KUEJMOLMEJ TEIN AXKAN ONKAK

1 | Xionmoyekpia

¿KEYEJ SEMI MONEKI?

Porin ouijkayomej tein tikpanouaj uelis techkokolispeualtiskej.

Keman mochiua tein amo kuali, taltikpakneminij semi motekipachouaj uan niman peuaj mokokouaj.
Kemansa, tapajtianij amo uelijok kinpajtiaj nochin oso amo ajsi pajti.
Uan no, miakej amo kinajsi tomin para kikouaskej tein kikuaskej oso pajti.

¿Tikonmatia?

Komo tionmokokoua oso tionmotekipachojtok uelis kichiuas amo xionmoyekpia. Uan nejon kichiuas okachi xionkokolispeua.
Komo amo tionmopajtia, kokolis uelis moueyitalis uan hasta ika tionmomikilis.
Komo tionpaktok, okachi kuali tiontaixpejpenas keman tikonpias se ouijkayot.
Uelis tikonchiuas seki taman para tionpaktos, maski tikonpias miak tomin oso amo.

¿Toni uelis tikonchiuas?

Akin kuali taixejekoua kiita tein amo kuali tein uelis panos uan kiita maj amo mochiua. Yejua ika, komo amo tikonneki tionkokolispeuas oso maj kokolis okachi mochikaua, moneki tikontayekanaltis tachipaualis. Okachi kuali komo tikontsakuilia kokolis.

“Komo timochipauaj uan timotachipauiaj kampa tinemij, amo semi monekis tiaskej iniuan tapajtianij nion tikouaskej miak pajti” (Andreas).a

a Mopatakej seki tokaymej.

KENIUJ TIKIXNAMIKISKEJ: Seki tayolmajxitilismej

Maski onkas kuejmolmej, uelis tionpaktos komo tikonchiua nejin

TACHIPAUALIS

Tachipaualis

Biblia kijtoua: “Tamatkej kiita ouijkayot uan motatia” (Proverbios 22:3). Xikonita tein uelis mitsonkokolispeualtis uan amo xikonchiua.

Nochipa xionmomapajpaka ika xapoj uan at, okachiok keman tikonmatokas tein tikonkuas uan satepan ke tionyas nekalauiloyan.
Nochipa xiontachipaua ika tein kipia alcohol, okachiok tein semi tikonkui uan tikonmatoka.
Amo semi xionmotoki iniuan akin mokokouaj uan uelis mitsonmauaskej.

XIKONKUA TEIN MITSONCHIKAUAS

Xikonkua tein mitsonchikauas

Biblia kijtoua: “Amo akin kitauelita inakayo, ta motamaka uan kuali moyekpia” (Efesios 5:29, TNM). Tiknextiaj ke tiktasojtaj tonakayo komo sayoj tikuaj tein techpaleuia.

Xiontayi miak at.
Xikonkua tataman takilomej uan kilmej.
Amo xikonkua tein kipia miak chiauak, tein semi istayoj oso semi tsopek.
Amo xiontachichina, amo xikonkui drogas nion semi xiontayi tayil tein teuintij.

“Para amo tikokolispeuaskej, tikuaj sayoj tein techpaleuia. Komo amo ijkon tikchiuaj, tepitsin tomin tein tiktanij sayoj tamis itech pajti uan tapajtianij. Okachi kuali tikuij totomin para tikouaskej takual tein techpaleuia” (Carlos).

XIKONCHIUA TEIN MITSONCHIKAUAS UAN KUALI XIONKOCHI

Xikonchiua tein mitsonchikauas

Biblia kijtoua: “Okachi kuali maj se moseui ke chikauak se motekitiltis uan se kitojtokas ejekat” (Eclesiastés 4:6). Kuali maj se tekiti sayoj ke no kuali maj se moseui.

Xikonchiua seki taman. Yekinika uelis tionyas tionnejnemitiuj oso tikonchiuas okseki taman tein mitsonpaleuis xionmoolini. Nejon kichiuas kuali xionmomachili, maski xa tejuatsin tionxiuejya oso tikonpia se kokolis.
Kuali xionkochi

Kuali xionkochi. Komo amo tionyekkochi, okachi tionmotekipachos uan mitsonouijmakas kuali tiontanemilis. Uan satepan uelis kichiuas xionkokolispeua.
Xikonixtali se hora keman tionkochis uan se hora keman tionmeuas uan mojmostaj ijkon xikonchiua.
Amo xikonita televisión, tableta oso celular keman tionuetstosya para tionkochis.
Amo semi xiontakua, amo xikonkua nion xiontayi tein kipia cafeína oso tayil tein teuintij keman tionkochitia.

“Komo niyekkochi kichiua maj nipakto. Komo amo ijkon nikchiua, nechkokoua notsontekon uan nochi nonakayo. Sayoj ke komo kuali nikochi, nikpia chikaualis para nikchiuas miak taman uan okachi nipaktok” (Justin).