Tanojnots 57
Dios kijitak David
¿UELI tikita tein mochiuak? Konet kikuilij oso nejin ichkatsin. Keman oso kiuikatoya nejin ichkat, konet kitojtokak uan kitenkuilij. ¡Uan keman oso moeuitiketsak itech konet, kimaak uan kimiktij! Okse tonal, nejin konet kitenkuilij tekuani se ichkat. ¿Amo timoluia ika konet tein kichiuak nochi nejin katka yolchikauak? ¿Tikmati akoni katka nejin konet?
Katka telpoch David. Yej nemia itech altepet Belén. Iueyitat katka Obed, imin koneuj Rut uan Booz. ¿Tikinelnamiki? Uan ipopaj David katka Isaí (Jesé). David kintakualtiaya iichkauan ipopaj. David nemik majtakti xiuit satepan keman Jiova kijitaka Saúl maj eskia tekiuaj.
Se tonal, Jiova kiiluij Samuel: ‘Xikui aceite uan xiouj Belén, ichan Isaí. Nej nikijitak semej ikoneuan maj mochiua tekiuaj’. Keman Samuel kiitak Eliab, ikoneuj Isaí tein tayekanaya, moluij: ‘Yejua nejin eski tekiuaj’. Sayoj ika Jiova kiiluij: ‘Amo xikita ox uejkapantik niono ox kuakualtsin. Nej amo nikijitak maj mochiua tekiuaj’.
Yejika Isaí kinotsak ikoneuj Abinadab uan kiuikilij Samuel. Sayoj ika Samuel kijtoj: ‘Amo, Jiova amo no kijitak’. Satepan, Isaí kiuikilij ikoneuj Samah. Samuel kijtoj: ‘Amo, Jiova amo no kijitak nejin’. Isaí kiniuikilij Samuel chikome ikoneuan, sayoj ika Jiova amo kijitak niose. Ompa, Samuel kitajtanij: ‘¿Yejuasaj nejin mokoneuan?’
Isaí tanankilij: ‘Yetokok tein xokoyot. Sayoj ika yej kintakualtijtok ichkamej ixtauat’. Keman Samuel kiuikilijkej David, yej uelik kiitak ika katka kuakualtsin. Jiova kijtoj: ‘Yejua eski tekiuaj. Xikuatekili aceite’. Uan Samuel kichiuak. Satepan, David mochiuaskia imin tekiuaj israelitas.