Toni uelis se kichiuas komo ijsiujka se kokolispeua

¿Ijsiujka tionkokolispeuani? Komo ijkon mitsonpanouani, tikonmati ke semi se motekipachoua, tesioujtia uan moneki miak tomin. ¿Toni uelis tikonchiuas para tiontaxikos? ¿Keniuj uelis tikonpaleuis se mochankauj oso se akin kuali iuan tionmouika komo mokokoua? Maski tein kijtoua Biblia amo techpaleuia maj tipajtikan, kemaj kijtoua seki taman tein techpaleuia maj titaxikokan.

Tein uelis tikonchiuas keman tionkokolispeua

• Xiouj xikonitati tapajtijkej.

  Tein kijtoua Biblia: “Akin paktokej amo moneki maj kiitatij tapajtijkej, sayoj ke akin mokokouaj kemaj” (Mateo 9:12).

  Toni kijtosneki: Xiouj iuan tapajtijkej komo moneki.

  Uelis tikonchiuas nejin: Xikontemo keniuj okachi kuali uelis mitsonpajtiskej. Xa uelis tikonitas toni kijtoua okse tapajtijkej (Proverbios 14:15). Xikonnojnotsa motapajtijkauj. Komo amo tikonajsikamati teisa, xikontajtani uan xikonilui nochi tein mitsonpanoua uan tein tikonmachilia (Proverbios 15:22). Kuali xikonmati toni kichiua mokokolis, uan keniuj uelis tionmopajtis. Komo tikonmati tein uelis mitsonpanos, amo tionmotayokoltis uan tikonmatis toni uelis tikonchiuas para tionmopajtis.

• Xikonchiua tein mitsonpaleuis xionpakto.

  Tein kijtoua Biblia: “Keman tikchikauaj tonakayo techpaleuia itech seki taman” (1 Timoteo 4:8).

  Toni kijtosneki: Xikonchiua seki taman tein mitsonpaleuis xionpakto kemej tikonchiuas ejercicio.

  Uelis tikonchiuas nejin: Xikonchiua ejercicio, kuali xiontakua uan kuali xionkochi. Tapajtianij kijtouaj ke semi tepaleuia se kichiuas nejin maski seki taman kemej tinemia mopataka. Sayoj ke, xikonchiua sayoj tein tionuelis para amo okachi tionkokolispeuas.

• Xikonilui akin kuali iniuan tionmouika maj mitsonpaleuikan.

  Tein kijtoua Biblia: “Akin yekmelauj kuali iuan timouikaj nochipa techtasojta, uan mochiua kemej se tokniuj keman titajyouiaj” (Proverbios 17:17).

  Toni kijtosneki: Akin kuali iniuan tionmouika uelis mitsonpaleuiskej keman tiontajyouijtos.

  Uelis tikonchiuas nejin: Xikonilui se akin kuali iuan tionmouika keniuj tionmomachilia. Nejon mitsonpaleuis amo semi xionmotekipacho uan xionyolseujto. Xa mochankauan uan akin kuali iniuan tionmouika kinekij mitsonpaleuiskej sayoj ke xa amo kimatij keniuj kichiuaskej. Yeua ika xikonyekilui toni uelis kichiuaskej. Amo xikonchia maj ueli kichiuakan teisa kemej tikonneki uan xikontasojkamati nochi tein kichiuaskej. Maski akin kuali iniuan tionmouika kinekij mitsonpaleuiskej, kemansa no uelis mitsonsioujtiskej. Yejua ika, xa monekis tikonixtalis seki taman, kemej kanachpa uelis mitsonkalpanoskej uan kanachi tiempo uejkauaskej.

• Amo xionmotayokolti ta xionyolpaki.

  Tein kijtoua Biblia: “Akin yolpaki mochiua kemej yeskia se kuali pajti, sayoj ke akin semi tayokoya semi sioui” (Proverbios 17:22).

  Toni kijtosneki: Komo tionyolpaki uan amo tionmotayokoltia mitsonpaleuis amo semi xionmotekipacho uan xiontaxiko.

  Uelis tikonchiuas nejin: Kemej tikokoxkej, xikonchiua sayoj tein tionueli uan amo xikonemilijtook toni amo ueli tikonchiua. Amo xikonita tein oksekin ueli kichiuaj uan tejua amo, nion itech xiontanemilijto tein amo ueliok tikonchiua kemej achto (Gálatas 6:4). Uelis tikonixtalis seki taman tein uelis tikonchiuas. Nejon mitsonpaleuis xionyolpaki (Proverbios 24:10). Xikonpaleui oksekin kemej tionuelis. Xikonelnamiki ke komo tikonuelita tikonpaleuis oksekin okachi tiyolpakis, uan amo tikonnemilijtos tein mitsonpanotok (Hechos 20:35).

¿Uelis Dios mitsonpaleuis keman tikonpia se kokolis?

Biblia kinextia ke Jehová Diosa uelis techpaleuis maj titaxikokan keman timokokouaj. Xa amo techpajtis ika se milagro sayoj ke kemaj techpaleuis. ¿Keniuj kinpaleuia Dios akin kiueyichiuaj?

Kinyolseuia. Biblia kijtoua ke Jehová uelis techyolseuis “kemej amo akin ueli kiajsikamati” (Filipenses 4:6, 7). Nejon uelis techpaleuis maj amo semi timotekipachokanok. Dios kinyolseuia akin kitataujtiaj uan kiluiaj toni kintekipachoua (1 Pedro 5:7).

Kinpaleuia maj tamatinij. Jehová uelis techpaleuis maj kuali titaixpejpenakan (Santiago 1:5). Keman timomachtiaj Biblia uan tikchiuaj tein ompa kijtoua, timochiuaj titamatinij.

Kiniluia ke satepan amo akin kokolispeuasok. Jehová motenkaua ke amo uejkaua “nion akin kijtos: ‘Nimokokoua’” (Isaías 33:24). Nejin tein Dios motenkaua kinpaleuiani miakej maj yolpakikan maski kipiaj se kokolis tein semi kintajyouiltia (Jeremías 29:11, 12).