Toni moneki tikchiuaskej achto ke timonamiktiskej

1, 2. 1) ¿Keniuj kiyeknextij Jesús ke motelneki maj achto se kiixejeko teisa? 2) ¿Itech toni taman motelneki maj tikixejekokan toni tikchiuaskej?

KEMAN mochijchiuati se ueyi kali moneki achto kuali moixejekos tein monekis. Achto ke kipeualtiskej, moneki kipiaskej tal kampa kichijchiuaskej uan kiitaskej keniuj kichijchiuaskej uan kiixtaliskej keniuj mokauas. Sayoj ke, no moneki kiitaskej okse taman tein no motelneki. Jesús kijtoj: “Kuak nankinekij nankichiuaske se uejkapan tepan, ijkuakon achto nanmosentiliaj para nankixejekoaj de kanachi tomin monekis para nankitamichiuaske ne tepan. Uan kuak nochi nankixejekojke ya ke ajsis ya in tomin, ijkuakon nankimatij ya ke melau nankitamichiuaske ya ne tekit” (Lucas 14:28).

² Ijkon kemej ijkuak kichijchiuatij se ueyi kali moneki kiixejekoskej miak taman, no ijkon moneki kichiuas aksa akin kiixtalia monamiktis uan kipias yolpakilis. Miakej kijtouaj: “Nikneki nimonamiktis”. Sayoj ke amo nochin achto kiixejekouaj nochi tein monekis kichiuaskej. Maski Biblia kinextia ke nemilis kemej namikuanij semi kualtsin, no kinextia ouijkayomej tein kiualkui (Proverbios 18:22; 1 Corintios 7:28). Yejua ika, akin kiixtalijtokej monamiktiskej moneki kimatiskej toni taman tein kuali uelis kipiaskej uan no toni ouijkayomej uelis kinualkuilis.

3. ¿Keyej Biblia kintelpaleuia akin kiixtalijtokej monamiktiskej, uan toni eyi netajtanilmej techpaleuis maj tiknankilikan?

³ Biblia uelis techpaleuis. Tein ompa techyolmajxitia moijkuiloj ika inepaleuil Jiova, akin kipeualtij nemilis kemej namikuanij (Efesios 3:14, 15, TNM; 2 Timoteo 3:16). Maski uejkaujya moijkuiloj, tayolmajxitilis tein kitemaka Biblia semi tapaleuia axkan, uan techpaleuis maj tiknankilikan 1) ¿keniuj uelis tikmatiskej ox uelisya timonamiktiskej?, 2) ¿toni moneki kinextis akin tiknekij iuan timonamiktiskej? uan 3) ¿keniuj uelis tichipaujkanemiskej keman timoixmattoskej?

¿UELISYA TIMONAMIKTISKEJ?

4. ¿Toni semi tapaleuia maj kuali mouikakan namikuanij, uan keyej?

⁴ Se kichijchiuas se ueyi kali xa tel patiyoj kisas, sayoj ke no monekis miak tomin se kiyektalijtiyas. No ijkon panoua ika nemilis kemej namikuanij. Se monamiktis uelis yeski ouij; sayoj ke no uelis yeski ouij se kisentokas kuali se mouikas ijkon kemej panouaj xiujmej. ¿Toni techpaleuis maj tiksentokakan kuali timouikakan? Se taman tein motelneki yejua maj tikitakan ke amo auil tein timotenkaujkej keman timonamiktijkej. Biblia ijkon kimelaua kemej moneki yeski nemilis kemej namikuanij: “Takat kikauas ipopaj uan imomaj, uan mosentilis iuan inamik, uan omen mochiuaskej sayoj se” (Génesis 2:24). Jesucristo kiyeknextia itech Biblia ke aksa uelis kitsayanas amat ininixpan tekiuanij uan oksepa uelis monamiktis sayoj komo semej namikuanij “motajtakolmaka [oso moteka] iuan okse” (Mateo 19:9). Komo tikixtalijtokej timonamiktiskej, maj tikelnamikikan nejin tanauatilmej tein kitemaka Biblia. Komo ayamo ueli tikchiuaj tein motenkauaj kichiuaskej akin monamiktiaj, kijtosneki ke ayamo uelis timonamiktiskej (Deuteronomio 23:21; Eclesiastés 5:4, 5).

