¿Akoni kipeualtij taneltokalis itaixpantijkauan Jiova?

Tein panouani iniuan itaixpantijkauan Jiova peuak oksepa nesi keman ajsitoyaya xiuit 1900. Itech nejon xiujmej, seki oloch momachtianij ika Biblia kayomej Pittsburgh (Pensilvania, Estados Unidos) kiixtalijkej momachtiskej ika nejmachkayot iTajtol Dios. Yejua ika, kiitakej tein tamachtiayaj itech taneltokalismej uan tein Biblia yekmelauj tamachtia. Satepan peujkej kiteixmatiltiaj tein momachtijtoyaj. Kichijchiujkej libros, kijkuilojkej tataman tamachtilismej tein ixneskej itech periódicos uan kichijchiujkej amaix tein axkan moixmati kemej Tanejmachtijkej. Kiteixmatiltijtok iTekiuajyo Jiova.

Semej nejon momachtianij motokaytiaya Charles Taze Russell. Maski yejua peuak kijkuiloua amaix Tanejmachtijkej uan kiixyekanak tekit tein mochiuak itech tanojnotsalis nejon xiujmej, amo kijtosneki ke yejua kipeualtij se yankuik taneltokalis. Tein kitemouayaj, Russell uan okseki Momachtianij ika Biblia (kemej moixmatiaj), yejua kiteixmatiltiskej tein tamachtij Jesucristo uan kichiuaskej ijkon kemej kichiujkej itatojtokakauan Cristo itech yekinika siglo. Uan kemej yejua Jesús akin kipeualtij nechikol itech yekinika siglo, tikajsikamatij ke yejua no akin kipeualtij taneltokalis itaixpantijkauan Jiova (Colosenses 1:18-20).