sekin namochankauan akin amo momachtiaj Biblia, xikinmelauilikan keniuj monamiktiaj itaixpantijkauan Jehová uan keyej amo tikchiuaj seki costumbres keman aksa monamiktia. Uelis nankinnextiliskej tamachtilis “¿Cómo son las bodas de los testigos de Jehová?” tein moajsi itech jw.org. Xa no uelis nankitajtaniskej se tokniuj akin kuali kitekitilijtok Jehová maj kiita tein mochiua itech iluit (Juan 2:8). Komo achto nankiluiaj tein nankiixtalijtokej, uelis namechpaleuis maj nochi moyekchiua uan kemej nankinekij.

20. ¿Toni moneki kielnamikiskej novios?

²⁰ Xa namomoujtiaj keman nankinemiliaj nochi tein moneki nankiitaskej maj mochiua keman namonamiktiskej. Sayoj ke xikelnamikikan ke nejon tonal panotikisas, uan ke desde ijkuak peuas nankisentekitiliskej Jehová uan nanyolpakiskej. Yejua ika ximochikauakan para maj nochi kuali mochiua nejon tonal uan amo xiteltagastarokan. Xitakuaujtamatikan ke Jehová namechpaleuis. Komo namokauaj maj namechixyekana, keman nankielnamikiskej tonal keman namonamiktijkej nanuetskaskej uan nankijtoskej: “Semi nikuelitak keman nimonamiktij uan amo nikpataskia nion teyi” (Sal. 37:​3, 4).