Maj tikinpoujkaitakan oksekin

1. ¿Keyej tikuelitaj maj oksekin techpoujkaitakan? (Proverbios 22:1).

¿TIKONUELITA maj oksekin mitsonpoujkaitakan oso maj mitsonpatiuitakan? Tinochin tiknekij maj techpoujkaitakan uan tiyolpakij keman ijkon kichiuaj. Yejua ika Biblia kijtoua ke “okachi kuali maj tepoujkaitakan ke se kipias plata uan oro” (xikonlero Proverbios 22:1).

2, 3. ¿Keyej kemansa techouijmaka titapoujkaitaskej, uan toni tikitaskej itech nejin tamachtilis?

² Maski ijkon, kemansa techouijmakas tikinpoujkaitaskej oksekin. ¿Keyej? Porin tikitaj tein amo kuali tein kichiuaj, uan porin axkan tel miakej amo tapoujkaitaj. Sayoj ke tejuan tiknekij titapoujkaitaskej porin Jehová techiluia maj ijkon tikchiuakan iniuan “nochin” (1 Ped. 2:17).

³ Itech nejin tamachtilis tikitaskej toni kijtosneki maj se tapoujkaita uan keniuj uelis tiknextiskej ke tikinpoujkaitaj 1) tochankauan, 2) tokniuan uan 3) akin amo itaixpantijkauan Jehová. Okachi tikitaskej keniuj uelis tikinpoujkaitaskej oksekin maski kemansa ouij yeski.

¿TONI KIJTOSNEKI MAJ SE KINPOUJKAITA OKSEKIN?

4. ¿Toni kijtosneki maj se kinpoujkaita oksekin?

⁴ Titapoujkaitaskej kijtosneki kuali tikinitaskej oksekin uan tiknextiskej ke tiyolkualmej iniuan. Keman tikmatij ke aksa kichiua uan kinextia seki taman tein kuali, kichiuani tein se kimojkaita oso kipia tanauatil, tikitaj ke moneki tikpoujkaitaskej. Sayoj ke keman titapoujkaitaskej moneki tikchiuaskej porin yekmelauj ijkon tikmachiliaj (Mat. 15:8).

5. ¿Keyej tiknekij tikinpoujkaitaskej oksekin?

⁵ Jehová kineki maj tikinpoujkaitakan oksekin, uan tikmatij nejin porin no technauatia maj tikinpoujkaitakan ‘tekiuanij akin taixyekanaj’ (Rom. 13:​1, 7). Sayoj ke xa uelis tiknemiliskej: “Nejua sayoj nikpoujkaitas akin kinamiki”. ¿Kuali yetok maj ijkon titanemilikan? Amo. Akin tiktekitiliaj Dios tikinpoujkaitaj nochin maski kichiuaskej tein kuali oso amo, uan ijkon tikchiuaj porin tiktasojtaj Jehová uan tiknekij tikyolpaktiskej (Jos. 4:14; 1 Ped. 3:15).

6. Xikonmelaua keyej uelis tikinpoujkaitaskej oksekin maski yejuan amo techpoujkaitaskej (No xikonita taixkopin).

⁶ Xa timotajtaniskej: “¿Uelis nikinpoujkaitas oksekin maski yejuan amo nechpoujkaitaskej?”. Kemaj. Maj tikitakan toni kichiujkej sekin ne uejkauj. Tekiuaj Saúl kipinaujtij iokichpil Jonatán senteixtenoj (1 Sam. 20:​30-34). Maski ijkon, Jonatán kisentokak kipoujkaitak ipopaj uan iuan tateuij hasta ke kimiktijkej Saúl (Éx. 20:12; 2 Sam. 1:23). Tayekankatiopixkat Elí kiluij Ana ke katka se tauankej (1 Sam. 1:​12-14). Sayoj ke Ana kuali kinankilij maski nochin israelitas kimatiaj ke Elí amo kintakaualtiaya ikoneuan akin kichiuayaj tein amo kuali. Yejua monekia kintakaualtis porin katka inintat uan tayekankatiopixkat (1 Sam. 1:​15-18; 2:​22-24). Uan seki takamej ompa Atenas kiuijuikaltijkej tatitanil Pablo keman kijtojkej ke eliuis tajtouaya (Hech. 17:18). Sayoj ke Pablo kisentokak kuali kinnojnotsak (Hech. 17:22). Nejin kinextia ke komo semi tiktasojtaj Jehová uan amo tiknekij tikyolkokoskej, uelis tikinpoujkaitaskej oksekin hasta keman ouij yeski. Axkan maj tikitakan akonimej moneki tikinpoujkaitaskej uan keyej.