5. Maski sekin kimouiliaj motenkauaskej ke nochipa senyetoskej kemej namikuanij, ¿keyej akin kinemiliaj monamiktiskej moneki kiitaskej ke tel tapaleuia?

⁵ Miakej kimouiliaj motenkauaskej ke nochipa senyetoskej kemej namikuanij. Se telpoch kijtoj: “Kemej nikmatia ke tiomen monekia tisenyetoskej nochi tonemilis, kichiuak maj nimomachiliani kemej yeskia nitsaktoya uan kemej yeskia senkis amo uelia nikisaya”. Sayoj ke komo yekmelauj tiktasojtaj akin tiknemiliaj iuan timonamiktiskej, amo tikitaskej ke semi ouij timotenkauaskej nejon, ta tikitaskej kemej se taman tein techpaleuis maj titakuaujtamatikan se iuan okse. Keman namikuanij kiitaskej ke amo auil tein motenkaujkej, kinpaleuis maj kinejnekikan senyetoskej keman kuali moajsiskej uan keman kipiaskej kuejmolmej, uan no mosenpaleuiskej keman yeski. Pablo, se itatojtokakauj Cristo, kijkuiloj ke akin yekmelauj tetasojta “kixikojtiu nochi” uan “kijyouijtinemi tataman ouijkayome” (1 Corintios 13:4, 7). Se siuat kijtoua: “Tein timotenkaujkej ijkuak timonamiktijkej kichiua maj amo nimotekipacho. Semi niktasojkamati yolseuilis tein nechualkuilia porin tiomen timotenkaujkej uan no ininixpan oksekin ke tiknekij tisenyetoskej” (Eclesiastés 4:9-12).

6. ¿Keyej okachi kuali maj amo timonamiktikan keman semi titelpochmej oso semi tiichpochmejok?

⁶ Moneki se yekyolmajsitos uan ijkon uelis se kichiuas nejon tein se motenkaua. Yejua ika, Pablo kinyolmajxitia akin kichiuaj kemej Cristo ke okachi kuali maj amo monamiktikan keman semi telpochmej oso semi ichpochmejok, porin itech nejon xiujmej okachi kinejnekij motekaskej iuan aksa uan nejon uelis kichiuas maj amo kuali taixejekokan (1 Corintios 7:36). Telpochmej uan ichpochmej ijsiujka mopata inintanemilil ijkon kemej moskaltijtiyouij. Miakej akin monamiktiaj keman semi telpochmej oso semi ichpochmejok kiitaj ke tein kinpoloua uan tein kinejnekij yejuan uan ininnamik mopata satepan ke panouaj seki xiujmej. Tein miakkan mochiua kiyeknextia ke akin monamiktiaj keman semi telpochmej oso semi ichpochmejok uelis okachi amo kipiaskej yolpakilis uan kitsayanaskej amat ininixpan tekiuanij ke akin monamiktiaj satepan. Yejua ika maj amo timoijsiuilikan. Tein tikpanoskej toselti ijkon kemej timoskaltiskej uelis techpaleuis keman tikpiaskejya tonamik maj tikmatikan okseki taman tein kichiuas maj tikpiakan kuali taixejekolis uan maj okachi tikmatikan tikchiuaskej tein moneki. No uelis techpaleuis maj okachi kuali timoixmatikan tejuan, ta nejon se taman tein tel tapaleuia maj kuali timouikakan iuan tonamik.

YEKINIKA MONEKI TIMOIXMATISKEJ TEJUAN

7. ¿Keyej akin kiixtaliaj monamiktiskej yekinika moneki kiitaskej keniuj tamatij?

