¿Toni kijtoua Biblia ika tetsaujmej tein mochiuaj?
Tein Biblia kijtoua
Dios amo kichiua maj onka tetsaujmej, ta ininka motekipachoua akin tajyouiaj keman mochiuaj. Tein melauj, tetsaujmej no kichiuaj maj titajyouikan axkan uan no se taman tein itaixyekanalis Dios kiixpolos amo uejkaua. Kemej ayamo ejko nejon tonal, Dios kinyolseuia akin tajyouiaj keman mochiua se tetsauit (2 Corintios 1:3).
¿Keyej tikyekmatij ke keman mochiua se tetsauit amo kijtosneki ke Dios techtatsakuiltijtok?
¿Kinextiaj tetsaujmej ke tinentokej itech tonalmej keman tatamitiya?
¿Keniuj kinpaleuia Dios akin tajyouiaj keman mochiua se tetsauit?
¿Uelis techpaleuis Biblia maj tikmatikan toni tikchiuaskej keman mochiuas se tetsauit?
Tajkuilolmej itech Biblia tein kinyolseuia akin tajyouiaj keman mochiuaj tetsaujmej
¿Keyej tikyekmatij ke keman mochiua se tetsauit amo kijtosneki ke Dios techtatsakuiltijtok?
Maski itech Biblia tikixtajtoltiaj ke Dios kichiuak maj panouani seki taman, kemej maj tel kiouini, se tetsauit semi taman. ¿Keyej?
Tetsaujmej nochin kinijtakoua. Biblia kinextia ke Jehová kichiuak maj panouani seki taman porin kinekia kintatsakuiltis akin amo yolkualmej katkaj. Sayoj ke akin amo teyi kichiujkaj amo teyi kinpanouaya. Kemej neskayot, keman Dios kinixpoloj xolalmej Sodoma uan Gomorra kimakixtij Lot, se takat akin yolkuali katka, uan ome isiuapipiluan (Génesis 19:29, 30). Jehová kuali kinixmatia Lot uan isiuapipiluan, yejua ika kinixpoloj sayoj akin kimatia ke amo yolkualmej katkaj (Génesis 18:23-32; 1 Samuel 16:7).
Tetsaujmej mochiuaj keman amo se kimattok. Sayoj ke, Dios kinnejmachtij akin amo yolkualmej katkaj achto ke kichiuaskia maj pano teisa para kintatsakuiltis, uan akin kikakkej makiskej (Génesis 7:1-5; Mateo 24:38, 39).
Tein melauj, taltikpakneminij no kichiuanij maj onka tetsaujmej. ¿Keyej? Porin semi kipitsotilianij taltikpak uan porin kichijchiuanij uejueyi kalmej kampa ijsiujka taapexoni oso taatemi, kampa talolini oso kampa semi tona oso semi taseseya (Apocalipsis 11:18). Dios amo itajtakol keman panoua tein amo kuali porin taltikpakneminij amo kuali taixpejpenaj (Proverbios 19:3).
¿Kinextiaj tetsaujmej ke tinentokej itech tonalmej keman tatamitiya?
Kemaj, tein Biblia achto kijtojka kinextia ke keman “tamitiya tein mochiujtok itech taltikpak” oso itech “tonalmej keman tatamitiya”, onkaskia tetsaujmej (Mateo 24:3; 2 Timoteo 3:1). Kemej neskayot, keman Jesús ika tajtoj nejin tonalmej, kijtoj: “Miakkan onkas mayan uan talolinis” (Mateo 24:7). Amo uejkaua, Dios kiixpolos nochi tein techtajyouiltia, hasta tetsaujmej (Apocalipsis 21:3, 4).
¿Keniuj kinpaleuia Dios akin tajyouiaj keman mochiua se tetsauit?
Dios kinyolseuia ika iTajtol. Biblia kijtoua ke Dios toka motekipachoua uan ke no tajyouia keman titajyouiaj (Isaías 63:9; 1 Pedro 5:6, 7). No kijtoua ke Dios motenkaua ke senkis kiixpolos tetsaujmej (Xikonita recuadro “Tajkuilolmej itech Biblia tein kinyolseuia akin tajyouiaj keman mochiuaj tetsaujmej”).
Dios kinyolseuia inintechkopa itekitikauan. Biblia achtook kijtojka ke Jesús kinyolseuiskia akin tajyouijtokej uan “nochin akin moyolkokojtokej” (Isaías 61:1, 2). Axkan itekitikauan Jehová mochikauaj kichiuaskej kemej Jesús (Juan 13:15).
Dios kichiua maj itekitikauan kinpaleuikan akin nemij kampa mochiuak se tetsauit (Hechos 11:28-30; Gálatas 6:10).
Seki itaixpantijkauan Jehová kinpaleuiaj akin tajyouijtokej porin panok se chikauak kiouaejekat ompa Puerto Rico.
¿Uelis techpaleuis Biblia maj tikmatikan toni tikchiuaskej keman mochiuas se tetsauit?
Kemaj. Maski Biblia amo se amatajkuilol tein senkis kijtoua toni uelis tikchiuaskej achto ke mochiuas se tetsauit, tayolmajxitia seki taman tein uelis techpaleuis. Kemej neskayot:
Xikonixtali toni tikonchiuas komo mochiua se tetsauit. Biblia kijtoua ke aksa akin tamatkej kiita ke uelis panos teisa uan motatia (Proverbios 22:3). Achto ke panos teisa moneki tikchiuaskej seki taman, kemej tiksentiliskej tein monekis uan tikixtaliskej kani timoajsiskej iniuan tochankauan komo mochiua se tetsauit. Satepan uelis timomamachtiskej keniuj tikchiuaskej.
Xikonelnamiki ke okachi tayekantok tonemilis ke tein tikpiaj. Biblia kijtoua: “Amo teyi tikualkuikej nikan taltikpak uan amo no teyi uelis tikuikaskej keman timikiskej” (1 Timoteo 6:7, 8). Maj amo tiktelpatiuitakan tochan uan tein tikpiaj, ta komo moneki, maj tikaujteuakan para timomakixtiskej. Maj tikelnamikikan ke tonemilis okachi kipia ipatiuj ke okseki taman (Mateo 6:25).