MAJ TIKINPOUJKAITAKAN TOCHANKAUAN

7. ¿Keyej xa techouijmakas tikinpoujkaitaskej tochankauan?

⁷ ¿Keyej xa amo tiknekiskej tikinpoujkaitaskej? Porin nochipa iniuan tietokej uan tel kuali tikinixmatij, tikmatij toni tein kuali kichiuaj uan toni amo. Xa se tochankauj kipia se kokolis tein kichiua maj semi motekipacho oso mokokoua ika okse taman uan yejua ika semi techouijmaka tikyekpiaskej. Sekin xa kijtouaj oso kichiuaj seki taman tein techyolkokoua. Oksekin xa amo techpoujkaitaj uan yejua ika iniuan timokualantiaj. Nochi nejin kichiua maj amo kuali timouikakanok. Tochankauan tamatij kemej tonakayo. Se kokolis uelis kichiuas maj tonakayo amo yektekiti. No ijkon, komo semej amo tapoujkaita uelis kichiuas maj tinochin amo kuali timouikakanok. Sayoj ke ijkon kemej seki kokolismej ueli pajtij, tochankauan uelisok kuali mouikaskej uan mopoujkaitaskej.

8. ¿Keyej moneki maj tikinpoujkaitakan tochankauan? (1 Timoteo 5:​4, 8).

⁸ ¿Keyej moneki tikinpoujkaitaskej? (Xikonlero 1 Timoteo 5:​4, 8). Itech yekinika carta tein Pablo kijkuilouilij Timoteo, kijtoj toni monekia tikchiuaskej tisejsemej para tikinmakaskej tein kinpoloua tochankauan. No kijtoj ke moneki tikinpoujkaitaskej porin ika ‘tikueyichiuaj’ Jehová uan tiktasojtaj, uan amo sayoj porin moneki ijkon tikchiuaskej. Jehová kiixtalij maj tikinpiakan tochankauan (Efes. 3:​14, 15). Yejua ika keman tikinpoujkaitaj, tiknextijtokej ke tikpoujkaitaj Jehová. Nejin kinextia ke motelneki maj tikinpoujkaitakan tochankauan.

9. ¿Keniuj se takat uan isiuatsin uelis monextiliskej ke mopoujkaitaj? (No xikonita taixkopimej).

⁹ ¿Keniuj tiknextiskej ke tikinpoujkaitaj? Tetakauj akin kipoujkaita isiuatsin kinextilia ke kipatiuita keman kinitstokej uan keman amo (Prov. 31:28; 1 Ped. 3:7). Amo keman kimaga nion kipijpinaujtia, uan amo kichiua maj isiuatsin kinemili ke amo kinamiki maj kitasojtakan. Ariela se tokniuj takat de Argentina, kijtoua: “Kemej nosiuatsin semi mokokoua, kemansa nechiluia seki taman tein ika nechyolkokoua. Keman ijkon kichiua, nikelnamiki ke amo kinekia nechyolkokos uan itech nitanemilia 1 Corintios 13:​5, nejon semi nechpaleuia maj amo niktauelnojnotsa uan maj nikpoujkaita” (Prov. 19:11). Uan no, siuat akin tapoujkaita kuali ika tajtoua itakatsin (Efes. 5:33). Amo kipijpinaujtia, amo kikejkeloua, amo kiuijuikaltia uan amo kitokaytia ika teisa tein kiyolkokos porin kiajsikamati ke komo ijkon kichiua, amo kuali mouikaskejok (Prov. 14:1). Se tokniuj siuat de Italia akin itakatsin kipia se kokolis tein kichiua maj semi motekipacho, kijtoua: “Kemansa nikmachilia ke notakatsin semi ika motekipachoua tein yeski taman. Achto, niknextiliaya ika noixko uan ika tein nikiluiaya ke amo nikpoujkaitaya. Sayoj ke nikitani ke semi nechpaleuiani maj nikpoujkaita keman iniuan nimouika akin tapoujkaitaj”.

10. ¿Keniuj telpochmej uelis kinextiskej ke kinpoujkaitaj inintatuan?

¹⁰ Telpochmej uan ichpochmej, xikintakamatikan namotatuan uan xikinpoujkaitakan keman nankinnojnotsaskej (Éx. 21:17; Efes. 6:​1-3). Keman motatuan yeskij xiuejkejya, xa monekis okachi tikinpaleuis. Yejua ika xiktemo keniuj kuali tikinyekpias. Maj tikitakan tein kipanok se tokniuj siuat akin monotsa María. Keman ipopaj akin amo itaixpantijkauj Jehová kokolispeuak, María monekik kiyekpias, sayoj ke katka semi ouij porin kiluiaya miak taman tein ika kiyolkokouaya. Yejua kijtoua: “Niktataujtiaya Jehová maj nechpaleui maj nikpoujkaita nopaj. Peuak niknemilia ke komo Jehová technauatia maj tikinpoujkaitakan totatuan, yejua techpaleuis maj ijkon tikchiuakan. Satepan nikajsikamatik ke moneki nikpoujkaitas nopaj maski yejua amo mopatas”. Keman tikinpoujkaitaj tochankauan maski kemansa semi ouij, tiknextiaj ke tikpoujkaitaj Jehová, akin kiixtalij maj tikinpiakan tochankauan.