⁷ ¿Ueli ijsiujka tikijtouaj toni taman tein kualtsin tikuelitaskiaj maj kinexti akin tiknekij iuan timonamiktiskej? Miakej amo kinouijmaka. Sayoj ke ¿no ijkon panoua keman tikijtouaj tein tejuan moneki tiknextiskej? ¿Toni niknextia tein uelis tapaleuis maj tikpiakan yolpakilis? ¿Keniuj niyeski keman nikpias nonamik? Kemej neskayot, ¿niman nikijtoua ke nimopoloj uan nikaki tein nechyolmajxitiaj, oso nochipa niktemoua nimotenpaleuis? ¿Nochipa niyolpaktok uan nikpia se kuali tanemilil, oso niman nimosenkaua uan amo teyi nikuelita? (Proverbios 8:33; 15:15.) Maj tikelnamikikan ke maski timonamiktiskej amo tikpataskej tein tikchiuaj. Komo ijkuak toseltiok timoueyinekij, niman timoyolxokoliaj oso timosenkauaj, no ijkon tiyeskij keman timonamiktiskejya. Kemej semi ouij maj timoitakan tejuan kemej techitaj oksekin, kuali yeskia maj tikiniluikan totatuan oso aksa akin iuan titakuaujtamatij maj techyekiluikan keniuj techitaj uan toni uelis tikpataskej. Komo tikitaj ke uelis tikpataskej seki taman, maj timochikauakan tikchiuaskej nejon achto ke tiknemiliskej timonamiktiskej.

8-10. ¿Toni techyolmajxitia Biblia tein techpaleuis keman tikpiaskejya tonamik?

⁸ Biblia techyolchikaua maj tikauakan maj iespíritu Dios techpaleui maj tiknextikan seki taman tein kualtsin kemej nejin: “Ma se tetasojtatinemi; uan ma se yolpaktinemi; uan ma se yolseukanentinemi; uan ma se kipixtinemi paciencia; uan ma se teyoliknelijtinemi; uan ma se kichiutinemi ten kuali, uan ma se takuautamakatagat; uan ma se yolyemankanemi; uan ma se moyekantinemi ika nejmach”. Uan no kijtoua: “Ximoyankuikatalijtiyakan ika kuali tech namoyolojuan uan tech namotanemililisuan. Uan ximotakentijtiyakan ika ne yankuikatalnamikilis ten Dios kitalij [...]. Porin ne yankuik talnamikilis kinejneuilia Dios iyolchipaualis” (Gálatas 5:22, 23; Efesios 4:23, 24). Komo tikchiuaj tein tayolmajxitia nejin tajkuilol ijkuak toseltiok kemej yeskia tiktokaskiaj xinach, uan satepan ke timonamiktiskej, kemej yeskia tikseliskej itakilo.

⁹ Kemej neskayot, se siuat uelis kitemos okachi kitayekanaltis ‘mokualnextis itech iyolijtik’ uan amo tein moita tapani (1 Pedro 3:3, 4). Yolyemanilis uan kuali taixejekolis kipaleuis maj kipia tamatilis, uan nejon yejua yekmelauj kualtsinyot (Proverbios 4:9; 31:10, 30; 1 Timoteo 2:9, 10). Uan takat uelis mochikauas kinextis ke kinpoujkaita siuamej uan kualtakat iniuan (1 Timoteo 5:1, 2). Uan no, moneki mochikauas kinextis ke yolyemanik, ke kuali taixpejpena uan kiyekchiua tekimej tein kimakaj. Keman aksa tachikaujkauia kichiua maj kipiakan miak kuejmolmej kemej namikuanij (Proverbios 29:23; Miqueas 6:8; Efesios 5:28, 29).

¹⁰ Maski xa techouijmakas tikpataskej seki taman tein tikijtojkej, tinochin akin tikchiuaj kemej Cristo moneki timochikauaskej tikpataskej, uan no, techpaleuis maj okachi kuali timouikakan iuan akin yeski tonamik.

