¿Toni mitsonpaleuis xikonsentoka xionyolpaki maski tionxiuejya?

1, 2. ¿Keniuj Jehová kinita tokniuan akin xiuejkejya? (Salmo 92:​12-14; no xikonita taixkopin).

ITECH seki xolalmej kiitaj ke tel kualtsin keman aksa xiuejya. Sayoj ke itech okseki xolalmej miakej kichiuaj miak taman para maj amo moita ke xiuejkejya. Sekin mokixtiliaj inintson tein istak, sayoj ke maski ijkon kichiuaj ipa mochiuaskej xiuejkejya.

² Sayoj ke, ¿keniuj toTajtsin kinita tokniuan akin xiuejkejya? (Prov. 16:31). Yejua kijtoua ke tamatij kemej kualtsitsin koujmej (xikonlero Salmo 92:​12-14). Uan kinamiki maj ijkon kinita porin koujmej tein uejkauj kayomej tel maxiujyojkej uan kualtsin xochiouaj. Se kouit tein mochiua ompa Japón tel miak xiujmej taxikoua, seki koujmej kipiajya panoua mil xiuit uan tel kualtsitsin. Ijkon kemej nejin koujmej, Jehová semi kinpatiuita tokniuan akin xiuejkejya. Yejua amo sayoj kiita ke kuapochiktikej ta kiita tein kinextiaj uan tein kichiuaj. Yejuan kuali kitekitilianij Jehová miak xiujmejya keman kipianij ouijkayomej uan keman kuali yetonij.

3. Xikonijto kemej toni kinnauatij Jehová sekin itekitikauan akin xiuejkejya katkaj.

³ Jehová kisentoka techpatiuita maski tixiuejkejya.a Hasta kichiuak maj sekin de yejuan kichiuanij seki tekimej tein motelnekij. Kemej Sara, yejua tel xiuejya katka keman Jehová kiluij ke yaya kipiati se konetsin. Uan itechkopa ikonetsin tel momiakiliskiaj uan de ompa ualeuaskia Mesías (Gén. 17:​15-19). Moisés no tel xiuejya katka keman Jehová kinauatij maj kinkixti israelitas de Egipto (Éx. 7:​6, 7). Uan tatitanil Juan no katka tel xiuejya keman Jehová kichiuak maj kijkuilo makuil amatajkuilolmej tein kipia Biblia.

4. Kemej kijtoua Proverbios 15:​15, ¿toni uelis kinpaleuis akin xiuejkejya keman kipiaj ouijkayomej? (No xikonita taixkopin).

⁴ Keman se xiuejya ipa tekui miak taman kokolis uan okachi se tajyouia. Yejua ika miakej kijtouaj: “Moneki maj se yolchikauak keman se xiuejya porin miak taman tepanoua”. Sayoj ke Jehová uelis mitsonpaleuis xionyolpaki maski tikonpias ouijkayomejb (xikonlero Proverbios 15:15). Itech nejin tamachtilis tikitaskej toni uelis kichiuaskej tokniuan akin xiuejkejya para kisentokaskej yolpakiskej. No tikitaskej keniuj nochin itech nechikol uelis kinpaleuiskej. Sayoj ke achto tikitaskej keyej teouijmaka se kisentokas se yolpakis keman se xiuejya.

¿KEYEJ AKIN TIXIUEJKEJYA AMO SEMI TIYOLPAKIJOK?

5. ¿Keyej xa timoyolkokoskej akin tixiuejkejya?

⁵ ¿Keyej xa timoyolkokoskej akin tixiuejkejya? Xa semi timotayokoltiaj porin amo ueli tikchiuajok tein achto tikchiuayaj. Oso xa tikelnamikij keman tichikaujtoyaj uan tipaktoyaj (Ecl. 7:10). Se tokniuj siuat akin monotsa Ruby, kijtoua: “Semi nechouijmaka nimotalilis notasal porin amo semi ueli nimoolinia uan nochi nechkokoua. Nion no ueli nimometsajokui para nimotalilis nocalceta. Nomauan semi nechkokouaj uan amo ueli nikinolinia nomajpiluan. Maski teisa amo ouij, amo ueli nikchiua”. Harold, akin tapaleuijtoya Betel, kijtoua: “Nikualani porin amo ueli nikchiuaok tein nikuelitaya. Keman katka nitelpoch semi nichikaujtoya uan nikuelitaya nimauiltis ika pelota. Keman timauiltiayaj, oksekin kijtouayaj ‘¡Xikpanoltilikan pelota Harold, ijkon titataniskej!’. Sayoj ke axkan nikmachilia ke nion uelis niktamotas”.

