4. ¿Kinekia Dios maj titajyouikan?

¿Keyej moneki tikmatiskej nejin?

Techpaleuis maj okachi tikpatiuitakan tonemilis.

Xikonnemili nejin:

¿Keyej Dios kichijchiuak taltikpak semi takualtsinkan komo kinekia maj titajyouikan?

Sekin akin amo taneltokaj kijtouaj ke titajyouiaj porin Dios ijkon kinekia, oso hasta kijtouaj ke Dios amo nemi. Kinemiliaj ke keman titajyouiaj kinextia ke Dios amo ueli kijkuania tajyouilis, ke amo kineki kijkuanis oso ke amo nemi.

Sayoj ke, ¿moajsi okse taman keyej titajyouiaj?

Tein tamachtia Biblia

Dios amo kinekia maj titajyouikan keman techchijchiuak

Yejuatsin kineki maj tiyolpakikan.

“Amo onkak tein okachi kuali tein uelis kipanoskej, ta moyolpaktiskej uan kichiuaskej tein kuali itech ininnemilis, uan no maj nochin takuakan uan maj tatayikan uan maj kiajsikan yolpakilis ika nochi chikauak tekit tein kichiuaj. Yejua inetetayokolil Dios.” (ECLESIASTÉS 3:12, 13.)

Dios kinchijchiuak Adán uan Eva nochi kuali moajsia

Yejuatsin amo kinekia maj yejuan nion maj ininkoneuan tajyouianij.

“Dios kintiochiuak uan kiniluij: ‘Xikinpiakan miakej konemej, ximomiakilikan itech nochi taltikpak uan xikixyekanakan.’” (GÉNESIS 1:28.)

Yekinika takat uan yekinika siuat amo kitakamatkej Dios

Kemej amo tatakamatkej, semi tajyouijkej uan ininkoneuan no tajyouiaj.

“Itechkakopaka ne achtopa tagat Adán ten motajtakolmakak in tajtakol momauak ya tech nochi senmanauak. Uan no tikmatij ke ongak mikilis nochi senmanauak ika por ne tajtakol [...] porin nochi in taltikpakuani motajtakolmakakke ijkon keme ne achtopa tagat.” (ROMANOS 5:12.)a

Dios amo techchijchiuak maj toselti timoixyekanakan

Ijkon kemej yejuatsin amo techchijchiuak maj tinemikan aijtik, amo no techchijchiuak maj timoixyekanakan toselti.

“Nion kinamiki takat akin nejnentok kiyekanas itaksalis.” (JEREMÍAS 10:23.)

Dios amo kineki maj titajyouikan

Yejuatsin techiluia seki taman tein uelis tikchiuaskej tein techpaleuis maj amo tikpiakan miak kuejmolmej

“¡Komo tiktakamati notanauatiluan! Tiyolseujtos kemej ueyiat.” (ISAÍAS 48:18.)