TONI MONEKI TIKTEMOSKEJ MAJ KINEXTI AKIN YESKI TONAMIK

11, 12. ¿Keniuj se takat uan se siuat uelis kimatiskej ox amo mochikotilia tein kinejnekij?

¹¹ Kampa tionnemi, ¿momattokej maj se yejua se kitemo akoni iuan se monamiktis? Komo ijkon, ¿toni moneki tikonchiuas komo tikonajsi aksa akin tikonixuelita? Yekinika xionmotajtani: “¿Yekmelauj nikneki nimonamiktis?”. Tel amo kuali yeskia maj tikchiuakan maj aksa kinemili ke iuan timonamiktiskej komo tejuan amo tiknemilijtokej nejon (Proverbios 13:12). Satepan xionmotajtani: “¿Amo teyi nechtsakuilia maj ueli nimonamikti?”. Komo tiontanankilij ke amo, tein satepan moneki tikonchiuas yeski ijkon kemej momattokej kichiuaskej kampa tionnemi. Itech seki uejueyi altepemej, satepan ke se kiita seki tonalmej keniuj monejnemiltia akin se kiixuelita, se kiluia ke se kineki okachi se kiixmatis. Komo technankilia ke amo, moneki amo tikiluiskej sepa uan oksepa hasta tikchiuaskej maj mokuejmolo. Maj tikelnamikikan ke yejua no kinamiki kiixpejpenas akoni iuan monamiktis. Sayoj ke komo technankilia ke kemaj, uelis tikixtaliskej timosenixpetaniskej. Nejon techpaleuis maj tikitakan ox yejua kuali yeski tonamik. Keman iuan timoixmattoskej, ¿toni moneki tiktemoskej?

¹² Techpaleuis maj tiknankilikan nejin netajtanil komo tiktaliaj kemej neskayot se piano uan se guitarra. Komo sejse kiyektaliaj kemej kuali kakistis, sejse kualtsin mokakis. Sayoj ke ¿toni panoua komo kinsentsotsonaj? Komo ijkon, moneki kinyektaliskej kemej amo mochikotiliskej. No ijkon panoua iuan takat uan siuat akin kiixtalijtokej monamiktiskej. Xa sejsemej mochikauaj okachi kuali kichiuaskej seki taman. Sayoj ke moneki motajtaniskej: ¿mochikotilia tein kinejnekij?

13. ¿Keyej tel tamouilil komo peua timoixmatij iuan aksa akin kipia okse taneltokalis?

¹³ Motelneki maj kipiakan sayoj se taneltokalis uan tein kitayekanaltiaj. Pablo kijkuiloj: “Amo ximoyekantinemikan ika ne amokuali tamachilis tenika moyekantinemij nekes de amo taneltokani. Porin komo ijkon nankichiutinemij, ijkuakon nankinejneuiliaj keme se yunta de kinsenilpia iuan se kuakuoue uan se burro” (2 Corintios 6:14; 1 Corintios 7:39). Komo timonamiktiaj iuan aksa akin kipia okse taneltokalis uelis kichiuas maj senkis timochikotilikan. Sayoj ke, komo tiomen tiksenueyichiuaj Jiova Dios, okachi techpaleuia maj tisenyetokan. Jiova kineki maj tiyolpakikan uan maj okachi kuali timouikakan iuan tonamik. No kineki maj netasojtalis techpaleui maj kuali timouikakan iuan yejuatsin uan iuan tonamik, porin nejon mochiua kemej yeskia se mekat tein ixeyi (Eclesiastés 4:12).

14, 15. Maski namikuanij kipiaskej sayoj se taneltokalis, ¿toni okseki taman kinpaleuis maj kuali mouikakan?

