¿Ueliok nikuika nocarro?

¿No ijkon mitsonpanotok? Komo ijkon, ¿keniuj uelis tikonmatis ox moneki tikonsentokas tiontamanejaros?

Itech seki altepemej tekiuanij kintajtaniaj akin tamanejarouaj maj se tapajtijkej kinita uan maj kinilui ox uelisok kiuikaskej se tepos. Tokniuan akin nemij itech nejon altepemej kichiuaj tein kintajtaniaj (Rom. 13:1). Sayoj ke komo kampa tionnemi amo tajtanij nejin, uelis tikonchiuas seki taman para tikonmatis ox uelisok tiontamanejaros.

XIKONITA OX UELIOK TIONTAMANEJAROUA

Instituto Nacional sobre el Envejecimiento kiniluia akin xiuejkejya maj motajtanikan nejin:

• ¿Ueliok nikita letreros tein yetokej ojtenoj oso ueli nitachiaok de youak?

• ¿Amo ueliok niman nikita espejos para nitachias taikampa uan nimoixkepas para nikitas maj amo nitetopeua oso nechtopeuakan?

• ¿Ijsiujka ueliok nikchiua teisa kemej nimometspatas para niktsakuilis oso niktsikuinaltis carro?

• ¿Tel yolik nikuika carro uan hasta nikchiua maj amo ueli panokan oksekin?

• ¿Nikmagani carro ika okseki taman oso miakpa nechpanosneki teisa tein tel amo kuali?

• ¿Nechtsakuiliani policía porin amo kuali nitamanejaroua?

• ¿Niixkochi keman nitamanejarojtok?

• ¿Amo kuali nikuikaok carro porin nitayitok pajti?

• ¿Motekipachouaj nochankauan uan akin kuali iniuan nimouika porin nitamanejaroua?

Komo tikonnankilij kemaj se oso ome de nejin netajtanilmej, monekis tikonpatas seki taman. Xa monekis amo semi tiontamanejarosok, uan okachiok de youak. Nochipa xikonita ox tikonsentoka kuali tikonuika mocarro. Uelis tikontajtanis se akin kuali iuan tionmouika oso se mochankauj maj mitsonilui keniuj tiontamanejaroua, xa hasta uelis tionmomachtis keniuj okachi kuali tiontamanejaros. Uan komo tikonnankilij ke kemaj miakej de nejin netajtanilmej, xa okachi kuali amo xikonuikaok carro.a

BIBLIA MITSONPALEUIS XIKONMATI TONI TIKONCHIUAS

Xa ouij techkisas tikmatiskej ox ueli titamanejarouajok kemej achto. Uan xa amo tikuelitaj tiknemiliskej ke amo monekiok tiknejnemiltiskej se tepos. Maj tikitakan ome textos tein mitsonpaleuis xikonita ox uelisok tiontamanejaros oso amo.

Maj tikajsikamatikan ke seki taman amo ueli tikchiuajok (Prov. 11:2). Keman tixiuejkejya amo tiyektachiajok, amo tiyektakakijok, amo tichikaujkejok uan amo ijsiujka tikitaj tein uelis panos. Yejua ika miakej akin xiuejkejya amo mauiltiajok porin kimatij ke niman uelis mokokoskej. No ijkon moneki kichiuas se akin tamanejaroua keman kiitas ke amo semi ueliok oso ke uelis kipanos tein amo kuali (Prov. 22:3). Akin kiajsikamati ke amo nochi ueli kichiuaok, kinkaki oksekin keman kiluiaj ke motekipachouaj por yejua (no xikonita 2 Samuel 21:​15-17).

Amo tiknekij tikmiktiskej nion akin (Deut. 22:8). Komo aksa amo yektamanejaroua, uelis kichiuas maj pano tein tel amo kuali. Oso komo aksa kisentoka tamanejaroua maski amo ueliok, xa momiktis oso temiktis. Uan komo miki aksa xa hasta yejua yeski itajtakol.

Komo tikonixejekojtok ox tikonsentokas tiontamanejaros, amo xikonnemili ke amo mitsonpoujkaitaskejok komo amo tikonchiuaok. Jehová semi mitsontasojta uan yolpaki keman kiita ke tikonajsikamati ke amo nochi ueli tikonchiuaok, ke tionyolyemanik uan ke tikonneki maj oksekin kuali yetokan. Yejua no motenkaua ke mitsonpaleuis uan mitsonyolseuis (Is. 46:4). Amo keman mitsonkauas. Keman tikonixtalis ox tikonsentokas tiontamanejaros, xikontajtani Jehová maj mitsonpaleui xionmochiua xiontamatkej para tikonixtalis tein kuali.