¿Keyej titajyouiaj, tiueuentsintiaj uan timomikiliaj?

Titajyouiaj porin inintajtakol yekinika takat uan yekinika siuat

“Itechkakopaka ne achtopa tagat Adán [...] in tajtakol momauak ya tech nochi senmanauak. Uan no [...] ongak mikilis [...] por ne tajtakol de Adán. Uan no ne mikilis mosouako [...] inpan nochi in taltikpakuani” (ROMANOS 5:12).

Keman Dios kinchijchiuak yekinika takat uan yekinika siuat, Adán uan Eva, inintanemilil uan ininnakayo amo kipiaya tajtakol. Uan kampa kintalij maj nemikan semi katka takualtsinkan, itokay katka xochital Edén. Ompa, kiniluij ke ueliskiaj kikuaskej nochi koujtakilomej, sayoj se amo. Sayoj ke Adán uan Eva kiixtalijkej kikuaskej nejon koujtakilot uan ijkon motajtakolmakakej (Génesis 2:15-17; 3:1-19). Kemej Adán uan Eva amo tatakamatkej, Dios kinkixtij den xochital. Uan ijkuak, peujkej tajyouiaj. Panok tiempo uan kinpiakej konemej, uan yejuan okachi tajyouijkej. Nochin ueuentsintiakej uan momikilijkej (Génesis 3:23; 5:5). Kemej nochin tiikoneuan Adán uan Eva yejua ika tinochin tiueuentsintiaj, tikokolispeuaj uan timomikiliaj.

Titajyouiaj porin inintajtakol amokuali ejekamej

“In taltikpakuani kinyekana ok yejua in amokuali Satanás” (1 JUAN 5:19).

“Amokuali”, yejua Satanás, se ángel akin kiixnamikik Dios (Juan 8:44; Apocalipsis 12:9). Panok se tiempo uan okseki ángeles taixnamikkej kemej Satanás uan mochiujkej amokuali ejekamej. Nejon amokuali ejekamej kikuij ininchikaualis para takajkayauaskej uan no kichiuaj maj amo akin motoki iuan Dios, uan hasta sekin kinchiualtiaj tein amo kuali (Salmo 106:35-38; 1 Timoteo 4:1). Satanás uan iamokuali ejekauan semi kiuelitaj techtajyouiltiskej.

No titajyouiaj keman amo kuali titaixpejpenaj

“Nochi tatokme ten in tagat motokilis, yejua nojon takilot kiselis” (GÁLATAS 6:7).

Kemansa titajyouiaj porin titajtakolejkej uan porin Satanás taixyekana nikan taltikpak. Sayoj ke kemansa tejuan tikchiuaj maj titajyouikan. Ijkon kemej ijkuak tikchiuaj tein kuali, tikseliaj tein kuali, keman tikchiuaj tein amo kuali oso amo kuali titaixpejpenaj, titajyouiaj. Ijkon kemej se tepopaj akin amo tachteki, kuali tekiti uan kintasojta ichankauan, kinpaleuis maj yolpakikan. Sayoj ke, komo kiuelita mauiltis ika tomin, semi tauana oso amo tekiti, kichiuas maj ichankauan amo kipiakan toni ika moixpanoltiskej. Yejua ika moneki maj tikauakan maj techixyekana Dios Akin techchijchiuak, porin yejuatsin kineki maj tikselikan miak taman tein kuali, kemej “ueyi yolseuilis” (Salmo 119:165).

Titajyouiaj porin tinemij “itamian tonalmej”

“Itech itamian tonalmej [...] takamej sayoj yejuan motasojtaskej, kitasojtaskej tomin, [...] amo kintakamatiskej inintatuan, [...] amo motsakuiliskej, tetajyouiltiskej, amo kitasojtaskej tein kuali” (2 TIMOTEO 3:1-5, TNM).

Axkan miakej kichiuaj kemej Biblia achto kijtojka, uan nejin se taman tein kinextia ke amo uejkaua ixpoliuis tein amo kuali porin tinemij “itamian tonalmej”. Biblia no kijtoj ke itech totonaluan onkaskia neteuilis, mayan, talolinilis uan miakej kokolispeuaskiaj ika miak taman (Mateo 24:3, 7, 8; Lucas 21:10, 11). Ika nochi nejin miakej tajyouiaj uan momikiliaj.