¹⁴ Maski tiksenueyichiuaskej Dios okachi techpaleuis maj kuali timouikakan iuan tonamik, moajsi okseki taman tein no moneki. Moneki maj tein kiixtalijtok kichiuas takat no yejua tein kiixtalijtok siuat, uan ijkon amo mochikotilis tein kinejnekij. ¿Toni nankiixtalijtokej namejuan? Kemej neskayot, ¿nankinekij nankinpiaskej konemej? ¿Toni nankitayekanaltiaj itech nanmonemilis?a (Mateo 6:33.) Motelneki maj namikuanij kuali mouikakan uan maj kinyolpakti senyetoskej porin nejon kinpaleuis maj yekmelauj kuali mouikakan (Proverbios 17:17). Yejua ika moneki maj amo mochikotili tein kinejnekij. Keman se mochikotilia, semi teouijmaka tel kuali se mouikas iuan aksa, okachiok iuan se inamik. Sayoj ke, komo akin iuan tikonneki tionmonamiktis kiuelita se taman neixpetanilis, kemej yas paxalotiuj kansaika, uan tejuatsin amo, nejon amo kijtosneki ke amo uelis iuan tionmonamiktis. Xa onkak seki taman tein nanomen nankiuelitaj nankichiuaskej tein okachi moneki. Uan no, tejuatsin uelis tikonchiuas maj yolpaki akin yeski monamik keman nankisenchiuaskej seki taman tein kuali tein yejua kiuelita (Hechos 20:35).

¹⁵ Uelis tikijtoskej ke se takat uan se siuat uelis kuali mouikaskej komo kipataj tein kinejnekij uan amo komo ipa sayoj se tanemilil kipiaj. Yejua ika, maj amo tikitakan ox sayoj se tanemilil tikpiaj itech nochi tein tiknejnekij, ta okachi kuali maj tikitakan toni tikchiuaj keman mochikotilia tein tiknejnekij. ¿Ueli timoyeknojnotsaj uan tiknextiaj ke tikpoujkaitaj akin tiknekij iuan timonamiktiskej? ¿Oso peua timotajtolteuiaj keman amo sayoj se tanemilil tikpiaj? (Efesios 4:29, 31.) Komo tikixtalijtokej timonamiktiskej, moneki tikyekitaskej maj amo iuan aksa akin moueyineki, amo kineki kipatas tein kinemilia, oso akin nochipa kineki maj mochiua tein kineki, uelis senkis kijtos oso kitemos maj moajsikamati.

MONEKI MAJ ACHTO TIKMATIKAN SEKI TAMAN

16, 17. Komo takat oso siuat kiixtalijtok monamiktis, ¿toni uelis motajtanis?

¹⁶ Akin kiseliaj tekimej itech nechikol kampa kichiuaj kemej Cristo, achto kinitaj ox uelis kichiuaskej nejon tekit (1 Timoteo 3:10). Tejuan no ijkon uelis tikchiuaskej. Kemej neskayot, siuat uelis motajtanis: “¿Keniuj kiixmatij nejin takat? ¿Akonimej iniuan mouika? ¿Kimati motsakuilis keman moneki? ¿Keniuj kinita akin xiuejkejya? ¿Keniuj kinixmatij ichankauan? ¿Keniuj mouika iniuan ichankauan? ¿Keniuj kiita tomin? ¿Kiuelita tel tayis tayil tein teuintij? ¿Tel tauel oso hasta tateuia? ¿Toni tekimej kipia itech nechikol, uan keniuj kichiua? ¿Uelis nikpoujkaitas ika nochi noyolo?” (Levítico 19:32; Proverbios 22:29; 31:23; Efesios 5:3-5, 33; 1 Timoteo 5:8; 6:10; Tito 2:6, 7).

¹⁷ Takat uelis motajtanis: “¿Kitasojta uan kipoujkaita Dios nejin siuat? ¿Uelis kichiuas nochi tein moneki mochiuas kalijtik? ¿Toni kinekiskej ichankauan maj tikchiuakan? ¿Kinextia tamatilis, tekitikej uan amo kiauilchiua tomin? ¿Toni nochipa ika tajtoua? ¿Yekmelauj ininka motekipachoua oksekin, oso sayoj kitayekanaltia itanejnekilis uan mokalakia kampa amo moneki? ¿Ueli iuan se takuaujtamati? ¿Mokaua maj kiixyekanakan, oso amo kineki, uan hasta taixnamiki?” (Proverbios 31:10-31; Lucas 6:45; Efesios 5:22, 23; 1 Timoteo 5:13; 1 Pedro 4:15).

