Tanojnots 82
Mardoqueo uan Ester
TIMOKEPAJ se ome eyi xiuit achtopa keman Esdras yaskia Jerusalén. Mardoqueo uan Ester katkaj israelitas tein okachi uejueyi chiuanimej itech tekiuajyot persa. Ester katka inamik tekiuaj, uan iprimo Mardoqueo kipiaya se ueyi tanauatil. Tikitatij keniuj mochiuak nejin.
Itatuan Ester momikilijkej keman yej katka konetok, yejika Mardoqueo kiskaltij. Asuero, tein tekiuajtia Persia, kipiaya ikaltekiuaj itech altepet Susa, uan Mardoqueo katka semej itekitikauan. Se tonal inamik tekiuaj, Vasti, amo kitakamatik, uan tekiuaj kijitak se yankuik inamik. ¿Tikmati akoni kijitak? Kemaj, yejua tel kuakualtsin Ester.
¿Tikita takat tein moueyimati uan kinchiujtok takamej maj moixpilokan iixpan? Motokaytia Hamán, se takat ueyichiujkej itech nochi Persia. Yej kineki maj Mardoqueo, akin tikita tokotsyetok, maj no moixpilo iixpan. Sayoj ika, Mardoqueo amo kichiua. Yej kimatia ika amo kuali maj moixpilouani iixpan se takat tel amo yolkuali. Hamán tel kualanik. Uan maj tikitakan toni kichiuak.
Hamán kintakajkayauilij israelitas iixpan tekiuaj. Kijtoj: ‘Amo yolkualmej uan amo kitakamatij motanauatiluan. Maj se kinimikti’. Asuero amo kimatia ox Ester katka israelita. Yejika kitajtolkakik Hamán, uan kijkuiloj se tanauatil kampa kijtouaya ika se tonal kinimiktiskiaj nochin israelitas.
Keman Mardoqueo kikakik nejin tanauatil, moteltekipachoj. Kititanilij se tanauatil Ester: ‘Xiknojnotsati tekiuaj, uan xikilui maj techmakixti’. Komo aksa yaya kiitati tekiuaj persa uan amo kiyoleujtoya, kimiktiayaj. Sayoj ika Ester kiitato maski amo kiyoleujka. Tekiuaj kimelauilij itopil tachijchiuj ika oro, tein kijtosnekia maj amo kimiktikan. Ester kinyoleuak tekiuaj uan Hamán se ueyi takualis. Ompa tekiuaj kitajtanij Ester toni kualtakayot kinekiliaya. Ester kiiluij ika kitapouiskia komo yejua uan Hamán yaskiaj itech okse takualis tein kipiaskia mostika.
Itech nejon takualis, Ester kiiluij tekiuaj: ‘Kinimiktitij nochankauan israelitas uan nejua’. Tekiuaj kualanik, uan tajtanik: ‘¿Akoni moixeuia?’
Ester kijtoj: ‘¡Takat amo yolkuali, taixnamikkej, yejua nejin Hamán!’
Keman tekiuaj kikakik nejin, tel kualanik. Uan tanauatij maj kimiktikan Hamán. Satepan, tekiuaj kimakak Mardoqueo se ueyi tanauatil, maski amo semi kemej tekiuaj. Ompa, Mardoqueo kijkuiloj se tanauatil kampa kijtouaya ika israelitas ueliskiaj mopaleuiskiaj itech tonal keman ixyetoya kinimiktiskej. Uan kemej Mardoqueo katka ueyichiujkej, miakej taltikpakneminij kinpaleuijkej israelitas maj moteuikan imiuan taixnamikinij, uan ijkon momakixtijkej.