¿Tikonelnamiki?
¿Tikonixtajtoltiani amaixmej Tanejmachtijkej tein kiskej yankuixtok? Xikonita ox ueli tikonnankilia nejin netajtanilmej:
¿Keyej tikueyitaliaj Jehová?
Tikueyitaliaj porin semi tiktakachiuaj uan tiktasojtaj. No tikueyitaliaj porin tiknekij maj nochin kiixmatikan (w25.01, página 3).
¿Toni uelis tikchiuaskej para tiktapojpoluiskej akin techyolkokoj?
Xa tiknekiskej ijkon tikauaskej, sayoj ke keman titetapojpoluiaj semi techpaleuia porin tikelkauaj tein techchiuilijkej (w25.02, páginas 15 uan 16).
¿Keyej tein kichiuak Marcos uelis kinpaleuis telpochmej?
Marcos motemakaya kinpaleuis oksekin. Maski xa amo kuali momachilij uan semi moyolkokoj ika tein kipanok, amo mosenkauak. Mochikauak kuali mouikas iuan Pablo uan iniuan oksekin tokniuan (w25.04, página 27).
¿Toni toni kijtosnekik Jesús keman kiluij Jehová “Nikinixmatiltij motokay”? (Juan 17:26).
Imomachtijkauan Jesús ipa kimatiajya ke Dios monotsa Jehová, yejua ika tein kijtoj kijtosnekia ke kinpaleuij maj kiixmatikan, tein yejua kineki maj mochiua uan toni kineki para tejuan, toni kichiuak, toni kichiuas uan keniuj tamati (w25.05, páginas 20 uan 21).
¿Toni seki taman ipa amo tikmatiskej?
Moneki tikajsikamatiskej ke seki taman ipa amo tikmatiskej. Amo tikmatij kemanian ixpoliuis nochi tein amo kuali nion keniuj Jehová uelis techpaleuis. Amo no senkis tikmatij tein uelis panos nion keniuj Jehová tel kuali techixmati (w25.06, páginas 15 hasta 18).
¿Keniuj uelis techpaleuis se tamachtilis oso se tanojnots?
Uelis timotajtaniskej: “¿Keniuj kinextia tein ika motajtojtok ke melauj tein tamachtia Biblia? ¿Nesi se taixkopin oso okse taman tein uelis ika nitamachtis Biblia? ¿Akoni kiuelitaskia kimatis nejin tamachtilis?” (w25.07, página 19).
¿Keniuj tein kipanok David techmachtia ke Dios uelis techtapojpoluis keman titajtakolchiuaj?
Maski David tel tajtakolchiuak, Jehová kitapojpoluij keman moyolpatak (1 Rey. 9:4, 5). Keman Jehová techtapojpoluia amo kielnamiktokok totajtakoluan para techtatsakuiltis nion para techelnamikilis satepan (w25.08, página 17).
¿Toni uelis tikchiuaskej komo se akin tikmachtiaj amo kiyekajsikamati teisa oso kiouijmaka kineltokas?
Komo tikmelauilijkejya ika Biblia uan ayamo kiyekajsikamati, maj timomachtikan tein kisentoka uan satepan uelis oksepa ika titajtoskej nejon (w25.09, página 24).
¿Toni kijtosneki itech Biblia keman kijtoua “maj tajtakol amo namechkajkayaua”? (Heb. 3:13).
Kemej titajtakolejkej ipa tiknejnekij tikchiuaskej tein amo kuali. Sayoj ke tajtakol no kichiua maj amo tikneltokakan seki taman, yejua ika xa tikmachiliaj ke Jehová amo techtasojta (w25.10, página 16).
¿Toni techpaleuis maj tikiluikan Jehová nochi tein tikmachiliaj?
1) Maj tiknemilikan toni tein kualtsin kinextia Jehová. 2) Maj tiknemilikan toni ouijkayomej tikpiaj uan maj tikiluikan Jehová, xa ayamo ueli tiktapojpoluiaj aksa. 3) Maj tikxelokan tiempo para uejkauak timotataujtiskej. Ijkon uelis tikiluiskej Jehová nochi tein tikmachiliaj (w25.10, páginas 19 uan 20).
¿Keniuj uelis tikinpaleuiskej akin xiuejkejya?
Maj tikinkalpanokan uan maj tikinnotsakan. Xa no uelis iniuan tiaskej keman mopajtitiuij oso iniuan titanojnotsaskej (w25.11, páginas 6 uan 7).
¿Toni moneki kichiuaskej novios para kiueyitaliskej Jehová itech tonal keman monamiktiskej?
Moneki kichiuaskej tein tanauatiaj tekiuanij, kinextiskej ke kinixyekana ichikaualis Dios, maj kikuikan tasal uan maj mochijchiuakan kemej se akin kitekitilia Dios, maj kiixtopeuakan costumbres tein Biblia kijtoua ke amo kuali yetok, uan maj kuali monojnotsakan keman ika tajtoskej tein kichiuaskej keman monamiktiskej (w25.12, páginas 21 hasta 24).