18. ¿Toni moneki tikelnamikiskej komo tikitaj ke ijkuak timoixmattokej tikpiaj seki taman nepololmej tein uelis tikixpanauiskej?

¹⁸ Moneki amo tikelkauaskej ke timoixmattokej iuan aksa akin no kiselij tajtakol tein techpanoltilij Adán. Nochin kipiaj nepololmej uan seki moneki tikixpanauiskej, tein tejuan tonepololuan uan inepololuan akin tiknemiliaj iuan timonamiktiskej (Romanos 3:23; Santiago 3:2). Uan no, se taman nepolol uelis techpaleuis maj tikyektalikan seki taman tein amo kuali tikchiuaj. Kemej neskayot, xikonnemili ke se tonal nanmotajtolteuiaj keman nanmoixmattokej, ta hasta akin motasojtaj uan mopoujkaitaj kemansa amo sayoj se tanemilil kipiaj (no xikonita Génesis 30:2 uan Hechos 15:39). ¿Uelis sayoj okachi nanmochikauaskej amo niman nankualaniskej uan nankimatiskej nankiyektaliskej nejon kuejmolmej ika yolseuilis? (Proverbios 25:28.) ¿Kinextia akin tikonnemilia iuan tionmonamiktis ke kineki mopatas? ¿No ijkon uelis moijtos ika tein tikonneki tikonchiuas? ¿Uelis tionmochikauas amo niman tionmoyolxokolis? (Eclesiastés 7:9.) Komo timomachtiaj tikyektaliskej kuejmolmej uelis techpaleuis maj timoyeknojnotsakan, porin nejon motelnekis tikchiuaskej keman timonamiktiskejya (Colosenses 3:13).

19. ¿Toni kuali yeskia maj tikchiuakan komo ijkuak timoixmattokej tikitaj ke onkak uejueyi nepololmej?

¹⁹ Sayoj ke ¿toni uelis tikchiuaskej komo tikitaj ke akin tiknemiliaj iuan timonamiktiskej kipia seki uejueyi nepololmej? Moneki kuali tikixejekoskej toni tikchiuaskej. Maski semi tiktelixuelitaskej uan tiktelnejnekiskej timonamiktiskej, maj amo tikixpanauikan uejueyi nepololmej (Proverbios 22:3; Eclesiastés 2:14). Komo akin tiknemiliaj iuan timonamiktiskej kipia uejueyi nepololmej, okachi kuali maj tikiluikan ke amo tiksentokaskej iuan timoixmatiskej.

MAJ TICHIPAUJKANEMIKAN KEMAN TIMOIXMATTOSKEJ

20. ¿Keniuj uelis chipaujkanemiskej takat uan siuat akin moixmattokej?

²⁰ ¿Keniuj uelis tichipaujkanemiskej keman timoixmattoskej? Yekinika, moneki tikixtaliskej ijkon tikchiuaskej. Kampa tionnemi, ¿kiitaj ke kuali yetok maj se takat uan se siuat akin moixmattokej momakitskikan, monauakan, mopitsokan oso motennamikikan? Maski kiitaj ke kuali yetok, okachi kuali maj ijkon timonextilikan netasojtalis keman moixtalijya kemanian timonamiktiskej. Sayoj ke moneki timoyekpiaskej maj nejon amo techuika maj tikchiuakan tein amo kinamiki oso maj tiauilnemikan (Efesios 4:18, 19; no xikonita El Cantar de los Cantares 1:2; 2:6; 8:5, 9, 10). Kemej toyolo techkajkayaua, kuali yeskia maj amo timokauakan toselti itech se kali, itech se tepos tein ijkatok oso kansaika kampa uelis techuikas maj tikchiuakan tein amo kinamiki (Jeremías 17:9). Komo tichipaujkanemij keman timoixmattokej kinextia ke tikmatij timotsakuiliskej uan ke yekinika tikitaj maj kuali momachili akin tiknemiliaj iuan timonamiktiskej uan amo tiktayekanaltiaj totanejnekilis. Uan tein okachi moneki, keman tichipaujkanemij ijkuak timoixmattokej, kiyolpaktia Jiova Dios, akin kinnauatia itekitikauan maj amo kichiuakan tein amo kinamiki uan maj amo auilnemikan (Gálatas 5:19-21).

