Tanojnots 5

Peua se nemilis ika tajyouilis

KEMAN Adán uan Eva amo nemiajok itech xochital, kipiakej miak kuejmolmej. Monekia maj tel tekitikan uan ijkon takuaskiaj. Amo kiitayajok kualtsitsin kuoujmej tein takiaj, ta kiitayaj moskaltiayaj miak tataman uitsmej. Nejin mochiuak keman Adán uan Eva amo kitakamatkejok Dios uan amo katkajok itasojikniuan.

Sayoj ika tein okachi amo kualtsin kipanokej, porin Adán uan Eva peuak kipolouaj imin chikaualis. Xikelnamiki: Dios kiniluijka komo kikuaskiaj nejon kuoujtakilot tein kiniluijka maj amo kikuakan, mikiskiaj. Kemaj, itech nejon tonal keman kikuajkej kuoujtakilot, ijkuak peuak kipolouaj imin chikaualis uan ika tamik, momikilijkej. ¡Tel amo tamatij keyej amo kitakamatkej Dios!

Adán uan Eva kinpiakej konemej satepan keman Dios kinkixtij itech xochital tein moajsia Edén. Nejin kijtosneki ika imin koneuan no ueuentsintiaskiaj uan momikiliskiaj.

Komo Adán uan Eva kitakamatiskiaj Jiova, yejuan uan imin koneuan kipiaskiaj yolpakilis. Ueliskiaj nemiskiaj ika yolpakilis nochipaya nikan Taltikpak. Amo akin ueuentsintiaskia, kokolispeuaskia niono akin momikiliskia.

Dios kineki maj taltikpakneminij nemikan nochipaya ika yolpakilis, uan yej motenkaua ika se tonal ijkon kichiuas. Amo sayoj eski takualtsinkan semanauak Taltikpak, ta no, amo akinok kokolispeuas. Mochiuaskej tasojiknimej se ika okse uan no mochiuaskej itasojikniuan Dios.

Sayoj ika Eva amo katkaok itasojikniuj Dios. Yejika kitelkokouaya keman kipiaya se konet. Kemaj, Eva kipiak tel miak tekokojkayot keman amo kitakamatikok Jiova, ¿amo ijkon timoluia?

Adán uan Eva kinpiakej okichpipil uan siuapipil. Keman kipiakej yekinika imin koneuj, kitokaytijkej Caín. Tein ika ome kitokaytijkej Abel. ¿Tikmati toni kinpanok nejin ome konemej?

Génesis 3:16-23; 4:1, 2; Apocalipsis 21:3, 4.