6. ¿Toni okseki taman uelis kichiuas maj tokniuan akin xiuejkejya moyolkokokan? (Xikonita tamachtilis tein kipia nejin amaix “¿Ueliok nikuika nocarro?”).

⁶ Xa no tionmoyolkokoua porin amo ueliok moselti tionmoita. Xa moneki maj mitsonpaleuikan, yejua ika moneki maj aksa nemiti mochan oso moneki tionnemitiuj iuan semej mokoneuan. Xa amo ueli tikonuikaok mocarro oso amo ueli moselti tionkisaok porin amo tionchikauakok oso amo kuali tiontachiaok. Yejua ika xa semi tiontayokoya. Maski amo ueli tikonchiuaok nochi tein tikonchiuaya, xikonelnamiki ke Jehová uan oksekin kisentokaj mitsonpatiuitaj. Uan no, Jehová kimati keniuj tionmomachilia. Kimati ke semi tikontasojta yejua uan tokniuan, uan yejua nejon tein kiyolpaktia (1 Sam. 16:7).

7. ¿Toni techpaleuis komo techtayokoltia amo tikitaskejok keman mochiuas Armagedón?

⁷ Xa no timotayokoltiaj porin tiknemiliaj ke xa timomikiliskej achto ke Jehová kiixpolos nochi tein amo kuali. Komo ijkon timomachiliaj semi techpaleuis komo tikelnamikij ke Jehová amo yolijsiui uan yejua ika ayamo kiixpoloua tein amo kuali (Is. 30:18). ¿Keyej amo yolijsiui? Porin kineki maj miakej kiixmatikanok uan maj kitekitilikan (2 Ped. 3:9). Yejua ika keman timotayokoltiskej, maj tikelnamikikan ke miakej uelisok kiixmatiskej Jehová uan makisaskej. Uan sekin xa hasta tochankauan.

8. ¿Toni xa kichiuaskej akin xiuejkejya komo mokokouaj?

⁸ Keman amo kuali timomachiliaj oso tikpiaj se kokolis, xa tikijtouaj oso tikchiuaj teisa tein teyolkokoj (Ecl. 7:7; Sant. 3:2). Ijkon kipanok Job. Kemej semi tajyouijtoya, nejon kichiuak maj eliuis tajto (Job 6:​1-3). Yejua ika, tikajsikamatij keyej akin xiuejkejya ueliskia kijtoskej oso kichiuaskej tein amo taixejekol porin mokokouaj oso tayitokej se pajti. Sayoj ke maski tixiuejkejya oso timokokouaj, amo kuali yeskia maj tikintauelnojnotsakan oksekin oso maj tikchiakan maj nochipa techpaleuikan. Uan komo timomakaj cuenta ke tikyolkokojkej aksa, maj niman tikiluikan maj techtapojpolui (Mat. 5:​23, 24).

TEIN MITSONPALEUIS XIKONSENTOKA XIONYOLPAKI

9. ¿Keyej moneki tionmokauas maj mitsonpaleuikan? (No xikonita taixkopimej).

⁹ Xionmokaua maj mitsonpaleuikan (Gál. 6:2). Xa yekinika mitsonouijmakas ijkon tikonchiuas. Se tokniuj siuat akin monotsa Gretl, kijtoua: “Kemansa amo semi nikneki maj nechpaleuikan porin niknemilia ke nikintelkuejmoloua. Nimochikauani niyeski niyolyemanik para nikajsikamatis ke moneki maj nechpaleuikan”. Sayoj ke, xikonelnamiki ke oksekin semi yolpakiskej komo tionmokaua maj mitsonpaleuikan (Hech. 20:35). Uan tejuatsin no semi tionyolpakis porin tikonitas ke semi mitsontasojtaj uan kinekij mitsonyekpiaskej.

10. ¿Keyej moneki nochipa tiknextiskej ke timotasojkamatij? (No xikonita taixkopin).

¹⁰ Xikonnexti ke tionmotasojkamati (Col. 3:15; 1 Tes. 5:18). Ipa tiktasojkamatij keman oksekin techpaleuiaj, sayoj ke kemansa tikelkauaj tikiniluiskej. Yejua ika komo tikonixuetskilia uan tikoniluia “tasojkamatik”, yejuan kimatiskej ke semi tikontasojkamati tein kichiuaj. Leah, akin kinyekpia tokniuan xiuejkejya ompa Betel, kijtoua: “Se tokniuj siuat akin nikyekpia, nechijkuilouilia amatsitsin kampa nechiluia ke nechtasojkamatilia. Maski amatsin amo ueyi, semi kualtsin tein kijtoua uan semi nikuelita nikleros. Niyolpaki porin nikita ke kitasojkamati tein nikchiua”.

