Semi moneki maj tikmatikan ox aksa tachijchiuak
¿Keyej semi moneki tikmatiskej nejin? Komo tikonneltoka ke nemi Dios akin semi chikauak porin onkak miak taman tein kinextia ke yekmelauj nemi, xa tikonnekis tikonitas ox Biblia iaxka Dios. Uan komo satepan tiontakuaujtamati itech Biblia tikonselis nejin.
Okachi tionyolpakis
BIBLIA KIJTOUA: Dios “kinpaleuijtiaya. Uan [...] kinualtitaniliaya in kioutsin uan kinmaktiliaya kuajkuali takilome. Uan no [...] namechmaktiliaya uel miak in takualis para nanixuitoske uan para nanmoyolpaktijtoske” (Hechos 14:17).
¿TONI KIJTOSNEKI? Ke Akin techchijchiuak techtayokolijtok miak taman tein kualtsin. Okachi tikonuelitas tein techtayokolijtok keman tikonitas itech Biblia ke semi moka motekipachoua.
Tikonajsis tayolmajxitilis tein semi mitsonpaleuis
BIBLIA KIJTOUA: “Tikajsikamatis melaujkayot uan tamelaualis uan kuali taixejekolis, ojti tein kinextia tein kuali” (Proverbios 2:9).
¿TONI KIJTOSNEKI? Kemej Dios mitsonchijchiuak, yejuatsin kimati tein mitsonpaleuis xionyolpaki. Komo tionmomachtia tein kijtoua Biblia tikonajsis tein mitsonpaleuis.
Uelis tikonmatis tein tionmotajtaniani
BIBLIA KIJTOUA: “Tikajsis itaixmatilis Dios” (Proverbios 2:5).
¿TONI KIJTOSNEKI? Tikonmatis ke aksa tachijchiuak mitsonpaleuis xikonmati seki taman tein semi moneki, kemej keyej tinemij, keyej semi titajyouiaj oso toni techpanoua keman timomikiliaj. Tikonajsis tanankililmej itech Biblia tein taixejekol.
Tikonchias tikonselis tein kuali satepan
BIBLIA KIJTOUA: “Nejua kuali nikixmati tanemililmej tein niknemilijtok namoka, ijkon kijtoua Jiova, tanemililmej ika yolseuilis, uan amo ika tajyouilis, ijkon namechmakas satepan tein kuali uan se nechialis” (Jeremías 29:11).
¿TONI KIJTOSNEKI? Dios kijtoua ke kiixpolos tein amo kuali tein techtajyouiltia uan hasta mikilis. Komo tiontakuaujtamati itech tein Dios kijtoua ke mochiuas, mitsonpaleuis xikonixnamiki kuejmolmej tein tikonpias mojmostaj.