Tanojnots 44
Rahab kintatij tapijpianij
NEJIN takamej kipiaj se kuejmol. Moneki choloskej uan ijkon amo kinimiktiskej. Yejuan tapijpianij israelitas, uan siuat tein kinpaleuia motokaytia Rahab. Nejin siuat nemia itech se kali tein moajsia itech tepamit tein kiyoualouaya altepet Jericó. Maj tikitakan keniuj mochiuak nochi nejin.
Achtopa keman israelitas kipanauiskiaj ueyiat Jordán uan kalakiskiaj Canaán, Josué kintitanik ome tapijpianij uan kiniluij: ‘Xikitatij tal uan altepet Jericó’.
Keman tapijpianij kalakkej Jericó, yajkej ichan Rahab. Sayoj ika aksa kiiluito tein tekiuajtia Jericó nejin: ‘Tayouak ualajkej ome israelitas kipijpiakoj tal’. Keman tekiuaj kikakik nejon, kintitanik seki takamej maj kinauatianij Rahab: ‘¡Xikinkixti takamej tein nikan tikinpia!’ Sayoj ika, Rahab kintatijka itech kali tein okachi ajko yetoya. Yejika kiniluij: ‘Seki takamej ualajkaj nochan, sayoj ika amo nikmati kani kayomej, uan kiskej tapoyaujtenoj achtopa keman tatsakuaskiaj altepet. ¡Komo nankinikantokaj, nankinikanajsitiuij!’ Uan takamej motalojkej kintemotoj.
Keman takamej yajkej, Rahab motaloj kampa yetoyaj tapijpianij, uan kiniluij: ‘Nej nikmattok ika Jiova namechmakas nejin tal. Tikakkej ika yejua kiuatsak ueyiat Chichiltik keman nankiskej Egipto, uan nankinimiktijkej tekiuanij Sehón uan Og. Uan kemej nej namechpaleuij, xinechiluikan ika kualtakayot ika no nanechpaleuiskej. Xikinimakixtikan nomomaj, nopopaj uan nokniuan.
Tapijpianij kiiluijkej ika kemaj kinpaleuiskiaj, sayoj ika Rahab monekia kichiuas teisa, kiiluijkej: ‘Xikui nejin mekat chichiltik uan xikpilo itech moventana, uan xikinsentili mochankauan nikan mokalijtik. Uan keman tinochin tiualaskej timoaxkatilikiuij Jericó uan tikitaskej nejin mekat, amo akin tikmiktiskej tein yetos mochan’. Keman tapijpianij mokepkej kampa yetoya Josué, kiiluijkej nochi tein mochiuak.