Rahab takuaujtamatik iuan Jiova

Maj tiknemilikan ke tiyetokej itech altepet Jericó, itech tal tein poui Canaán. Ompa amo kineltokaj Jiova. Sayoj ke ompa nemi se siuat akin kemaj taneltoka. Itokay Rahab.

Keman Rahab siuapilok katka, kikakik miak taman tein Jiova kichiujka. Kimatik keniuj Jiova kipaleuij xolal Israel maj kintanikan akin kintauelitayaj. Kemej neskayot, Jiova kichiuak maj Moisés kinkixti israelitas itech xolal Egipto. ¡Hasta kixeloj ueyiat Chichiltik uan ijkon israelitas uelik panokej! Uan axkan Rahab kiluiaj se taman tein kimoujkakaki: ¡israelitas amo uejka moajsij itech altepet Jericó, kampa yejua nemi!

Se youak, ome israelitas youij tapijpiatij itech altepet Jericó. Yejuan youij ichan Rahab uan yejua kinyoleua maj panokan uan maj mokauakan. Itech nejon youak, akin tekiuajti Jericó kimati ke moajsij tapijpianij itech altepet uan ke yetokej ichan Rahab. Yejua ika tekiuaj kintitani seki takamej maj kintemotij. ¿Toni kichiua Rahab? Kintatia ome tapijpianij ikalkuako uan kiniluia itekitikauan tekiuaj: “Tapijpianij yajkejya. Komo nanijsiuij, uelisok nankinajsiskej”. ¡Ijkon kinpaleuia israelitas! ¿Tikuelitaskia tikmatis keyej kinpaleuia?... Porin yejua kineltoka Jiova. Kimati ke yejuatsin kinpaleuis israelitas maj moaxkatilikan Jericó uan Canaán.

Achto ke tapijpianij monauatiskej iuan Rahab, motenkauaj iuan ke yejua uan ichankauan momakixtiskej keman Dios kiixpolos Jericó. Sayoj ke Rahab moneki kichiuas teisa uan ijkon momakixtis. ¿Tikmati toni?... Tapijpianij kiluiaj: “Moneki tikpilos nejin mekat chichiltik itech moventana uan xikinsentili mokalijtik nochin mochankauan”. Rahab senkis kichiua ijkon kemej kiluiaj tapijpianij. ¿Tikneki maj nimitstapoui toni panok satepan?...

Seki tonalmej satepan, israelitas miakpa kiyoualouaj Jericó, sayoj ke amo kakistij. Chikuasen tonal kiyoualouaj altepet, sayoj sepa tonal. Sayoj ke itech chikometika tonal kiyoualouaj altepet chikojpa. Satepan, nochin tsajtsij chikauak. Ompa panoua teisa: ¡Jiova kichiua maj xitini uejueyi tepamit tein kiyoualoua altepet! Sayoj ke ¿toni kipanoua ichan Rahab? Kemej ompa pilkatok se mekat chichiltik, amo uetsi. ¿Ueli tikita mekat itech taixkopin?... ¡Ijkon momakixtijkej Rahab uan ichankauan!

¿Tikitak ke Rahab momakixtij porin kitakamatik Jiova?... Yejua kimatia ke Dios kipaleuiskia, uan yejua ika takuaujtamatik iuan. Keman kitapouijkej nochi tein Dios kichiujka, Rahab peuak takuaujtamati iuan Jiova. Tejua no timomachtijtok miak taman tein Jiova kichiua. ¿Titakuaujtamatis iuan Jiova, ijkon kemej Rahab?... ¡Tikmatij ke kemaj!