11. ¿Keniuj uelis tikinpaleuiskej oksekin? (No xikonita taixkopin).

¹¹ Xikonpaleui oksekin. Komo ininka tionmotekipachoua oksekin uan tionmochikaua tikonpaleuis, amo semi itech tiontanemilis ouijkayomej tein tikonpia. Akin xiuejkejya tamatij kemej amaixmej tein tamachtiaj miak taman. Nejon amaixmej amo uelis tapaleuiskej komo amo akin kinleroua. No ijkon, komo amo tikonnojnotsa telpochmej uan amo tikontapouia tein tikonmati, amo teyi momachtiskej de tejuatsin. Xikontemo tikonixmatis akin okachi telpochmej, xikontajtani seki taman uan xikonkaki keman mitsontapouiskej tein kinpanoua. Ijkon uelis tikoniluis keniuj Jehová mitsonpaleuiani uan keniuj uelis yolpakiskej komo kitakamatij. Uelis tionyolpakis komo tikonyolchikaua motasojikniuan akin okachi telpochmej (Sal. 71:18).

12. ¿Toni Jehová kiniluia akin xiuejkejya itech Isaías 46:4? (No xikonita taixkopin).

¹² Xikontajtani Jehová maj mitsonpaleui xiontaxiko. Maski kemansa semi tionsioui oso amo kuali tionmomachilia, xikonelnamiki ke Jehová “amo keman sioui nion sotaui” (Is. 40:28). Yejua semi chikauak uan kikui ichikaualis para kinyolchikauas akin xiuejkejya (Is. 40:​29-31). Jehová motenkaua mitsonpaleuis (xikonlero Isaías 46:4). Uan yejua nochipa kichiua tein motenkaua (Jos. 23:14; Is. 55:​10, 11). Keman tionmotataujtis, Jehová mitsonpaleuis uan tikonitas ke semi mitsontasojta uan semi tionyolpakis.

13. Kemej kijtoua 2 Corintios 4:​16-18, ¿toni moneki tikelnamikiskej? (No xikonita taixkopin).

¹³ Xikonelnamiki ke oksepa tionmochiuas telpoch uan tionpaktos. Keman tikelnamikij ke amo uejkaua ixpoliuis ouijkayot tein tikpanotokej, okachi ueli titaxikouaj. Biblia kijtoua ke amo uejkaua amo akinok yeski xiuejya nion kokolispeuas (Job 33:25; Is. 33:24). Yejua ika uelis tionyolpakis porin tikonmati ke amo uejkaua tionpaktosya, tionchikaujtos uan kuali tionmoitas (xikonlero 2 Corintios 4:​16-18). Sayoj ke, ¿keniuj uelis mitsonpaleuiskej oksekin?

¿KENIUJ UELIS TIKINPALEUISKEJ AKIN XIUEJKEJYA?

14. ¿Keyej moneki tikinnotsaskej uan tikinkalpanoskej tokniuan akin xiuejkejya?

¹⁴ Maj timochikauakan miakpa tikinkalpanoskej uan tikinnotsaskej (Heb. 13:16). Miakej akin xiuejkejya momachiliaj ininselti. Se tokniuj takat akin monotsa Pierre,c kijtoua: “Kemansa amo nikmati toni nikchiuas uan nikualani porin amo ueli nikisa, uan semi nitasemati”. Keman tikinkalpanouaj akin xiuejkejya tikinnextiliaj ke tikintasojtaj uan ke inintech titanemiliaj. Xa tikelnamikij ke tiknekiaj tiknotsaskej oso tikalpanoskej se tokniuj sayoj ke amo tikchiujkej. Kemej tinochin tikpiaj miak tekit, ¿keniuj uelis tikchiuaskej tein “okachi tayekantok” kemej tikinkalpanoskej akin xiuejkejya? (Filip. 1:10). Uelis tikijkuiloskej inintokay tokniuan uan tikixtaliskej se tonal para tikintajkuilouiliskej oso tikinnotsaskej. Uan maj tikixtalikan kemanian tikinkalpanoskej para maj amo tikelkauakan.