21. ¿Toni moneki moyekiluiskej akin kiixtalijtokej monamiktiskej?

²¹ Ojpatika, no moneki maj takat uan siuat akin moixmattokej moyeknojnotsakan. Keman kinemiliaj monamiktiskej, moajsi seki taman tein moneki moyekiluiskej. ¿Kani nemiskej? ¿Tekitiskej nochin omen? ¿Kinekij kinpiaskej konemej? No moneki maj moiluikan okseki taman, xa tein achto kichiujkej, tein uelis kijtakos ininnemilis kemej namikuanij. Nejin uelis yeski ke xa motauikaltijtokej oso xa kipiaj se kokolis tein ika nemijya. Miakej akin kinkui sida amo niman kimachiliaj ke kipiaj nejon kokolis. Komo se takat oso se siuat kinemilia monamiktis iuan aksa akin achto tel auilnemia oso mopanoltiliaya droga itech italuayo, amo onkaskia kuejmol komo yejua oso itatuan tajtanij maj kiitakan tapajtianij ox kipia nejon kokolis. Komo kemaj kipia, yejua moneki amo kichikaujkauis akin ixyetoya iuan monamiktis maj iuan monamikti komo yejua amo kineki. Uan no, achto ke peuaskej iuan moixmatiskej aksa, kuali yeskia maj akin achto tel auilnemiaj oso mopanoltiliayaj droga itech inintaluayo yakan iuan tapajtijkej maj kinita ox kipiaj sida.

SATEPAN KE TIMONAMIKTIAJ

22, 23. 1) ¿Keniuj uelis aksa amo kinextis taixejekolis keman kiitas toni mochiuas ijkuak monamiktis? 2) ¿Keniuj moneki tikitaskej tonal keman timonamiktiskej uan tonemilis kemej namikuanij?

²² Xa seki metsti achto ke monamiktiskej, takat uan siuat kitemojtoskej nochi tein monekis itech tonal keman monamiktiskej. Komo nochi kichiuaj ika taixejekolis uelis kinpaleuis maj amo moteltekipachokan. Komo kichiuaj tein okachi kualtsin uan tein okachi patiyoj keman monamiktiskej, xa kinyolpaktis kalyetouanij uan akin kinixmatij, sayoj ke akin monamiktiskej uan ininchankauan xa semi kinsioujtis uan kinuikilis miak tomin maski amo monekia. Kuali yetok maj tikchiuakan seki taman kemej momattokej kichiuaskej kampa tinemij, sayoj ke moneki maj amo tiktelpanoltikan nion maj tiktemokan maj iluit okachi kuali ke okseki nenamiktilis, porin moelkauas tein okachi moneki uan kichiuas maj amo yolpakikan itech nejon tonal akin monamiktiaj. Maski no moneki kiitaskej toni kinekij oksekin maj mochiua, yejua takat akin monamiktia yekinika kinamiki maj kiixpejpena toni mochiuas keman monamiktiskej (Juan 2:9).

²³ Maj tikelnamikikan ke nenamiktilis uejkaua sayoj se tonal, sayoj ke nemilis kemej namikuanij uejkaua nochipaya. Yejua ika, maj amo semi timotekipachokan toni tikchiuaskej itech tonal keman timonamiktiskej, ta okachi kuali maj tiktemokan maj Jiova techixyekana uan maj achto tikixtalikan keniuj tinemiskej kemej namikuanij. Nejon techpaleuis maj tiyolpakikan iuan tonamik.