Keniuj celular uelis kijtakos akin iniuan kuali tionmouika
Axkan ueli timonojnotsaj iniuan oksekin maski semi uejka yetoskej, porin ueli tikintajkuilouiliaj, tiktitanij correo, tikchiuaj videoconferencias uan ika redes sociales. Itech nejin, celular semi tapaleuia.a
Sayoj ke akin nochipa kikuitokej celular para kinnojnotsaskej akin kuali iniuan mouikaj, uelis kinpanos nejin:
Amo semi kinajsikamatij akin kuali iniuan mouikaj.
Momachiliaj okachi ininselti uan amo yolpakij.
Okachi inintech tanemiliaj.
TEIN MONEKI TIKONMATIS
SE TEAJSIKAMATIS
Para se teajsikamatis moneki achto kuali se kinemilis keniuj momachiliaj oksekin. Nejin amo uelis tikchiuaskej komo tiklerojtokej tein kitejkoltiaj itech redes sociales uan ijsiujka titajkuilojtokej.
Komo nochipa amo kuali tikonkui mocelular amo tikonpatiuitasok tikonnankilis akin kuali iniuan tionmouika, ta tikonitas kemej se taman tein ipa tikonchiua. Uan xa amo tikonpaleuis akin kuali iuan tionmouika komo kipanoua se ouijkayot, porin nochin ijsiujka tikontajkuilouilijtos.
XIKONNEMILI NEJIN: ¿Keniuj tikonnextis ke tionteajsikamati keman tikonkuis mocelular para tiontajtos akin iniuan kuali tionmouika? (1 PEDRO 3:8).
AMO SE YOLPAKI
Seki taixmatinij kiitakej ke miakej amo kuali momachilijkej keman miak tiempo kiitstoyaj se red social. Yejuan kijtojkej ke keman tikitaj taixkopimej uan tein kijkuilouaj oksekin, “uelis kichiuas maj tikmachilikan ke amo tikchiujtokej nion teyi tein kualtsin”.
Uan no, keman tikitaj taixkopimej kampa nesi ke oksekin kichiujtokej miak taman tein ika moyolpaktiaj uan tikitaj tein tejuan tikchiujtokej, uelis tiknemiliskej ke amo tikmatij timoyolpaktiskej.
XIKONNEMILI NEJIN: Keman tikonkuis redes sociales, ¿toni mitsonpaleuis amo xikonita ke oksekin okachi kualtsin tein kichiuaj? (GÁLATAS 6:4).
SAYOJ TOTECH TITANEMILISKEJ
Se tamachtijkej kijtoj ke sekin akin kinmachtia sayoj inintech tanemiliaj uan sayoj kitemouaj mouikaskej iniuan akin kinpaleuiaj uan nochipa kintenpaleuiaj.b Akin kichiuaj kemej nejin sayoj tanemiliaj itech tein uelis kiseliskej. Yejua ika, xa aksa kiitas ke akin kuali iniuan mouika kemej yeskia aplicaciones tein uelis kitapos uan kitsakuas keman kinekis.
XIKONNEMILI NEJIN: ¿Kinextia tein tikontejkoltia itech Internet ke tikonuelita tionmotatanis iniuan oksekin uan sayoj motech tiontanemilia? (GÁLATAS 5:26).
TEIN UELIS TIKONCHIUAS
XIKONNEMILI KENIUJ TIKONKUI MOCELULAR
Komo tikonkui mocelular ika taixejekolis uelis tionmonojnotsas iniuan akin kuali tionmouika uan okachi kuali namouikaskej.
TEIN BIBLIA KIJTOUA: “Tetasojtalis [...] amo no kinemilijtinemi sayo ten niaxka” (1 CORINTIOS 13:4, 5).
Xikontsojkuilo tein tikonuelitaskia tikonchiuas oso xikonijkuilo tein tikonnemilia:
Okachi nitajtos iniuan oksekin uan amo sayoj nitajkuilos oso niktitanis correos.
Nikauas nocelular oso niktalis maj amo kakisti keman nitajtojtos iniuan oksekin.
Amo miak tiempo nikitstos redes sociales.
Nikinkakis oksekin.
Niknotsas aksa akin kuali iuan nimouika akin kipanotos se ouijkayot.
a Maski ika titajtoskej celular, no kijtosneki tableta, computadora uan okseki teposmej.
b Kemej kijtoua amatajkuilol En defensa de la conversación.