MAJ TIKINPOUJKAITAKAN TOKNIUAN

11. ¿Keyej kemansa amo tiknekiskej tikinpoujkaitaskej tokniuan?

¹¹ ¿Keyej xa amo tiknekiskej tikinpoujkaitaskej? Maski tokniuan mochikauaj kichiuaskej tein kijtoua Biblia, kemansa xa techyolkokoskej, kijtoskej teisa de tejuan oso techkualantiskej. Komo ‘aksa techchiuilia tein amo kuali’ xa amo tiknekiskejok tikpoujkaitaskej (Col. 3:13). Sayoj ke, ¿toni uelis techpaleuis maj tikpoujkaitakan?

12. ¿Keyej semi moneki maj tikinpoujkaitakan tokniuan? (2 Pedro 2:​9-12).

¹² ¿Keyej moneki tikinpoujkaitaskej? (Xikonlero 2 Pedro 2:​9-12). Itech ojpatika carta tein Pedro kijkuiloj, kijtoj ke sekin tokniuan itech nechikolmej amo kinpoujkaitayaj “akin Dios kinueyitalia”, oso tayekananij. ¿Toni kichiujkej ángeles keman kiitakej nejon? Pedro kijtoj ke kemej kipoujkaitaj Jehová, amo kijtojkej nion teyi tein amo kuali de nejon tokniuan akin amo tapoujkaitayaj. Se kimojkaita maj ángeles akin amo tajtakolejkej, amo kijtouanij nion teyi, ta kikaujkej maj Jehová kinmelaua (Rom. 14:​10-12; no xikonita Judas 9). Komo ángeles kinpoujkaitakej nejon taixnamikinij, tejuan okachiok moneki tikinpoujkaitaskej tokniuan akin kitasojtaj Jehová, uan moneki “achto” tejuan titapoujkaitaskej (Rom. 12:10). Komo ijkon tikchiuaj, tiknextiskej ke tikpoujkaitaj Jehová.

13, 14. ¿Keniuj tiknextiaj ke tikinpoujkaitaj tokniuan? (No xikonita taixkopimej).

¹³ ¿Keniuj tiknextiskej ke tikinpoujkaitaj? Tokniuan tayekananij, nochipa xiknextikan ke nantetasojtaj keman nantamachtiskej (Filem. 8, 9). Komo moneki nankiyolmajxitiskej aksa, xiknojnotsakan kemej moneki uan amo xikajuakan. Tokniuan siuamej, komo amo nanteijijtouaj uan amo nantetakajkayauiliaj, uelis nantapaleuiskej maj tokniuan itech nechikol kuali mouikakan uan maj mopoujkaitakan (Tito 2:​3-5). Uan tinochin uelis tikinpoujkaitaskej tayekananij. ¿Keniuj? Maj tikchiuakan tein kiixtaliaj uan maj tikiniluikan ke semi tikintasojkamatiliaj porin tamachtiaj itech nechikolmej, kiitaj maj kuali motanojnotsa uan porin kinpaleuiaj akin ‘chikoyajtokej’ (Gál. 6:1; 1 Tim. 5:17).

¹⁴ Se tokniuj siuat akin monotsa Rocío amo semi kipoujkaitayaok se tayekankej akin kiyolmajxitijka. Yejua kijtoua: “Nikualantoya porin nikitak ke amo kuali nechnojnotska, uan kalijtik nikijijtouaya. Nimochikauaya amo niknextis ke niknemiliaya ke amo melauj kinekia nechpaleuis uan amo nikakik tein nechyolmajxitij”. ¿Toni kichiuak? Yejua kijtoua: “Nikleroj 1 Tesalonicenses 5:​12, 13, uan amo kuali nimomachilij porin nikitak ke amo nikpoujkaitaya tokniuj. Niktataujtij Jehová uan niktemoj tamachtilis tein nechpaleuiskia maj amo ijkon nitanemiliok. Nejon nechpaleuij maj nikajsikamati ke nejua monekia nimopatas uan amo tokniuj. Axkan nikajsikamati ke moneki maj niyolyemanik para nikinpoujkaitas oksekin. Niksentoka nimochikaua okachi nitapoujkaitas uan nikmati ke Jehová kiyolpaktia tein nikchiujtok”.

