Ester kimakixtia ixolal

Ester katka se ichpoch judía akin nemia itech xolal Susa tein pouia Persia. Mardoqueo kiiskaltij Ester, akin katka iprimo uan katka itekitikauj Asuero, akin tekiuajtia Persia.

Tekiuaj Asuero kinekia okse inamik. Yejua ika itekitikauan kiuikilijkej siuamej akin okachi kuakualtsitsin itech nochi tekiuajyot, uan teuan katka Ester. Maski moajsiaj miakej siuamej, tekiuaj kiixpejpenak Ester. Mardoqueo kiluij Ester maj amo akin kiluiani ke katka judía.

Hamán, se takat akin semi moueyinekia, kinixyekanaya nochin uejueyi chiuanimej. Yejua kinekia maj nochin moixpilouanij iixpan. Sayoj ke Mardoqueo amo moixpilouaya. Hamán tel kualanik uan hasta kinekia kimiktis. Keman Hamán kimatik ke Mardoqueo katka judío, kinemilij kinmiktis nochin judíos akin nemiaj itech nejon tekiuajyot. Yejua kiluij tekiuaj: “Judíos semi tamouililmej. Moneki se kinmiktis nochin”. Asuero kinankilij: “Xikchiua tein tikitas ke okachi kuali”. Uan kikauak maj kiixtaliani se tanauatil. Nejin tanauatil kijtouaya ke itech tonal 13 metsti adar taltikpakneminij monekia kinmiktiskej judíos. Sayoj ke Jiova kiitstoya nochi.

Ester amo kimatia ke moixtalijka nejon tanauatil. Yejua ika Mardoqueo kititanilij se amat kampa nesia tein kijtouaya nejin tanauatil uan kiluij: “Moneki titajtos iuan tekiuaj”. Ester kinankilij: “Akin yeski akin kiitatiuj tekiuaj uan yejua amo kiyoleuak, kimiktiskej. Uan 30 tonalmejya tekiuaj amo nechyoleujtok maj nikitati. Sayoj ke niyas. Komo momamelaua ika itakotsin noixpan, ninemis. Sayoj ke komo amo, nechmiktiskej”.

Ester kiitato tekiuaj. Keman yejua kiitak, momamelauak ika itakotsin iixpan. Ester motokij uan tekiuaj kitajtanij: “¿Keniuj uelis nimitspaleuis, Ester?”. Yejua kinankilij: “Nikneki xiuiki iuan Hamán itech se tatakualis tein nikchiuati”. Itech nejon tatakualis, Ester kinyoleuak maj yanij okse tatakualis tein kichiuaskia mostika. Ijkuak, tekiuaj oksepa kitajtanij Ester: “¿Keniuj uelis nimitspaleuis?”. Yejua kinankilij: “Moajsi aksa akin kineki nechmiktis nejua uan noxolal. Ika kualtakayot, xitechmakixti”. Tekiuaj tajtanik: “¿Akoni kineki mitsmiktis?”. Yejua kinankilij: “Nejin tel amo yolkuali takat, Hamán”. Asuero tel kualanik uan niman tanauatij maj kimiktikan Hamán.

Sayoj ke amo akin uelia kijkuaniaya tanauatil tein kiixtalijka Hamán, nion tekiuaj. Yejua ika tekiuaj kiixtalij Mardoqueo maj kinixyekana uejueyi chiuanimej uan kikauak maj kiixtali okse yankuik tanauatil. Nejon tanauatil kijtouaya ke judíos ueliskiaj mopaleuiskej keman kinteuiskiaj. Itech tonal 13 metsti adar, judíos kintankej akin kinekiaj kinmiktiskej. Sejse xiuit, itech nejon tonal judíos peuak kichiuaj se iluit tein ika kielnamikiaj ke tatankej.