¿Keyej tel miakej amo kintakachiuajok oksekin?

**¿KEYEJ MONEKI MAJ TIKINTAKACHIUAKAN OKSEKIN?**

Keman titetakachiuaj amo timokualantiaj iniuan oksekin.

Se proverbio itech Biblia kijtoua: “Komo kuali tiknankiliaj akin kualantok, tikyolseuiaj, sayoj ke komo amo kuali tiknankiliaj okachi tikualantiaj” (Proverbios 15:1). Keman tikchiuaj uan tikijtouaj teisa tein teyolkokoj, kichiua maj okachi timokualantikan iuan aksa uan amo no kuali iuan timouikajok.
Jesús kijtoj: “Tein semi se kinemilijtok yejua tein se kijtoua” (Mateo 12:34). Yejua ika, keman amo kuali tikinnojnotsaj oksekin, tiknextiaj ke tikinchikoitaj akin taman ixtamatij, akin kayomej okse altepet uan akin no taman kemej nemij.

Keman kintajtanijkej teisa panoua 32 mil akin nemij itech 28 tataman altepemej, panoua de tajko kijtojkej ke axkan okachi kiitanij ke amo tetakachiuajok.

¿KENIUJ UELIS TIKONNEXTIS KE TIONTETAKACHIUA?

Keman tionyetos kampa tiontekiti oso kampa tionmomachtia, nochipa xiontetakachiua maski amo tanemiliskej kemej tejua. Xikontemo seki taman tein yejuan kuali kiitaj uan tejua no. Ijkon amo tikonitas tein amo kuali tein kichiuaj uan amo no tikonijijtos.

“Amo xiksentokakan xikinijijtokan oksekin uan ijkon amo no namechijijtoskej” (Mateo 7:1).

Xikonchiuili oksekin tein tikonuelitaskia maj mitsonchiuilikan. Komo tionteajsikamati uan tionyolkuali, xa oksekin no ijkon kichiuaskej mouan.

“Xikinchiuilikan oksekin tein nankiuelitaskiaj maj namechchiuilikan” (Lucas 6:31).

Xiontetapojpolui. Xikonnemili ke amo kinekia mitsonyolkokos uan komo aksa mitsoniluia oso mitsonchiuilia teisa tein ika mitsonyolkokoua, xikontapojpolui.

“Akin yektalnamiki amo niman kualani, uan semi kualtsin keman kitapojpoluia akin kiyolxokolij” (Proverbios 19:11).

Itech se Kali kampa Mosentiliaj itaixpantijkauan Jehová, miakej akin tataman xiuit kipiaj uan tataman kemej moskaltijkej kualtsin motajpalouaj uan monojnotsaj achto ke peuas nechikol.

¿KENIUJ ITAIXPANTIJKAUAN JEHOVÁ KINEXTIAJ KE TETAKACHIUAJ?

Itaixpantijkauan Jehová kinextiaj ke tetakachiuaj kampa nemij oso kampa tekitij.

Amo tikintaxtaualtiaj keman tikinmachtiaj Biblia nochin akin kinekij momachtiskej, sayoj ke amo keman tikinchikaujkauiaj maj tanemilikan kemej tejuan nion maj kineltokakan tein tejuan tikneltokaj. Ta tikchiuaj tein Biblia tayolmajxitia porin ‘tiyolnejmachmej uan titetakachiuaj’ keman titanojnotsaj (1 Pedro 3:15; 2 Timoteo 2:24).

Tejuan amo akin tikixtopeuaj. Itech tonechikoluan kuali tikinseliaj nochin akin kinekij momachtiskej Biblia maski tataman kemej moskaltijkej. Timochikauaj kuali timouikaskej iniuan nochin uan ‘tikintakachiuaj’ (1 Pedro 2:17).

Tikintakachiuaj nochin tekiuanij (Romanos 13:1). Tikchiuaj tein technauatiaj, tikixtauaj impuestos uan tikinpaleuiaj keman kiixtaliaj teisa para kuali yetoskej nochin. No tikinpoujkaitaj oso tikintakachiuaj hasta akin kiixtaliaj mokalakiskej itech política.