Yekinika tekiuaj itech xolal Israel

Jiova kinixtalijka tamelauanij maj kinixyekananij israelitas, sayoj ke yejuan kinekiaj se tekiuaj. Yejua ika, kiluijkej Samuel: “Nochi okseki altepemej kipiaj tekiuanij, tejuan no tiknekij se”. Samuel kinemilij ke nejon amo kuali katka. Yejua ika kitataujtij Jiova, uan yejuatsin kinankilij: “Israelitas amo tejua mitsixtopeujtokej, ta nejua nechixtopeujtokej. Xikinilui ke uelis kipiaskej se tekiuaj, sayoj ke nejon tekiuaj kintajtanis miak taman”. Maski ijkon, israelitas kijtouayaj: “¡Maski! ¡Tiknekij tikpiaskej se tekiuaj!”.

Ompa, Jiova kiluij Samuel ke se takat akin motokaytiaya Saúl yeskia yekinika tekiuaj. Keman Saúl kikalpanoj Samuel ompa Ramá, Samuel kiixpejpenak kemej tekiuaj keman kikuatekilij aceite.

Satepan, Samuel kinsentilij israelitas porin kinekia maj kiixmatinij yankuik tekiuaj. Sayoj ke nion seko kiajsiaj Saúl. ¿Tikmati keyej? Porin motatijtoya kampa yetoya miak tamamal. Keman kiajsikej, kikixtijkej kampa yetoya uan kiualkuikej tatajko kampa yetoyaj israelitas. Okachi uejkapantik katka ke nochin oksekin uan tel kuakualtsin katka. Samuel kijtoj: “Xikitakan akoni kiixpejpenak Jiova”. Uan keman israelitas kiitakej tekiuaj tel yolpakkej.

Yekinika, tekiuaj Saúl kitajtolkakia Samuel uan kitakamatia Jiova. Sayoj ke satepan mopatak. Se tonal, Samuel kiluij Saúl maj kichiani porin kitemakaskia nemaktilmej. Tekiuaj amo kinamikia kitemakas nemaktilmej. Sayoj ke Samuel amo niman ajsik, yejua ika Saúl iselti kitemakak nemaktilmej. ¿Toni kichiuak Samuel? Kiluij: “Monekia tiktakamatis Jiova, uan amo ijkon tikchiuak”. ¿Kiajsikamatiskia Saúl ke monekia nochipa kitakamatis Jiova?

Satepan, Saúl moteuito iniuan amalequitas, uan Samuel kiluij maj kinmiktiani nochin. Sayoj ke Saúl kinemilij amo kimiktis tekiuaj Agag. Ompa Jiova kiluij Samuel: “Saúl nechkauak, amo nechtakamatiok”. Samuel moteltayokoltij, yejua ika kiluij Saúl: “Jiova kiixpejpenati okse tekiuaj porin tejua amo tiktakamatiok”. Keman Samuel mokepak porin yayaya, Saúl kikitskij itempan itilmaj, uan kitsayanak. Samuel kiluij Saúl: “Ijkon Jiova mitskuilis tekiuajyot”. Nejon kijtosnekia ke Jiova kiixtaliskia okse tekiuaj akin kemaj kitasojtaya uan kitakamatia.