¿Techkaki Dios keman tikiluiaj maj techpaleui?
Tein Biblia kijtoua
Kemaj. Dios kinkaki akin kitataujtiaj para kitajtaniskej teisa tein mouika ika tein kineki. Biblia hasta ininka tajtoua sekin akin kitataujtijkej Dios uan kitajtanijkej maj kinpaleui. Maj tikitakan keniuj sekin ijkon kichiujkej uan nejon techpaleuis maj no tiktataujtikan Dios, maski xa amo keman tikchiuanij.
“Xinechpaleui, Jehová noDios; kemej nochipa tinechtasojta, xinechmakixti” (Salmo 109:26)
“Sayoj ke nejua amo akin nechpaleuia uan nipobre. NoDios, ¡niman xinechpaleui!” (Salmo 70:5)
Nesi ke akin kijkuiloj nejin versículos semi takuaujtamatia iuan Dios. ¿Uan komo tejuan amo semi titakuaujtamatij? Dios no kinkaki akin kipiaj se kuali ininyolo. Biblia kijtoua ke yejua kinkaki “akin tajyouijtokej” uan “akin semi tayokoxtokej”, oso akin semi motekipachojtokej (Salmo 34:18).
Xa kemansa tiknemiliaj ke Dios semi uejka yetok de tejuan uan ke amo kitekipachoua tein techpanoua. Sayoj ke iTajtol Dios kijtoua: “Maski Jehová ueyichiujkej, kiita akin yolyemanik, sayoj ke akin moueyineki sayoj kiuejkaixmati” (Salmo 138:6). Jesús no kiniluij imomachtijkauan: “[Dios] hasta kimati kanachi tsonti nankipiaj” (Mateo 10:30). Nejin kinextia ke komo Dios kiita seki taman kemej nejin, okachiok kitalis cuidado uan techkakis keman tikiluiskej tein techtekipachoua (1 Pedro 5:7).