15. ¿Toni uelis kisenchiuaskej telpochmej uan akin xiuejkejya?

¹⁵ ¿Tisiuapilok oso tiokichpilok? Komo ijkon, xa timotajtanis toni uelis tikiniluis tokniuan xiuejkejya oso toni uelis iniuan tikchiuas. Sayoj ke amo ika xitanemilijto. Sayoj moneki tikchiuas maj kuali momachilikan (Prov. 17:17). Iniuan xitajto achto ke peuas oso keman tamis nechikol. Xikintajtani katiyejua texto okachi kiuelitaj oso maj mitstapouikan teisa tein kinpanok keman katkaj telpochmej uan kinuetskitij. No uelis tikinyoleuas maj mouan kiitakan se tamachtilis tein kisak itech JW Broadcasting^®. No uelis tikinpaleuis ika teisa tein amo ueli kichiuaj ininselti, xa uelis tikitas maj kuali tekiti inintableta oso inincelular uan maj kipiakan yankuik amaixmej tein kiskej. Se tokniuj siuat akin monotsa Carol, kijtoua nejin: “Xikinyoleua maj mouan kichiuakan tein tikuelita. Maski nixiuejya nikuelita nikchiuas seki taman. Nikuelita nitakouatiuj, nitakuatiuj okseko uan nikitas tein Dios kichijchiuak”. Uan okse tokniuj siuat akin monotsa Maira, kijtoua: “Semej akin iuan nimouika nechyekana 57 xiujmej, yejua kipia 90 xiujmejya. Sayoj ke miakpa amo nikchiua cuenta nejon, porin nochipa timouetskitijtokej uan tiksenitaj películas. Uan keman tikpiaj ouijkayomej timosenpaleuiaj”.

16. ¿Keyej kuali yeskia maj iniuan se youi tokniuan xiuejkejya keman mopajtitij?

¹⁶ Maj iniuan se youi keman mopajtitij. Amo sayoj maj tikinuikakan, ta no maj iniuan timokauakan para tikitaskej maj amo kinajuakan uan maj kuali kinpajtikan (Is. 1:17). Xa hasta ueliskia tikijkuiloskej tein kijtos tapajtijkej. Se tokniuj siuat akin monotsa Ruth kijtoua: “Keman niouj noselti, tapajtianij amo kineltokaj ke nimokokoua. Kemansa nechiluiaj ‘Amo yekmelauj timokokoua ta sayoj ika tikchiua’. Sayoj ke keman aksa nouan youi, okachi kuali nechpajtiaj. Semi nikintasojkamatilia tokniuan porin kixelouaj tiempo para nouan yaskej”.

17. ¿Keniuj uelis iniuan titanojnotsaskej tokniuan akin xiuejkejya?

¹⁷ Maj iniuan titanojnotsakan. Seki tokniuan amo semi ueli nejnemijok, yejua ika amo ueli youij kajkalpan tanojnotsatij. Sayoj ke xa uelis tikinyoleuaskej maj touan tanojnotsakan itech carrito. Xa hasta uelis tikinuikiliskej se silla para ika motaliskej. No uelis tikyoleuaskej se tokniuj xiuejya maj touan tamachti, uan hasta uelis titamachtiskej ichan. Seki tokniuan akin xiuejkejya okachi ueli kisaj tanojnotsatij keman mosentiliaj ininchan achto ke yaskej tanojnotsatiuij, uan tayekananij uelis kiixtaliskej kichiuaskej nejon. Jehová kiuelita keman timochikauaj tikintasojtaskej uan tikinpoujkaitaskej tokniuan akin xiuejkej (Prov. 3:27; Rom. 12:10).

18. ¿Toni tikitaskej itech okse tamachtilis?

¹⁸ Nejin tamachtilis techelnamiktij ke Jehová uan tokniuan kintasojtaj uan kinpatiuitaj akin xiuejkejya. Tokniuan xiuejkejya, maski nankipiaskej miak kuejmolmej Jehová namechpaleuis xiyolpakikan (Sal. 37:25). Maski xa nankinemiliskej ke semi kualtsin nannemiaj keman nantelpochmej katka, moneki nankielnamikiskej ke satepan okachi kualtsin nannemiskej. Sayoj ke, ¿toni techpaleuis maj tiksentokakan tiyolpakikan komo tejuan moneki tikyekpiaskej se akin xiuejkejya, se tokonetsin oso se totasojikniuj akin mokokoua? Nejin tikitaskej itech okse tamachtilis.