Tanojnots 51
Rut uan Noemí
ITECH Biblia tikajsis se amaix tein motokaytia Rut. Ompa motajtoua tein kipanokej se kalyetouanij, tein nenkej itech xiujmej keman israelitas kipiayaj tamelauanij. Rut katka se ichpoch tein nemia itech tal tein pouia Moab; amo katka israelita, tein katkaj iaxkauan Dios. Sayoj ika keman Rut kiixmatik Dios tein melauak, Jiova, kiteltasojtak. Noemí katka se nanotsin tein kipaleuij Rut maj kiixmatini Jiova.
Noemí katka israelita. Yejua, inamik uan ome ikoneuan mokaltalitoj itech tal tein pouia Moab keman tatasojtia Israel. Se tonal inamik Noemí momikilij. Satepan, ikoneuan Noemí monamiktijkej imiuan ome siuamej moabitas tein motokaytijkej Rut uan Orpá. Kemej majtakti xiuit satepan, ikoneuan Noemí momikilijkej. ¡Semi tetayokoltij! ¿Toni kichiuaskia?
Se tonal Noemí kinemilij oksepa nemitiuj imiuan ichankauan, yejika moojketsteuj. Rut uan Orpá kinekiaj yetoskej iuan, yejika no iuan yajkej. Sayoj ika keman uejka ojtokakajya Noemí kiniluij ichpochmej: ‘Ximokepakan itech namoaltepeuj uan ximokauakan imiuan namonanajuan’.
Noemí moyolojpachoj uan kinpitsoj. Yejuan kiteltasojtayaj Noemí, yejika peuak chokaj. Kiiluijkej: ‘¡Amo! Tejuan tiyatij mouan imiuan mochankauan’. Sayoj ika Noemí kininankilij: ‘Ximokepakan nokoneuantsitsin. Okachi kuali nankipanoskej imiuan namochankauan’. Yejika Orpá moojketsteuj uan yajki ichan. Sayoj ika Rut amo yajki.
Noemí kixitak Rut uan kiiluij: ‘Orpá yajkiya, tej no iuan xiouj’. Sayoj ika Rut kinankilij: ‘¡Amo xikchiua maj nimitskaua! Xinechkaua maj niouj mouan. Kampa tej tiyas, nej niyas, uan kampa tinemis, nej ninemis. Mochankauan eski nochankauan uan moDios eski noDios. Kampa timomikilis, nej nimomikilis uan ompa nechtokaskej’. Keman Rut kijtoj nejin, Noemí amo kiiluijok maj mokepa.
Satepan senajsikej Israel uan ompa mokaltalijkej. Keman ajsikej chikauaka katka seki tatet tein motokaytia cebada, yejika Rut peuak kiololoua. Se takat tein motokaytij Booz (Boaz) kikauilij maj kiololouani cebada italpan. ¿Tikmati akoni katka imomaj Booz? Katka Rahab, tein nemia itech altepet Jericó.
Se tonal Booz kiiluij Rut: ‘Nikakini ika semi moka tajtouaj, uan kualtakayot tein tiknextilij Noemí. Nikmattok ika tikauak mopopaj uan momomaj uan moaltepeuj uan tinemiko itech toaltepeuj kampa amo tiixmatia. ¡Nimitsnejnekilia maj Jiova mitsnextili kualtakayot!’
Rut kinankilij: ‘Tejuatsin titelkualtakat nouan. Tikchiuak maj okachi kuali nimomachili ika nochi tein kuali tinechiluij’. Rut kitelyolpaktij Booz, uan amo uejkauak monamiktijkej. ¡Semi kitelyolpaktij Noemí! Uan okachiok kiyolpaktij keman Rut uan Booz kipiakej yekinika imin koneuj tein motokaytij Obed. Satepan Obed mochiuak iueyitat David; tein satepan timomachtiskej toni kichiuak.