MAJ TIKINPOUJKAITAKAN AKIN AMO KITEKITILIAJ JEHOVÁ

15. ¿Keyej kemansa amo tiknekij tikinpoujkaitaskej akin amo kitekitiliaj Jehová?

¹⁵ ¿Keyej xa amo tiknekiskej tikinpoujkaitaskej? Miakpa, kampa titanojnotsaj tikinajsij miakej akin amo kinekij kimatiskej nion teyi de Dios uan de Biblia (Efes. 4:18). Sekin amo kinekij kikakiskej tein Biblia tamachtia porin kinmachtijkej okse taman keman katkaj konemej. Oso xa sekin akin iniuan titekitij oso iniuan timomachtiaj, amo techyeknotsaj. Xa akin tiktekitiliaj oso akin techmachtia, amo keman kiuelita tein tikchiuaj. Yejua ika xa amo tiknekiskejok tikinpoujkaitaskej uan amo kuali tikinnojnotsaskej.

16. ¿Keyej semi moneki maj tikinpoujkaitakan akin ayamo kitekitiliaj Jehová? (1 Pedro 2:12; 3:15).

¹⁶ ¿Keyej moneki tikinpoujkaitaskej? Maj tikelnamikikan ke Jehová kiitstok keniuj tikinnojnotsaj akin amo kitekitiliaj. Tatitanil Pedro kinelnamiktij tokniuan ke komo kichiuaj tein Jehová tanauatia, oksekin kinitaskej uan kiueyitaliskej Dios. Yejua ika kiniluij maj ‘yolnejmachmej uan maj tetakachiuakan’ keman kijtoskiaj tein kineltokaj (xikonlero 1 Pedro 2:12; 3:15). Keman kimelaujtoskiaj tein kineltokaj ininixpan jueces oso oksekin, monekia kinextiskej ke tapoujkaitaj. Maj kinemilianij ke Dios kemej yeskia ompa iniuan yetoskia, porin Jehová kiita uan kikaki nochi tein tikijtouaj uan tein tikchiuaj. Nejin se taman tein kinextia ke semi moneki maj tikinpoujkaitakan akin amo itaixpantijkauan Jehová.

17. ¿Keniuj tiknextiaj ke tikinpoujkaitaj akin amo itaixpantijkauan Jehová?

¹⁷ ¿Keniuj tiknextiskej ke tikinpoujkaitaj? Keman titanojnotsatij, amo tiknekij maj kinemilikan ke timoueyimatij porin tikmatij miak taman de Biblia. Ta tikelnamikij ke Jehová kinpatiuita uan tikinitaj ke okachi tayekantokej ke tejuan (Ageo 2:7; Filip. 2:3). Komo aksa techpijpinaujtia porin tikneltokaj tein kijtoua Biblia, amo timomakepaj. Yejua ika amo keman tikijtoskiaj teisa tein kinextiskia ke tiktelmatij sayoj ke yejuan kinkualantis (1 Ped. 2:23). Komo tikijtouaj teisa tein amo monekia, maj niman tikiniluikan maj techtapojpoluikan. ¿Uan keniuj uelis tiknextiskej ke titapoujkaitaj kampa titekitij? Maj kuali titekitikan uan maj timochikauakan tikitaskej tein kuali tein kichiuaj akin iniuan titekitij oso akin tiktekitiliaj (Tito 2:​9, 10). No moneki maj amo titakajkayauakan uan maj semi titekitikan. Komo tikchiuaj nejin, nochipa tikyolpaktiskej Jehová maski oksekin amo nochipa kuali techitaskej (Col. 3:​22, 23).

18. ¿Keyej semi moneki tikinpoujkaitaskej oksekin?

¹⁸ Miak taman kinextia ke moneki maj titapoujkaitakan. Tikitakej ke komo tikinpoujkaitaj tochankauan tikueyitaliskej Jehová, akin kiixtalij maj tikinpiakan tochankauan. Uan no ijkon panoua keman tikinpoujkaitaj tokniuan, porin no tikueyitaliaj toTajtsin. Uan komo tikinpoujkaitaj akin amo kitekitiliaj Jehová, titapaleuiskej maj satepan xa kiueyitalikan uan maj kiueyichiuakan. Uan hasta komo oksekin amo techpoujkaitaj, tejuan ipa moneki tikinpoujkaitaskej. ¿Keyej? Porin Jehová techtatiochiuis. Yejua kijtoua: “Nikinueyitalis akin nechueyitaliaj” (1 Sam. 2:30).